काठमाडौं- मंगलबार बिहान बौद्धस्थित नयाँबस्तीमा भेटिएको घुँडाभन्दा मुनिको शवको अवशेषको भाग महिलाको रहेको पुष्टि भएको छ। घुँडाभन्दा मुनिको भाग भेटिएपछि अनुसन्धानमा जुटेको प्रहरीले उक्त खुट्टाको भाग जाँचका लागि त्रिवि शिक्षण अस्पताल पठाएको थियो।
खुट्टाको पोष्टमार्टम र महिला वा पुरुष छुट्याउनका लागि डिएनए परीक्षणका लागि शिक्षण अस्पताल पठाइएको थियो। त्रिवि शिक्षण अस्पतालका विज्ञले उक्त खुट्टाको भाग महिलाको भएको पुष्टि गरेको महानगरीय प्रहरी परिसर काठमाडौंका एसएसपी अशोक सिंहले जानकारी दिए।
‘भेटिएको खुट्टाको भाग महिलाको हो भन्ने फरेन्सिक विज्ञबाट रिपोर्ट आएको छ’, एसएसपी सिंहले नेपाल लाइभसँग भने। भेटिएको घुँडामुनिको भाग करिब तीन साताअघि काटिएको पनि फरेन्सिक विज्ञको टोलीले बताएको छ।
घुँडाभन्दा मुनिको भाग भेटिएपछि महानगरीय प्रहरी परिसर काठमाडौं, महानगरीय प्रहरी अपराध महाशाखा र महानरीय प्रहरी वृत्त बौद्धको टोलीले घटनाको अनुसन्धान गरिरहेका छन्। तर, अहिलेसम्म घटनाका बारेमा प्रहरीले महत्वपूर्ण उपलब्धी हासिल गर्न सकेको छैन। यद्यपि, घटनासँग सम्बन्धित हुनसक्ने केही आधारहरु भने प्रहरीले फेला पारेको छ। ती आधारहरुलाई त्यस घटनासँग 'ट्याली' गर्ने काम प्रहरीले गरिरहेको छ।
खुट्टा भेटिएको ठाउँ नजिकै आगो बालेको भेटियो
कुहिन थालिसकेको खुट्टा भेटिएको ठाउँबाट करिब ७ सय मिटर जति टाढा आगो बालेको जस्तो ठाउँ फेला परेको प्रहरीले जनाएको छ। खुट्टा भेटिएपछि वरपर अरु कुनै अंग पनि हुनसक्छ भनेर खोजतलास गरेको प्रहरीले करिब ७ सय मिटर टाढा आगो बालेको जस्तो ठाउँ भेट्टाएको हो।
‘चिता नै बनाएर मान्छे पोलेको जस्तो भन्दा पनि जमिनमा सानो आकारमा आगो बालेको जस्तो ठाउँ भेटिएको हो’, अनुसन्धानमा संलग्न एक प्रहरी अधिकारीले नेपाल लाइभसँग भने, ‘त्यहाँ भएको खरानी र डढेका मासुका जस्ता टुक्रा समेत हामीले उठाएर जाँचका लागि पठाएका छौं।’
भेटिएको खुट्टा र आगो बालेको ठाउँ र त्यहाँ भेटिएका मासुका जस्ता टुक्राको केही सम्बन्ध छ/छैन भन्ने जाँचका लागि प्रहरीले ती चिज समेत संकलन गरेर जाँचका लागि पठाएको हो। यद्यपि, अहिलेसम्म खुट्टा र आगो बालेको ठाउँ र त्यहाँ भेटिएका मासुका टुक्रा जस्ता वस्तुको सम्बन्धबारे केही खुट्टिसकेको छैन।
चार जनाले बोरामा के फाले?
