काठमाडौं- नेकपा एमालेका वरिष्ठ नेता माधवकुमार नेपालले आफूलाई प्रधानमन्त्रीको अफर आए पनि अब विपक्षी गठबन्धनबाट पछि नहट्ने बताएका छन्। शनिबार पाँच दलको विपक्षी गठबन्धनले काठमाडौंमा आयोजना गरेको पत्रकारसँगको अन्तरक्रियामा नेपालले आफूलाई त्यस्तो अफर आइरहेको र त्यसले केही फरक नपार्ने बताए।
गत बिहीबार सम्पादकहरुसँगको छलफलमा भन्दा प्रष्ट देखिएका नेपालले सर्वोच्च अदालतमा बुझाएको आफूपक्षका सांसदहरुको हस्ताक्षर फिर्ता लिने कुनै गुञ्जायस नरहेको समेत प्रष्ट पारे। ‘म धोका दिने मान्छे होइन, सर्वोच्चमा बुझाएको हस्ताक्षर फिर्ता हुँदैन। जुन प्रक्रिया अगाडि बढेको छ, त्यहाँ धोका दिने पक्षमा छैन’, नेपालले भने।
नेपाली कांग्रेसका सभापति शेरबहादुर देउवालाई प्रधानमन्त्री नियुक्त गर्न कांग्रेस, माओवादी केन्द्र, जनता समाजवादी पार्टी (जसपा)को उपेन्द्र यादव पक्ष र राष्ट्रिय जनमोर्चासँगै एमालेका नेपालपक्षका २६ सांसदले पनि राष्ट्रपति विद्यादेवी भण्डारीसमक्ष प्रस्ताव गरेका थिए। तर, राष्ट्रपतिले प्रधानमन्त्री नियुक्त नगरी उल्टै कामचलाउ प्रधानमन्त्री केपी शर्मा ओलीको सिफारिसमा प्रतिनिधि सभा विघटन गरेपछि त्यसमध्ये एमालेका २३ जना सांसदले पनि सर्वोच्च अदालतमा दायर रिटमा हस्ताक्षर गरेका छन्। उनीहरुले विघटन बदर र देउवालाई प्रधानमन्त्री नियुक्त गर्न माग गरेका छन्।
प्रधानमन्त्री एवं एमाले अध्यक्ष ओलीले केही समयअघि एमाले एकताको आह्वान गर्दै त्यो हस्ताक्षर फिर्ता लिनुपर्ने उल्लेख गरेका थिए। तर, नेपालपक्षले लगत्तै हस्ताक्षर फिर्ता हुन नसक्ने स्पष्ट पारेको थियो। त्यसयता ओली र नेपाल दुवैपक्षका दोस्रो तहका नेताहरुले एकताको प्रयत्न गर्दै आए पनि कर्णाली प्रदेशका चारजना सांसदलाई पुनर्बहाली गर्ने सर्वोच्च अदालतको आदेशविरुद्ध ओली पुनरावलोकनको निवेदन (भ्याकेट) लिएर सर्वोच्च गएपछि त्यो पहल भंग भएको थियो। ओली पक्षले पुनर्बहाली भएका चारमध्ये तीनजनालाई शुक्रबार फेरि कारबाही गरेपछि उनीहरु एक महिनाका लागि प्रदेश सभा सचिवालयबाट निलम्बनमा परेका छन्।
एकताको अध्याय सकिएकै हो?
एमालेको एकता जोगाउने भन्दै लागिरहेका नेताहरुले एकताको सम्भावना कमजोर रहेको तर प्रयत्न जारी रहेको बताउँदै आएका छन्। पछिल्ला दिनमा औपचारिक वार्ता र छलफल नभए पनि प्रयत्न जारी नै रहेको उनीहरुको भनाई छ।
यहीक्रममा पछिल्ला केही दिनयता ओलीपक्षबाट माधव नेपाललाई प्रधानमन्त्री बनाएर भए पनि एकता जोगाउनुपर्ने भनाई सार्वजनिक हुनथालेको छ। प्रतिनिधि सभा पुनःस्थापना भएको अवस्थामा शेरबहादुर देउवा प्रधानमन्त्री बन्ने भएमा नेपाललाई नै प्रधानमन्त्री बनाएर अघि जानुपर्ने धारणा ओलीनिकट नेताहरुले सार्वजनिक रुपमै व्यक्त गरिरहेका छन्।
ओलीले नेपाललाई साँच्चै प्रधानमन्त्री बनाउन चाहन्छन् या त्यो उनको आफुलाई आइलागेको संकट टार्ने अर्को रणनीति हो भन्ने त प्रष्ट छैन। तर, ओलीपक्षबाट नेपाललाई प्रधानमन्त्री बनाउनेदेखि एमालेको अध्यक्ष (दुईजना अध्यक्षको व्यवस्था गरेर) बनाउनेसम्मका चर्चा बाहिर ल्याइएको छ।
शनिबार नेपालले पनि यो कुरा उल्लेख गरे। उनले भने, ‘माधव नेपाललाई प्रधानमन्त्रीको अफर आउँछ होइन कि आइसक्यो। तर, प्रधानमन्त्री भइसकेको माधव नेपाल फेरि प्रधानमन्त्री बन्नलाई धोका दिने मान्छे होइन।‘
नेपालनिकट एक नेताले प्रधानमन्त्री वा अध्यक्षको अफर नेपाललाई विपक्षी गठबन्धनबाट अलग गराउँने ओलीको चालबाजी मात्र भएकाले त्यसको कुनै अर्थ नरहेको बताए। ‘एकताका निम्ति हामीले प्रष्टसँग आफ्नो बटमलाइन राखिसकेका छौं, त्यसबाहेक दायाँबायाँ हुने कुनै सम्भावना छैन’, ती नेताले भने, ‘एकता चाहेको हो भने ती कुरा पूरा गर्दा भइहाल्यो, होइन भने हामी कुन बाटो हिँड्ने भन्ने तय गरिसकेका छौं।‘
उनले एमाले एकताको अध्याय समाप्त भइसकेको भनेर टिप्पणी गर्न चाहेनन्। ‘हामीले यो पार्टी फुटाउने प्रयत्न हिजो पनि गरेका थिएनौं, आज पनि गरेका छैनौं। फुटाउने प्रयत्न गरेको ओलीले हो’, उनले भने, ‘त्यसकारण अध्याय बाँकी राख्ने कि समाप्त पार्ने भन्ने उहाँले नै भन्ने हो।‘ नेपालले भने शनिबारको कार्यक्रममा आफूलाई ‘एमालेभित्रको विद्रोही’ भन्दै विपक्षी गठबन्धनमै रहने स्पष्ट संकेत गरिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
