काठमाडौं– काठमाडौं उपत्यकामा साइबर अपराधका घटना बढ्दै जान थालेका छन्।
प्रविधिको विकाससँगै सामाजिक सञ्जालमार्फत अपराध गर्नेको संख्या बढ्दै गएको हो। महानगरीय अपराध महाशाखामा चालू आर्थिक वर्षको १० महिनामा १ हजार १ सय ७६ साइबर अपराधका घटना दर्ता भएका छन्।
सामाजिक सञ्जाल विशेष गरेर फेसबुक, इमेल, ट्विटर, युट्युब, एसएमएस, एटीएमलगायतबाट साइबर अपराधका घटना बढेका हुन्।
साइबर अपराधमध्ये चालू आर्थिक वर्षको १० महिनामा ५४ जनालाई मुद्दा चलाइएको महानगरीय अपराध महाशाखाका प्रमुख एवम् प्रहरी वरिष्ठ उपरीक्षक धीरजप्रताप सिंहले जानकारी दिए।
‘विभिन्न सामाजिक सञ्जालमा ३७, अरु व्यक्तिको पासपार्ट ह्याकिङ गर्ने २, नचाहिँदो कुरा लेखेर एसएमएस गरेर धम्की दिने ११, एसएमएस गरेर चिट्टा पर्यो भनेर ठगी गर्ने ३ र युट्युबमा अनावश्यक कुरा राखेर चरित्र हत्या गर्ने २ जनालाई मुद्दा चलाएका छौँ।,’ उनले भने।
साइबर अपराधमा लाग्नेमध्ये सबैभन्दा धेरै व्यक्ति १२ वर्षदेखि ४५ वर्षसम्मका रहेको महाशाखाले जनाएको छ। पछिल्ला चार वर्षको तथ्यांकलाई हेर्दा आर्थिक वर्ष २०७१÷०७२ मा ३ सय ५, २०७२÷७३ मा ८ सय ३० र २०७३÷०७४ मा १ हजार १ सय ९७ मुद्दा महाशाखामा दर्ता भएका थिए।
पछिल्लो समयमा उपत्यकालगायत देशभर साइबर अपराध बढ्दै गएपछि यही जेठ १५ गते अर्थमन्त्री डा युवराज खतिवडाले संघीय संसदका दुवै बैठकमा प्रस्तुत गरेको बजेट वक्तव्यमा साइबर अपराध नियन्त्रण ब्यूरो स्थापनाका लागि बजेट विनियोजन गरेका छन्। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
