काठमाडौं– विपक्षी दल नेपाली कांग्रेसले कोरोना भाइरस संक्रमण नियन्त्रणका लागि भनेर जारी निषेधाज्ञालाई सकारले आफ्नो सत्ता जोगाउने सुरक्षा कवचको रुपमा प्रयोग गरेको जनाएको छ।
बिहीबार नेपाली कांग्रेसको केन्द्रीय कार्यसमितिको बैठकबारे जानकारी गराउँदै नेपाली कांगेसका नेता प्रकाशशरण महतले सरकारकै उदासिनता र अर्कमण्यताको कारणले कोभिड–१९ को विस्तार भएको र निषेधाज्ञा लागू गर्नुपर्ने स्थिति आएको बताए। निषेधाज्ञा जारी गरेर पनि सरकारले कोभिड संक्रमण नियन्त्रण र न्यूनीकरणमा प्रभावकारी कदम नचालेको नेता महतले बताए।
असन्तुष्ट जनताहरु पनि निषेधाज्ञामा विरोध गर्न बाहिर निस्किने अवस्था नभएकाले सरकारमा भएका मानिसहरुले त्यसलाई आफूहरु सुरक्षित रहेको रुपमा बुझेका उनको भनाइ छ।
‘लकडाउन (निषेधाज्ञा)को अवस्थामा नागरिकहरु जति नै सरकारसँग असन्तुष्ट भएपनि सडकमा निस्किन सक्ने अवस्था छैन, त्यसलाई उहाँ (सरकारमा भएका व्यक्ति)हरुले आफ्नो सत्ता जोगाउने कवचको रुपमा लिइरहनु भाछ, त्यो संक्रमणको अवस्थालाई आफ्नो सत्ता जोगाउने अवसरको रुपमा लिइरहनुभएको छ,’ नेता महतले भने, ‘संक्रमणबाट उहाँहरु दुःखी हुनुपर्ने, यसलाई कसरी चाँडोभन्दा चाँडो कम गर्ने, रोक्ने भनेर लाग्नुपर्ने। तर, उहाँहरुले कोभिडका कारण सत्तामा हामी झन सुरक्षित भयौँ। कोहि विरोधमा निस्किन सक्दैन। बाहीर आउन मिल्दैन भनेर उहाँहरु यसमा सहज महसुस गरिरहनुभएको छ।’
बैठकमा कांग्रेसको केन्द्रीय महाधिवेशन भदौ १६ गतेदेखि १९ गतेसम्म गर्नेगरी प्रस्ताव पेश भएको छ भने स्थानीय तहको महाधिवेशन साउन १२ गतेबाट गर्ने प्रस्ताव छ। यसबारे छलफल गरेर निष्कर्ष निकालिने नेता महतले बताए।
महाधिवेशनको सम्बन्धमा सञ्चारकर्मीहरुलाई प्रतिक्रिया दिँदै नेपाली कांग्रेसका नेता रमेश लेखकले क्रियाशील सदस्यता विवादकै कारणले महाधिवेशन प्रभावित नहुने बताए।
नेता लेखकले छिट्टै नै क्रियाशील सदस्यको सम्बन्धमा परेका उजुरीउपर छलफल गरेर अन्तिम नामावली निकालिने जानकारी दिए।
लेखकले भने, ‘६ गतेसम्म उजुरी दिन समय राखेका छौँ। गुनासाहरु आएका छन्। भोलीदेखि गुनासा र उजुरी हेरेर निष्कर्ष निकाल्छौँ। अन्तिम नामावली फाइनल गर्न लाग्छौँ।’
बैठकले सिन्धुपाल्चोकको बाढीको घटनामा दुःख प्रकट गर्दै पूर्ण प्राथमिकताका साथ उद्दार र राहतमा तीनै तहका सरकारको ध्यानाकर्षण गराएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
