काठमाडौं– गएको जेठ ७ गते मध्यरातमा दोस्रो पटक प्रतिनिधि सभा विघटन गरेका प्रधानमन्त्री केपी शर्मा ओलीले त्यसयता दुई पटक मन्त्रिपरिषद् पुनर्गठन तथा विस्तार गरेका छन्।
प्रधानमन्त्री ओलीले आफ्नो कार्यकालमा १९ औं पटक विस्तार गरेर २५ सदस्यीय मन्त्रिपरिषद् बनाएका छन्। बिहीबार थपिएका मन्त्री समेतको संख्याका हिसाबले संघीय सरकारको मन्त्रिपरिषदमा सबैभन्दा बढी सदस्य प्रदेश २ का परेका छन्।
२५ सदस्यीय मन्त्रिपरिषद्मा आधाभन्दा धेरै मन्त्री प्रदेश २ का छन्। प्रदेश २ का १२ मन्त्री र १ राज्यमन्त्री गरेर ओली क्याबिनेटमा १३ सदस्य अटाएका छन्।
प्रदेश २ सरकारको मन्त्रिपरिषद्को संख्याभन्दा पनि धेरै जना संघीय सरकारको मन्त्रिपरिषद्मा अटाउन सफल भएका छन्। प्रदेश २ सरकारको मन्त्रिपरिषद् भने मुख्यमन्त्रीसहित ११ सदस्यीय छ।
अझ रोचक के छ भने प्रदेश २ का ८ जिल्लाका सबै जिल्लाले मन्त्री पाएका छन्। ७ वटा प्रदेशमध्ये संघीय सरकारमा सबैभन्दा धेरै मन्त्री पाएर प्रदेश २ 'धनी प्रदेश'का रुपमा कहलिएको छ।
संघीय सरकारको मन्त्रिपरिषद्मा प्रतिनिधित्वको हिसावले कर्णाली र सुदूरपश्चिम प्रदेश सबैभन्दा पछाडि परेको छ। कर्णाली र सुदूरपश्चिम प्रदेशका १–१ जना मात्रै ओली नेतृत्वको मन्त्रिपरिषद्मा अटाएका छन्।
ओली क्याबिनेटमा प्रदेश २ बाट जनता समाजवादी पार्टी (जसपा)का ८ मन्त्री र एक राज्यमन्त्री छन्। जसपाको कोटामा सरकारमा सहभागी हुन सफल महिला, बालवालिका तथा जेष्ठ नागरिक राज्यमन्त्री रेणुका गुरुङ भने काठमाडौंबाट प्रतिनिधित्व गर्दै आएकी छिन्।
जसपाबाटै राजकिशोर यादवले बिहीबार साँझ ५ बजे उद्योग वाणिज्य तथा आपूर्ति मन्त्रीको शपथ लिएसँगै जसपाको कोटामा प्रदेश २ बाट ९ मन्त्री र १ राज्यमन्त्री भएका छन्।
यस्तै, एमालेबाट उपप्रधान तथा परराष्ट्र मन्त्री रघुवीर महासेठ (धनुषा क्षेत्र नम्बर ४ बाट निर्वाचित) तथा कानुन, न्याय तथा संसदीय मामिला मन्त्री लिलानाथ श्रेष्ठ (सिराह-३ बाट निर्वाचित) ले पनि मन्त्रिपरिषद्मा प्रदेश २ को प्रतिनिधित्व गरिरहेका छन्।
यस्तै, माओवादी केन्द्र परित्याग गरी प्रधानमन्त्री ओलीलाई साथ दिँदै एमाले प्रवेश गरेकी ज्वालाकुमारी साह (बारा) कृषि मन्त्री बनेकी छन्। प्रदेश २ बाट संघीय सरकारमा जसपा, एमाले र पूर्वमाओवादीका समेत गरी १२ मन्त्री र एक राज्यमन्त्री भएका छन्।
कुन मन्त्री कुन जिल्लाबाट प्रतिनिधित्व गर्छन्?
प्रदेश २ का ८ जिल्लामध्ये धनुषाबाट ३, पर्सा, बारा र सिराहबाट २/२ र महत्तोरी, सर्लाही, रौतहट र सप्तरीबाट १/१ जना मन्त्री भएका छन्।
उपप्रधान तथा सहरी विकास मन्त्री राजेन्द्र महतो धनुषा क्षेत्र नम्बर ३ बाट प्रतिनिधित्व गर्छन्। उनी जसपाका वरिष्ठ नेतासमेत हुन्।
जसपाकै कोटामा उर्जा, जलस्रोत तथा सिँचाइ मन्त्री बनेका सरत्सिंह भण्डारी महत्तोरी-२ बाट निर्वाचित भएका थिए। भण्डारी नेपाली राजनीतिमा सबैभन्दा बढी मन्त्री हुने नेतामा समेत पर्छन्। उनी हालसम्म १५ औं पटक मन्त्री भएका छन्।
भूमि व्यवस्था, सहकारी तथा गरिबी निवारण मन्त्री रहेका जसपा नेता लक्ष्मणलाल कर्ण पर्सा–४ बाट प्रतिनिधित्व गर्छन्। खानेपानी मन्त्री अनिल झा रौतहट क्षेत्र नम्बर १ बाट निर्वाचित भएका थिए।
पर्यटनमन्त्री उमाशंकर अरगरिया धनुषा क्षेत्र नम्बर क्षेत्र २ बाट प्रतिनिधित्व गर्छन्। खेलकुद मन्त्री एकबाल मियाँ बारा क्षेत्र नम्बर ४ बाट प्रतिनिधित्व गर्छन् भने महिला वालवालिका तथा जेष्ठ नागरिक मन्त्री चन्दा चौधरी सर्लाही जिल्लाबाट प्रतिनिधित्व गर्छिन्। श्रम, रोजगार तथा सामाजिक सुरक्षा मन्त्री विमल प्रसाद श्रीवास्तव पर्सा-२ बाट प्रतिनिधित्व गर्दै आएका छन्। उद्योग वाणिज्य तथा आपूर्ति मन्त्री नियुक्त भएका राजकिशोर यादव सिरहा क्षेत्र नम्बर ४ बाट प्रतिनिधित्व गर्छन्।
यस्तै, जसपाको कोटामा मन्त्रिपरिषदमा सहभागी भएका उर्जा, जलस्रोत तथा सिँचाइ राज्यमन्त्री चन्द्रकान्त चौधरी सप्तरी क्षेत्र नम्बर ३ बाट प्रतिनिधित्व गर्छन्।
एमालेबाट परराष्ट्र मन्त्री बनेका रघुवीर महासेठ धनुषा क्षेत्र नम्बर ४ बाट निर्वाचित र कानुन मन्त्री लिलानाथ श्रेष्ठ सिराह ३ बाट निर्वाचित हुन्।
पूर्वमाओवादी समुहबाट मन्त्री बन्न सफल ज्वालाकुमारी साह बाराबाट प्रतिनिधित्व गर्छिन्। २०७४ सालको प्रदेश सभा निर्वाचनमा उनी बारा क्षेत्र नम्बर ३ को (क)बाट प्रदेश सभामा निर्वाचित भएकी थिइन्। तत्कालीन नेकपा विभाजित भइ एमाले र माओवादी केन्द्र ब्यूँतिदा एमाले प्रवेश गरेकी उनलाई माओवादीले सांसदबाट हटाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766824868.png)
-1766819606.png)
-1764146706.png)
-1763721444.png)
-1766648928.png)
