रोल्पा– नेकपा माओवादी केन्द्रका नेता वर्षमान पुनले वर्तमान सरकार कोरोना महामारी नियन्त्रणमा भन्दा पनि कमाउ धन्दामा लागेको आरोप लगाएका छन्।
गृह जिल्ला रोल्पामा कोभिड–१९ महामारी रोकथाम र नियन्त्रणमा उपयोगी स्वास्थ्य सामग्री वितरण गर्दै नेता पुनले वर्तमान सरकार कोभिड–१९ महामारी नियन्त्रणमा पूर्णतः असफल भएको भन्दै महामारीको अनुचित फाइदा उठाउँदै सरकारमा भएकाहरु कमाउधन्दामा लागेको टिप्पणी गरेका हुन्। स्वास्थ्य सामग्री खरिदमा भएको अनियमितताका लागि ओली र उनको समूहले कहिल्यै माफी नपाउने पुनको भनाइ छ।
उनले जनस्वास्थ्यसँग सम्बन्धित विषयमा राजनीति नगर्न आग्रह गरे।
जिल्लाबाट निर्वाचित प्रतिनिधिसभा सदस्यको हैसियतमा महामारीको सुरुआती चरणदेखि नै समस्यामा परेका जिल्लाबासीको उद्धार र जीवन रक्षाका लागि प्रयास गर्दै आएको भन्दै उनले ओलीनिकट केही व्यक्तिले स्वास्थ्य सामग्री वितरण गरिएको विषयमा राजनीति गर्न खोजेको टिप्पणी गरे। सरकारले कोभिड–१९ महामारी रोकथाम र नियन्त्रणका लागि सिन्को नभाँचेको भन्दै पुनले जनप्रतिनिधिले आफ्नो दायित्व निर्वाह गर्दा आपत्ति जनाउनुपर्ने कारण नरहेको उल्लेख गरे। ‘आफू पनि सिन्को नभाँच्ने, अरुले गरेको पनि देख्न नसक्नेहरुलाई मेरो भन्नु केही छैन’, पुनले भने।
पुन दम्पत्तिले रोल्पामा कोभिड–१९ महामारी रोकथाम र नियन्त्रणमा उपयोगी स्वास्थ्य सामग्री वितरण गरेका छन्।
जिल्ला अस्पतालसहित स्थानीय तह मातहतका सबै स्वास्थ्य संस्था तथा सुरक्षाकर्मीका लागि पुन र उनकी पत्नी पूर्वसभामुख ओनसरी घर्तीले स्वास्थ्य सामग्रीको प्रबन्ध मिलाएका हुन्। स्वास्थ्य सामग्री वितरणका लागि पुन र घर्ती रोल्पा नगरपालिकासहित जिल्लाका सबै गाउँपालिका पुगेका थिए।
जिल्ला अस्पताल, सुरक्षाकर्मीका प्रतिनिधि र स्थानीय तहका प्रमुखहरुलाई स्वास्थ्य सामग्री हस्तान्तरण गरिएको पुनको सचिवालयले जनाएको छ।
वितरण गरिएका स्वास्थ्य सामग्रीहरुमा अक्सिजन कन्सन्ट्रेटर, अक्सिजन ब्याग, एन–१९ मास्क, सर्जिकल मास्क, इन्टिजन किट, पिपिई लगायत छन्। नेता पुनले अहिले कोभिड–१९ महामारीविरुद्ध एकजुट भएर लड्नुपर्ने भन्दै स्वास्थ्य मापदण्डको पालना गरी आफू, परिवार र समुदायलाई सुरक्षित राख्न आग्रह गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
