काठमाडाैं- बेलायतको शाही परिवारमा एक सानो पाहुना आगमन भएकाे। बेलायतकी डच एण्ड डचेज अफ ससेक्स अर्थात प्रिन्स ह्यारी र पूर्व अभिनेत्री मेघन मार्कललाई पुत्री लाभ भएकाे हाे।
शुक्रबार (४ जून) मा क्यालिफोर्नियाको सान्ता बारबरा कटेज अस्पतालमा मेघनले छोरीलाई जन्म दिएकी हुन्।
यो जोडीले महारानी एलिजाबेथ र ह्यारीकी दिवंगत आमा राजकुमारी डायनाको नाममा छोरीको नाम लिलिबेट ‘लिली’ डायना माउन्टबेटन–विन्डसर राखेका छन्।
एलिजाबेथको बाल्यकालको नाम लिलबेट हो। बकिंघम प्यालेसले महारानी एलिजाबेथ द्वितीय उनकी नातिना लिलीको जन्मसँगै अत्यन्तै खुशी रहेकाे जनाएकाे छ।
बकिङ्घम प्यालेसले भन्यो, ‘रानी, प्रिन्स अफ वेल्स, डचेज अफ कर्नवालसहित ड्युक र डेचज अफ केम्ब्रिजलाई यसबारे जानकारी दिइएको छ र खबर पाएपछि सबैजना निकै दङ्ग छन्।’
लिली स्थानीय समयानुसार शुक्रबार बिहान १०ः४० मा जन्मिएकी हुन्। जन्मका बेला उनको तौल लगभग साढे तीन केजी रहेको बताइन्छ।
आइतबार ६ जूनमा नवजात शिशुको तस्वीर बिना आधिकारिक घोषणा गरियो। ‘आमा र शिशु दुबैको स्वास्थ्य राम्रो छ,’ एक संयुक्त बयान जारी गर्दै यी दुईले जानकारी दिए।
लिली रानीकी ११ औं पनातिनी हुन् र राजगद्दीकी आठौं उत्तराधिकारी हुन्। यसको अर्थ, सन् १९६० मा जन्मिएका बेला उत्तराधिकारीको सूचीमा दोस्रो स्थान पाएका प्रिन्स एन्ड्र्यू नवौं स्थानमा धकेलिएका छन्।
प्रिन्स अफ वेल्स, प्रिन्स ह्यारीका पिता र डचेज अफ कर्नवाल क्यामिलियाले ट्वीटमा भनेका छन्, ‘ह्यारी, मेगन र आर्चीलाई लिलीबेट डायनाको आगमनमा बधाई छ। यो विशेष परिस्थितिमा उनीहरुको सुस्वास्थ्यको कामना गर्दछौं।’
ड्युक र डचेज अफ केम्ब्रिज अर्थात् ह्यारीका दाजु भाउजुले भने, ‘हामी बेबी लिलीको आगमनको खबरले निकै खुसी र उत्साहित छौं।’
बेलायतका प्रधानमन्त्री बोरिस जोनसनले यो जोडीलाई बधाईसहितको शुभकामना व्यक्त गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766673313.png)
-1764146706.png)
-1766648928.png)
-1763721444.png)
