काठमाडौं– लोक–रक ब्यान्ड नेपथ्यले आफ्नो दसौं एल्बममा समावेश छैटौं गीत ‘कुरुप अनुहार हो’ को म्युजिक भिडियो सार्वजनिक गरेको छ।
यो गीत सरुभक्तको शब्द र विक्रम गुरुङको संगीतमा तयार भएको हो। यी दुवै स्रष्टा ८० को दशकको सुरुवातमा पोखराबाट काठमाडौं आएर त्रिभुवन विश्वविद्यालयमा पढ्न थाल्दा त्यतिबेलैको सत्संगमा यो गीत तयार भएको थियो।
यसको शब्दमा एक्लो र परित्यक्त महसुस गर्ने तन्नेरी भाव अटाएको कवि एवं गीतकार सरुभक्त बताउँछन्।
‘यो गीतको पुनर्जागरण गराएकोमा म नेपथ्यलाई धन्यवाद दिन्छु’, एक वर्षअघि यही गीत पहिलो पटक टुँडिखेलमा प्रस्तुत भइरहँदा त्यहाँ उपस्थित गीतकार सरुभक्तले भनेका थिए, ‘यस गीतमा कोरसको जुन प्रकारले प्रयोग गरिएको छ, त्यसले मलाई धेरै छोयो।’
नेपथ्यले गत वर्ष नै यो गीत हङकङको कन्सर्टमा पनि प्रस्तुत गरेको थियो। त्यस क्रममा उतै बस्दै आएका संगीतकार गुरुङले यो गीत पहिलो पटक सुनेर नौलो स्वरुपमा महसुस गरेका थिए।
यस गीतलाई नेपथ्यको प्रस्तुतिमा सुनिरहँदा आफ्नो मन पुराना दिनतिर फर्किएको गुरुङले बताएका थिए।
‘कीर्तिपुरमा विश्वविद्यालय पढ्दा सरु र म सँगै बसेर यसलाई तयार पारेका थियौं’, उनले भने, ‘नेपथ्यले यसलाई उसकै शैलीमा प्रस्तुत गरे पनि म यसमा आफ्नो धड्कन महसुस गरिरहेको छु।’
कुनै समय अरुण थापाको स्वरमा ‘आँखाको निद चोरी लाने’ र ‘भुलूँभुलूँ लाग्यो मलाई सपनीमा’ जस्ता गीतहरु सिर्जना गरेका गुरुङ तीन दसकयता हङकङमा शिक्षण कर्म गरिरहेका छन्।
नेपथ्यले यो गीत तयार पारेयता आफ्नो स्थापनाको रजत जयन्ती मनाउने क्रममा वर्षभरि ‘कुरुप अनुहार हो’लाई कन्सर्टकै पहिलो गीतका रुपमा प्रस्तुत गर्दैआएको छ। म्युजिक भिडियोमा प्रयोग गरिएका दृश्यहरु ब्यान्डले गत वर्ष आफ्नो अस्ट्रेलिया र न्युजिल्यान्ड कन्सर्टको समयमा खिचिएको हो।
गीतको भिडियो ‘क्लोज अप’ दृश्यबिना प्रयोगको रुपमा तयार पारिएको छ।
‘हामीले यसमा वाइड एंगल दृश्यहरुलाई मात्रप्रयोग गरेकाछौं’, यस भिडियोका निर्माता तथा नेपथ्यलाई प्रवद्र्धन गर्दैआएको नेपालयका किरणकृष्ण श्रेष्ठ भन्छन् ‘म्युजिक भिडियो हेर्दैगर्दा प्रत्यक्ष कार्यक्रम हेर्दाको अनुभूति मिलोस् भनेर सक्दो प्रयास गरेका छौं।’
नयाँ गीतको भिडियो सार्वजनिक भएको सन्दर्भमा नेपथ्यका मुख्य गायक अमृत गुरुङ भन्छन्, ‘कुरुप अनुहार हो गाउँदै गर्दा मञ्चमा म जति आनन्दित महसुस गर्छु, त्यस्तै आनन्द अब यसका श्रोता र दर्शकलाई पनि मिलोस्।’
नेपथ्यमा यतिबेला अमृतलाई ड्रमसेटमा ध्रुव लामा, किबोर्डमा सुरज थापा, बेस गितारमा सुविन शाक्य, गितारमा निरज गुरुङ र मादलमा शान्ति रायमाझीले सघाउँदै आएका छन् ।
नेपथ्यको दसौं एल्बमबाट यसअघि ‘कोसीको पानी’, ‘शिरफूल’, ‘रामारामा’, ‘हामी नेपाली’ र‘सम्झिराख’बोलका गीतहरुको म्युजिक भिडियो सार्वजनिक भइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790590624.png)
-1786602170.png)
