काठमाडाैं- भारतीय जनता पार्टी (भाजपा)का विधायक पुष्करसिंह धामी उत्तराखण्डका नयाँ मुख्यमन्त्री बन्ने पक्का भएको छ। मुख्यमन्त्री तीर्थसिंह रावतले राजीनामा दिएपछि शनिबार विधायक दलको बैठकले उनको नाम सिफारिश गरेको हो।
खटिमा (उधम सिंह नगर) का भाजपाका विधायक पुष्कर राज्यका ११औं मुख्यमन्त्री हुनेछन्। विद्यार्थी जीवनदेखि राजनीतिमा सकृय भएर लागेका उनी अखिल भारतीय विद्यार्थी परिषद्का विभिन्न पदमा कार्यरत थिए। पछि उनलाई दुईपटक भारतीय जनता युवा मोर्चाको प्रदेश अध्यक्ष पनि बनाइएको थियो।
उत्तराखण्ड राज्य गठन भएपछि २००२ सम्म उनले मुख्यमन्त्रीका सल्लाहकारको रूपमासमेत काम गरे। २०१० देखि २०१२ सम्म शहरी विकास अनुगमन परिषद्का उपाध्यक्षको रूपमा काम गरेका उनी त्यसपछि पहिलोपटक विधानसभा चुनाव जित्दै विधायक बनेका थिए।
यता, कांग्रेस पार्टीका प्रवक्ता रणदीप सिंह सुरजेवालाले उत्तराखण्डमा भाजपाले खेलौना जसरी मुख्यमन्त्री परिवर्तन गरेको आरोप लगाएको छन्। यसअघि उत्तराखण्डमा भाजपाले तीनपटक मुख्यमन्त्री परिवर्तन गरेको थियो। भुवनचन्द्र खण्डुरी त्यसपछि रमेश पोख्रियल मुख्यमन्त्री बनेका थिए। त्यसपछि पुनः खण्डुरीलाई मुख्यमन्त्री बनाइएको थियो।
‘नरेन्द्र मोदी जीलाई अर्को ६ महिनामा थप दुईतीन मन्त्री बदल्न हामी सल्लाह दिन्छौं। ताकि तपाईंको रेकर्ड सम्पूर्ण देशमा बनोस्,’ उनले भने। बुधबार पूर्वमुख्यमन्त्री तीर्थलाई अचानक पार्टी हाइकमान्डले दिल्ली बोलाएको थियो। उनले पार्टी अध्यक्ष जेपी नड्डा र केन्द्रीय गृहमन्त्री अमित शाहलाई भेटेका थिए।
भेटमा पार्टीले नेतृत्व परिवर्तन गर्ने उनलाई जानकारी दिएको थियो। उनी बिहीबार दिल्लीबाट फर्किएका थिए। शुक्रबार तीर्थले सञ्चारकर्मीहरुलाई उपनिर्वाचन गर्ने कि नगर्ने भन्ने निर्णय गर्ने अधिकार निर्वाचन आयोगको भएको भन्दै पार्टीले यसै आधारमा अर्को कदम चाल्ने जानकारी दिएका थिए।
तर, त्यसको केही बेरमा उनले गभर्नर बेबी रानी मौर्यलाई भेटेर राजीनामा बुझाए। तीर्थले संवैधानिक संकट उत्पन्न भएको भन्दै पदबाट राजीनामा गरेको हुनसक्ने आकलन गरिएको छ। तर, अमर उजालाले भने त्रिवेन्द्र सिंह रावतलाई मुख्यमन्त्रीको पदबाट हटाएपछि गरिएको आन्तरिक सर्वेक्षणमा तीर्थले चुनाव जित्न गाह्रो हुने देखाएकाे थियाे। त्यही कारण उनले राजीनामा गरेकाे हुनसक्ने जनाएकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1775456961.png)
-1764146706.png)
