काठमाडौं– नेकपा एमाले दशौं महाधिवेशन आयोजक कमिटीको बैठकमा वरिष्ठ नेता माधवकुमार नेपाल पक्षका नेताहरुलाई पनि निम्तो पठाइएको छ।
असार १६ गतेका लागि प्रधानमन्त्रीनिवास बालुवाटारमा बोलाइएको बैठकमा नेपाल पक्षका केन्द्रीय सदस्यलाई पनि बोलाइएको कार्यालय सचिव शेरबहादुर तामाङले जानकारी दिए। तामाङले भने, ‘हामीले तत्कालीन एमालेका सवै केन्द्रीय सदस्यहरुलाई सूचना गरेका छौं।’
नेकपा एमालेको उक्त बैठकले २०७५ जेठ २ कै संरचनामा फर्काउने तयारी गरेको छ। वरिष्ठ नेता नेपाल पक्षको बटमलाइन पार्टीको संरचना पूर्ववत् अवस्थामा फर्काउनु पर्ने रहेको छ।
सर्वोच्च अदालतले समेत महाधिवेशन आयोजक कमिटीलाई वैधानिक निकाय मान्न नसकिने भन्दै उसले गरेका निर्णय उल्टाइदिएपछि अध्यक्ष तथा प्रधानमन्त्री केपी ओली पक्ष तत्कालीन केन्द्रीय कमिटी नै ब्यूँताउन तयार भएको हो।
पार्टी एकताका विषयमा भइरहेका अनौपचारिक संवादमा नेपाल पक्ष सहमत भइसकेको छैन। यस्तो अवस्थामा बोलाइएको उक्त बैठकमा केही नेपाल पक्षीय केन्द्रीय सदस्यहरु सहभागी हुने अपेक्षा ओली पक्षको छ।
बुधबारको बैठकका लागि अजेन्डा तय गर्न मंगलबार बेलुकी ५ बजे स्थायी कमिटीको बैठक बोलाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