खुट्टा भेटिएकै ठाउँमा चार जनाले एउटा बोरा फ्याँकेको सीसीटिभी फुटेज प्रहरीले फेला पारेको छ। यसलाई प्रहरीले महत्वपूर्ण उपलब्धी मानेको छ। यसलाई केन्द्रमा राखेर अहिले प्रहरीले अनुसन्धान गरिरहेको छ। ती चार जनाले बोरामा के प्याक गरेर फ्याँके? बोरा फ्याँक्ने ती चार जना व्यक्ति को हुन्? अहिले यही विषयलाई केन्द्रमा राखेर प्रहरीले अनुसन्धान गरिरहेको छ।
सीसीटिभी फुटेजमा ती चार युवा भने प्रष्ट नदेखिएकाले अनुसन्धानमा समस्या भएको प्रहरीले जनाएको छ। ‘रातिको समयमा बोरा फ्याँकेको देखिन्छ। तर, उनीहरुको अनुहार प्रष्ट देखिँदैन। उनीहरु को हुन्? के फ्याँके भन्नेबारे अनुसन्धान जारी छ’, एसएसपी सिंह भन्छन्।
सीसीटिभी फुटेजमा देखिएका चार व्यक्तिलाई चिन्ने मान्छे कोही छ कि भनेर अहिले प्रहरीले घटनास्थल वरपरका व्यक्तिसँग समेत सोधपुछ गरिरहेको छ। सीसीटिभी फुटेजमा चार व्यक्ति देखिएको समयमा उनीहरुलाई देख्ने कोही छन् कि वा सीसीटिभी फुटेजमा देखिएको हुलिया तथा कपडा लगाएर हिँडेको व्यक्ति कसैले देखेको छ कि भन्नेबारे प्रहरीले अहिले अनुसन्धान गरिरहेको छ।
'मिसिङ केस'बाट खुलेन केही
प्रहरीले पछिल्लो दुई/तीन महिनादेखि कोही हराएको भए त्यसको खबर गर्न भनेको छ। हराएको भनेर निवेदन परेका व्यक्तिको फाइल प्रहरीले पल्टाइसकेको छ। तर, त्यसबाट पनि कुनै क्लू हात नपरेको अपराध महाशाखाका एसएसपी चन्द्रकुवेर खापुङ बताउँछन्।
‘हराएको मान्छे भनेपछि यो हुनसक्छ भनेर खोजिनीति गर्दा ती व्यक्तिहरु अहिले परिवारकै सम्पर्कमा रहेको पाइएको छ। घटना सार्वजनिक भएपछि अहिलेसम्म कोही पनि मेरो मान्छे हराएको थियो भन्दै सम्पर्कमा आएका छैनन्’, एसएसपी खापुङ भन्छन्, ‘यो घटना रहस्यमय नै छ अहिलेसम्म।’
फेला परेको हड्डीबाट त्यो महिलाको रहेको फरेन्सिक विज्ञले रिपोर्ट दिएपनि व्यक्तिको पहिचान हुन नसक्दा अनुसन्धानमा समस्या परेको प्रहरी अधिकारीहरू बताउँछन्।
प्रहरीको दिमागमा तेर्सिएको प्रश्न- मासु छिलेर हड्डी किन निकालियो?
घुँडाभन्दा मुनिका खुट्टाको भाग भेटिएको र त्यसको पनि हड्डी भने नभएको पाइएको छ। मासु छिलेर निकाले जसरी हड्डी बिनाको मासुको भाग मात्रै नयाँबस्तीमा फ्याँकेजस्तो देखिएको छ। खुट्टाको घुँडाभन्दा मुनिको भाग मात्रै भेटिनु र त्यसको पनि हड्डी नभेटिएपछि अनुसन्धानमा खटिएका प्रहरीकासामु अहिले एउटा प्रश्न तेर्सिएको छ- मासु छिलेर हड्डी किन निकालियो ?
हड्डीको भाग नै नभेटिएपछि प्रहरीले भने विभिन्न कोणबाट घटनाको विश्लेषण गरेको छ। कालगतिले नै मान्छे मरेपनि उचित तरिकाले सदगत् गर्न नसक्दा बाँकी रहेको अस्तुको भाग कुनै जनावरले त्यहाँ पुर्याएको हुनसक्छ कि भनेर अनुसन्धान गरिरहेको एसएसपी खापुङ बताउँछन्।
अर्कोतफ मृत व्यक्तिको हड्डी कुनै लामा, धामी वा कसैले निकालेको पनि हुन सक्नेतर्फ पनि विश्लेषण गरेर प्रहरीले अनुसन्धान गरिरहेको छ। यद्यपि, अहिलेसम्म यसबारे प्रहरीले कुनै निष्कर्ष भने निकाल्न सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789992067.jpeg)
-1789631269.jpg)
