काठमाडौं- इजरायलमा बेन्जामिन नेतान्याहूको १२ वर्षे शासनकाल समाप्त भएकाे छ।
आइतबार इजरायलको संसद कुनेसटमा भएको मतदानमा नेतन्याहू अल्पमतमा परेपछि उनी सत्ताबाट बाहिरिएका हुन्।
उनलाई हटाउँदै विपक्षी गठबन्धनका दक्षिणपन्थी नेता नाफ्टाली बेनेट नयाँ प्रधानमन्त्री बनेका छन्। संसदमा भएको मतदानमा बेनेटको पक्षमा ६० र नेतन्याहूको पक्षमा ५९ मत आएको थियो। याेसँगै उनले नयाँ गठबन्धनको सरकारलाई सत्ता हस्तान्तरण गरेका छन्।
नयाँ सरकारको प्रस्ताव पेश गरेको विभिन्न आठ पार्टीको गठबन्धनबीच भएको सम्झौताअनुसार यामिनान पार्टीका बेनेट सन् २०२३ को सेप्टेम्बरसम्म इजरायलको प्रधानमन्त्री बन्नेछन्। त्यसपछिको दुई वर्षका लागि याइर लपिड प्रधानमन्त्री बन्नेछन्।
इजरायलमा बनेकाे नयाँ सरकारसँग विपक्षीभन्दा केवल एक सिटमात्रै बढी छ। उनको गठबन्धनमा इजरायलको इतिहासमा पहिलोपटक एउटा दल पनि सामेल छ। जसले २१ प्रतिशत अरब अल्पसंख्यक प्रतिनिधित्व गर्दछ।
निर्वाचनमा कसैले पनि बहुमत ल्याउन नसकेपछि र गठबन्धन सरकार बनाउन नसकेपछि इजरायलमा पछिल्लो दुई वर्षमा चारपटक आम निर्वाचन भएको थियो। यद्यपि, कुनै दलले स्पष्ट बहुमत ल्यान सकेका थिएनन्। त्यसैले जाेसँग बहुमत पुग्छ उसैकाे सरकार गठन हुने निश्चित थियाे।
इजरायलमा नयाँ सरकार बनेपछि पछिल्लो दुई वर्षदेखि देखिँदै आएको राजनीतिक अस्थिरताको भने अन्त्य हुने विश्वास लिइएको छ।
नेतान्याहू इजरायलमा सबैभन्दा लामो समयसम्म सत्तामा रहने नेता हुन्। नेतान्याहूले नयाँ सरकारलाई धोकाधडी र आत्मसमर्पणबाट बनेको खतरानक गठबन्धनको संज्ञा दिएका छन्। उनले छिटै नै नयाँ सरकार ढालिदिने चेतावनी दिएका छन्।
सत्ता हस्तान्तरण गर्दै ७१ वर्षीय प्रभावशाली इजरायली राजनीतिज्ञ नेतान्याहूले आफू चाँडै सत्तामा फर्कने वाचा गरेका छन्।
नेतान्याहू युगको अन्त्य गर्ने चाहना र राजनीतिक गतिरोधको तुलनामा थोरै समानता भएपनि दुई वर्षमा ४ वटा चुनावमा भाग लिएकाे बायाँपन्थी, केन्द्रवादी, दक्षिणपन्थी र अरब पार्टीहरूको गठबन्धन कमजोर हुने सम्भावना छ।
इजरायलको सबैभन्दा लामो समय पदमा रहेका नेतान्याहू सन् १९९६ देखि १९९९ सम्म पहिलाे कार्यकालकाे लागि प्रधानमन्त्री बनेका थिए। तर, २००९ देखि चुनावमा बारम्बार विजयी हुन नसक्दा र चलिरहेको भ्रष्टाचारको मुद्दाका कारण उनी कमजोर भएका छन्।
नेतान्याहूमाथि पनि घुस लिएको, धोकाधडी गरेको र विश्वासघात गरेको आरोपमा मुद्दा चलिरहेको छ। यद्यपि, उनले यी सबै आरोप अस्वीकार गर्दै आएका छन्। नाफ्टाली बेनेट प्रधानमन्त्री बनेसँगै नेतान्याहू दक्षिणपन्थी लिकुड पार्टीका नेता र संसद्मा विपक्षी नेताको रुपमा रहनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791454111.jpeg)
-1791448938.png)
-1786602170.png)
-1791388337.png)
