काठमाडौं– नेकपा एमालेका वरिष्ठ नेता माधवकुमार नेपालले आफ्नो समूहले गठन गरेको समानान्तर जिल्ला कमिटीका नेताहरुलाई अध्यक्ष केपी शर्मा ओली पक्षसँग संवादका लागि एक हप्ताको समयवाधि छुट्याइएको र त्यसपछि पार्टी पुनर्गठनमा अघि बढ्ने बताएका छन्।
नेता नेपालले ओली सुध्रिने सम्भावना आफूले देख्दै नदेखेकाले पुनर्गठनको विकल्प नभएको समेत उल्लेख गरेका छन्।
नेपालले शनिबार बिहान ११ बजेदेखि सबै जिल्लाका आफूनिकट कमिटीका अध्यक्ष र सचिवसँग भर्चुअल छलफल गरेका थिए।
छलफलमा सहभागी एक जिल्ला अध्यक्षले नेपालको भनाइ उद्धृत गर्दै नेपाल लाइभसँग भने, 'केपी ओली एकपछि अर्को गरी दक्षिणपन्थी भासमा भासिए। सुध्रिने सम्भावना म त २०० प्रतिशत देख्दिनँ। केही साथीहरुले देख्नुभएको छ भने उहाँहहरुलाई एक हप्तासम्म सम्भावना देख्नुस् भनेका छौं। त्यसपछि पर्खन सकिन्न।'
नेता नेपालले ओलीपक्षसँग संवाद गरिरहेका घनश्याम भुसाल, सुरेन्द्र पाण्डे, गोकर्ण विष्ट र योगेश भट्टराईलाई संकेत गर्दै यस्तो बताएका थिए।
बिहीबार र शुक्रबार आफ्नो पक्षका केन्द्रीय सदस्यहरुको बैठकमा चारैजनाले अन्तिम समयसम्म एकताको पहल गर्नुपर्नेमा जोड दिएका थिए।
नेपालले यो आफूले पनि बनाएको पार्टी भएकाले एकतावद्ध बनाउन आफूले पनि चाहेको तर त्यो सम्भावना नदेखिएको समेत जिल्लाका नेताहरुलाई सुनाए।
'केही नेता, केही युवा साथीहरुलाई पार्टी एकताका पक्षमा उभिने हो भने एक हप्ता दिऔं भनेका छौं', उनले भने, 'मलाई त ओली सुध्रिन्छन् भन्ने नै लाग्दैन, सुध्रिन्छन् भन्ने लाग्ने साथीहरुलाई एक हप्ताको मौका दिएको हो।'
उनले एमालेमा कोही घरमुली र कोही आयातीत नभएकाले सहअस्तित्वसहित मात्र एमाले अघि बढ्न सक्ने बताए।
जिल्ला पदाधिकारीसँग भएको छलफलमा नेता नेपालले केन्द्रीय कमिटी बैठकले गरेका निर्णयलाई शनिबारको स्थायी कमिटी बैठकले अनुमोदन गर्ने बताए। ओली सच्चिएर आए पार्टी एकताको सम्भावना रहेको उनले बताए।
‘शुक्रबार बसेको केन्द्रीय कमिटीले एकताका लागि केही शर्त पारित गरेको छ। स्थायी कमिटीको बैठकले त्यसलाई अनुमोदन गरी ओलीलाई पठाउँछौं’, नेता नेपालले भर्चुअल बैठकमा भने,‘त्यसमा उहाँहरु सहमत भए ठीक छ। होइन भने कम्युनिष्ट आन्दोलन जोगाउन जुनसुकै बाटो पनि जानुपर्छ।’
छलफलमा नेपालले पार्टी अध्यक्ष ओलीसँग भएका अन्तरविरोधका कारणहरु विस्तृतमा खुलाएका थिए। ‘हामीले उहाँलाई (ओली) लाई असहयोग हुने गरी कुनै कदम उठाएका थिएनौं। उहाँले गलत कदम चालेपछि मात्रै त्यसलाई काउन्टर गरेका हौं’, नेपालले भने।
भर्चुअल बैठकमा नेता नेपालले अन्तर्राष्ट्रिय कम्युनिस्ट आन्दोलनमा आएका उतार चढाव तथा आन्दोलनमा आएका समस्याबारे समेत टिप्पणी गरेका थिए। त्यसक्रममा उनले नेपालको कम्युनिस्ट आन्दोलनका मुख्य मुख्य घटनाक्रमपनि सुनाएका थिए।
छलफलमा सहभागी अधिकांश जिल्ला अध्यक्षहरुले ओलीबाट एमाले कुनै हालतमा नजोगिने भन्दै तत्काल पार्टी पुनर्गठन गरेर अघि बढिहाल्नुपर्ने बताएका थिए।
उनीहरुले संकटका बेला मात्र ओलीले वार्ताको कार्ड फ्याँक्ने गरेको उल्लेख गर्दै वार्तामा अब अल्मलिन नहुने भन्दै ध्यानाकर्षण गराएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1698918398-1698987692.png)
-1764146706.png)
