काठमाडौं- जसपाको तर्फबाट राष्ट्रिय सभा सदस्य प्रमिला कुमारीले आफ्ना पार्टीका दुई शीर्ष नेताहरुलाई प्रधानमन्त्री केपी शर्मा ओलीको जालबाट बाहिर निस्किन अनुरोध गरेकी छन्। बिहीबार राष्ट्रिय सभामा बोल्दै उनले अध्यक्ष महन्थ ठाकुर र वरिष्ठ नेता राजेन्द्र महतो ओलीको जालमा फसेको बताइन्।
‘माननीय महन्थ ठाकुर र राजेन्द्र महतो लगायतका मेरा आदरणीय नेताहरु, जो प्रधानमन्त्री ओलीजीको झुठो आश्वासनको जालमा फस्नुभएको छ। उहाँहरुलाई त्यो छलकपट रुपी जालबाट बाहिर निस्किन र जनता समाजवादी पार्टीलाई बलियो बनाउन हार्दिक अनुरोध गर्दछु। संवैधानिक सर्वोच्चता र लोकतन्त्रको रक्षाका लागि अहिले सबै राजनीतिक दल एक जुट हुनु अति आवश्यक छ’, उनको भनाइ थियो।
उनले संविधानको धारा ७६ (५) मा दलको ह्विप नलाग्ने संविधानविद्हरुको भनाइ रहेको भए पनि राष्ट्रपति विद्यादेवी भण्डारीले प्रधानमन्त्री पदमा ओलीलाई नै निरन्तरता दिने दुराशयले संविधानको अपव्याख्या गरेको बताइन्।
‘प्रतिनिधि सभाका १४६ सदस्यहरु सशरीर उपस्थिति भइ शेरबहादुर देउवालाई प्रधानमन्त्री नियुक्तिको लागि परमादेश जारी गराउन, प्रतिनिधि सभा पुनःस्थापित गराउन मुद्दा दायर गरी न्यायको प्रतीक्षामा हुनुहुन्छ। मलाई पूर्ण विश्वास छ, निकट भविष्यमा नै सम्मानित सर्वोच्च अदालतले संघीयता गणतन्त्र समावेशीता धर्म निरपेक्षतालाई जोगाउन र मजबुत बनाउन प्रधानमन्त्री र राष्ट्रपतिको कदम विरुद्ध आदेश जारी गर्ने छ’, उनले भनिन्।
उनले ओली सरकारले अध्यादेशमार्फत् नै शासन चलाउने दुस्साहस गरेको बताइन्। प्रधानमन्त्री र राष्ट्रपतिको सहमतिमा ल्याइएको कतिपय राष्ट्रघाती अध्यादेशहरु कार्यान्वयनमा पनि सर्वोच्च अदालतले रोक लगाएकोमा उनले स्वागत गरिन्।
‘निर्वाचन आयोग लगायतका विभिन्न संवैधानिक निकायहरुमा आफ्नो मान्छे नियुक्ति गरि असंवैधानिक निर्णय गर्न लगाउँदै हुनुहुन्छ। यो सबै समस्याको समाधान अदालतमार्फत् हुने विश्वास नेपाली जनताले लिएको छ’, उनको भनाइ थियो।
उनले जनताको सर्वोच्च संस्था प्रतिनिधि सभा विघटन भएको अवस्थामा नेपाली जनताको सरोकारको विषयमा जोडदार ढंगले आवाज उठाउनका लागि राष्ट्रिय सभा लामो समय चल्ने अपेक्षा गरेको बताइन्। गत पुस ५ गते प्रतिनिधि सभा विघटन भएपछि पुस १७ गते बोलाइएको राष्ट्रिय सभाको चार वटा बैठकपछि पुस २६ गते नै अधिवेशन अन्त्य गरिएको थियो। त्यसपछि बिहीबार मात्रै राष्ट्रिय सभाको अधिवेशन सुरु भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
