संवैधानिक इजलास (फाइल तस्वीर)
काठमाडौं- नायब महान्यायाधिवक्ता पद्मप्रसाद पाण्डेय बहुदलीय व्यवस्थामा राजनीतिक दलहरूले दलीय व्यवस्था मान्दैनाैं भन्न नमिल्ने बताएका छन्। पाण्डेयले संविधानको ७६ काे उपधारा ५ अनुसार पनि दलीय ह्वीप लाग्ने बताए।
प्रतिनिधि विघटन सम्बन्धी मुद्दामा मंगलबार सर्वाेच्च अदालतमा बहस गर्ने क्रममा उनले दलको अनुशासनबाहिर दलका सांसद र नेता जान नमिल्ने तर्क गरे। राजनीतिक दल सम्बन्धी ऐनमा भएको व्यवस्था पनि यही रहेको उनको भनाइ छ।
उनले नेपाली कांग्रेसका सभापति शेरबहादुर देउवालाई प्रधानमन्त्री बनाउन भनेर हस्ताक्ष गरिएका एमालेका सांसदको हस्ताक्षरले मान्यता नपाउने तर्क गरे। एउटै पार्टी सत्तापक्ष र प्रतिनपक्ष हुन नसक्ने उनको भनाइ छ।
राष्ट्रपति विद्यादेवी भण्डारीले संविधानको धारा ७६ को ५ अनुसार प्रधानमन्त्रीमा दाबी गर्न आह्वान गरेपछि कांग्रेस, माओवादी केन्द्र, जसपाको उपेन्द्र यादव पक्ष र एमालेको माधवकुमार नेपाल पक्षका १४९ सांसदको हस्ताक्षरसहित देउवाले प्रधानमन्त्रीमा दाबी गरेका थिए।
तर, राष्ट्रपति भण्डारीले देउवा र एमाले अध्यक्ष केपी शर्मा ओली दुवैको दाबी खारेज गरिदिएको थिइन्। साेही रात अर्थात् जेठ ७ गते राति मन्त्रिपरिषद्को सिफारिसमा राष्ट्रपतिले प्रतिनिधि सभा विघटन गरेकी थिइन्। त्यसपछि देउवालाई प्रधानमन्त्री बनाउने माग गर्दै प्रतिनिधि सभा विघटनविरुद्ध जसपाको यादव, एमालेको नेपाल पक्षसहित कांग्रेस र माओवादीका १४६ सांसदले सर्वाेच्च अदालतमा रिट दायर गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
