काठमाडाैं– प्रधान न्यायाधीश चोलेन्द्र शमशेर राणाले वरिष्ठताका आधारमा संवैधानिक इजलास गठन गरेका छन्। राणाले विवादका बीच पहिलो सुनुवाइ तोकेको संवैधानिक इजलासमा न्यायाधीशहरु दीपककुमार कार्की, मीरा खड्का, ईश्वरप्रसाद खतिवडा र आनन्दप्रसाद भट्टराई अटाएका छन् ।
वरिष्ठताका आधारमा न्यायाधीशद्वय हरिकृष्ण कार्की र विश्वम्भरप्रसाद श्रेष्ठ इजलासमा पर्नुपर्ने भए पनि कार्कीले यसअघि नै प्रतिनिधि सभा विघटनविरुद्धको सुनुवाइबाट आफूलाई अलग गरेका र श्रेष्ठ विरामी भएकाले राणाले उनीहरुको ठाउँमा त्यसपछिको वरिष्ठताक्रममा रहेका खतिवडा र भट्टराईलाई राखेका हुन्।
जेठ ७ गते मध्यरातमा भएको प्रतिनिधि सभा विघटन विरुद्ध संवैधानिक इजलासमा ३० थान रिट निवेदन रहेका छन्। विपक्षी गठबन्धनका तर्फवाट १४६ सांसदले आफै उपस्थित हुँदै रिट दायर गरेका छन्। यसअघि जेठ १४ गते पहिलो सुनुवाइका लागि संवैधानिक इजलास तोकिए पनि न्यायाधीधबारे विवाद भएपछि सुनुवाइ हुन सकेन।
प्रधान न्यायाधीश राणाले तोकेको संवैधानिक इजलासका न्यायाधीशहरु बमकुमार श्रेष्ठ र तेजबहादुर केसीको विषयमा कानुन व्यवसायीहरुले प्रश्न उठाएका थिए। उनीहरुले नेकपा विवादसम्वन्धी मुद्दा सुनुवाइ गरेकाले संवैधानिक इजलासमा बस्न नमिल्ने जिकीर कानुन व्यवसायीले गरेका थिए।
यो विवादकै बीचमा १८ गते न्यायाधीशद्धय दीपककुमार कार्की र आनन्दमोहन भट्टराईले आफूहरु इजलासबाट अलग भएको राय पेश गरेका थिए। प्रश्न उठेका न्यायायाधीशहरु केसी र श्रेष्ठले इजलासमा बस्न मिल्ने राय दिएपछि उनीहरुले अलग राय राखेका थिए। उक्त विवादपछि राणाले नयाँ इजलासमा पेशी तोक्ने बताएका थिए। राणाले सर्वोच्च अदालत बार एशोसिएसनसँग बरिष्ठताका आधारमा आफूले इजलास तोक्ने सहमति समेत गरेका थिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
