काठमाडौं- नेपाल राष्ट्र बैंकका गभर्नर महाप्रसाद अधिकारीले अर्थतन्त्रमा साना तथा घरेलु व्यवसायको योगदान महत्त्वपूर्ण रहेको बताएका छन्। नेपाल घरेलु तथा साना उद्योग महासंघका पदाधिकारीहरुसँग सोमबार 'वेबिनार'मार्फत् आयोजना गरिएको अन्तरक्रिया कार्यक्रममा उनले उक्त धाराणा राखेका हुन्।
'संसारभरि नै एमएसएमईज र एसएमइजको भूमिका हेर्ने हो भने संख्यात्मक हिसाबले त झण्डै ९९ प्रतिशत नै देख्छौँ भने अर्थतन्त्रमा योगदान पनि धेरै अर्थपूर्ण रहन्छ,’ उनले भने। नेपाल राष्ट्र बैंकले आफ्नो नीतिहरुमा त्यही हिसाबले प्राथमिकता दिँदै आएको उनले बताए।
'गत सालको मौद्रिक नीतिमार्फत् हामीले वास्तवमा ऐतिहासिक परिवर्तन नै ल्याउन खोजेका छौं। त्यो प्रयास नीतिगत हिसाबले धेरै हदसम्म उपलब्धिमूलक भएको छ,' गभर्नर अधिकारीले भने। सहुलियतपूर्ण कर्जा पनि प्रत्येक शाखामा १० वटा आवेदन आउनुपर्ने र सँगसँगै कूल कर्जाको १५ प्रतिशत एक करोडभन्दा साना कर्जाहरुमा जानुपर्ने व्यवस्था गरी पुनर्कर्जामध्ये पनि ७० प्रतिशत पुनर्कर्जा १५ लाखभन्दा सानालाई दिनेगरी व्यवस्था गरिएको उनले बताए।
'योभन्दा अगाडि साना उद्योगीले पुनर्कर्जा लिएको इतिहास नै छैन। गत सालमात्रै लगभग ४२ हजारले पुनर्कर्जा पाउनुभयो। त्यो महत्त्वपूर्ण उपलब्धि हो,' गभर्नर अधिकारीको भनाइ थियो, 'हाम्रो प्रयास भनेको धेरैभन्दा धेरै ऋणी, व्यवसायीको आत्मबल कसरी बढाउन सकिन्छ। उहाँहरु बीचबीचमा आएका उतारचढावको कारणले आफैं एउटा स्टेजमा पुगिसकेको व्यवसायबाट फेरि भासिन पुग्ने, हराउनुपर्ने स्थिति नआओस्। त्यहाँ कसरी नीतिगत हिसाबले हामीले सघाउन सकिन्छ भनेर राष्ट्र बैंकले गरेको एउटा इमानदार प्रयास थियो।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
