काठमाडौं– भूमिगत राजनीतिबाट खुला राजनीतिमा आएका नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ले पछिल्लो समय आफ्ना अजेन्डा स्थापित गराउन भन्दै विभिन्न दलका नेतासँग वार्ता गरिरहेका छन्।
केही समयअघि प्रधानमन्त्री केपी शर्मा ओलीसँग सम्झौता गरेर शान्ति प्रक्रियामा आएका विप्लवले ‘जनमत संग्रहको अजेन्डाका लागि’ भन्दै माओवादी केन्द्रका अध्यक्ष पुष्पकमल दाहाल 'प्रचण्ड' तथा जनता समाजवादी पार्टीका संघीय परिषद् अध्यक्ष बाबुराम भट्टराईसँग वार्ता गरेका हुन्।
केही दिनअघि बाबुरामको निवासमा विप्लव नेतृत्वको नेकपाका सचिवालय सदस्य धर्मेन्द्र बास्तोला र उदयबहादुर चलाउनेले भेट गरी सहकार्यको प्रस्ताव गरेको एक नेताले बताए।
बास्तोला र चलाउने शनिबार खुमलटार पुगेर प्रचण्डसँग समेत भेट गरेका थिए।
भेटका अवसरमा प्रचण्डले अहिले 'प्रतिगमनकारी ओली विरुद्धको लडाइँमा लगेकाले' यो लडाइँ सफल भएपछि मात्र जनमत संग्रहको विषयमा कुरा गर्ने बताएको विप्लवनिकट एक नेताले बताए।
भेटका क्रममा दुवै नेताले मिल्ने मुद्दाका विषयमा सहकार्य गर्न सकिने प्रतिक्रिया दिएको एक नेताले बताए। विप्लव भने अहिले कपिलवस्तुस्थित आफ्नै घरमा रहेर खेतीपातीमा व्यस्त छन्।
चर्चाका लागि जनमत संग्रह भन्दै आए पनि विप्लवले त्यो किन आवश्यक परेको हो र केका लागि गर्न चाहेका हुन् भन्ने चाहिँ खुलाएका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
