फाइल तस्वीर।
काठमाडौं- जनता समाजवादी पार्टी (जसपा)को महन्थ ठाकुर-राजेन्द्र महतो पक्षका नेताहरू मन्त्रालयको जिम्मेवारी टुंग्याउन प्रधानमन्त्री केपी शर्मा ओलीलाई भेट्दैछन्।
प्रधानमन्त्री ओलीलाई भेट्न अध्यक्ष महन्थ ठाकुरसहित नेताहरु राजेन्द्र महतो, राजकिशोर यादव, अनिल झा दिउँसो बालुवाटार जान लागेको महन्थनिकट एक नेताले बताए।
‘मन्त्रालयको जिम्मेवारी, त्यसमा केही हेरफेर र शपथ ग्रहणको समय निश्चित गर्न जाँदै हुनुहुन्छ’, ती नेताले भने। शपथ ग्रहण पनि आजै हुनसक्ने जानकारी पाएको उनले बताए।
प्रधानमन्त्री ओलीले महन्थ–राजेन्द्र पक्षलाई आठ मन्त्रालय र दुई राज्यमन्त्री दिने निश्चित गरिसकेका छन्। गृहमन्त्रालय भने जसपाले नपाउने भएको छ।
गृह मन्त्रालय प्रधानमन्त्रीले जसपालाई नदिने निश्चित गरिसकेको उनले बताए। महन्थ–राजपा पक्षबाट राजेन्द्र महतोको नेतृत्वमा सरकारमा जाने बताइएको छ। शीर्ष तहका सबै जसो नेताले मन्त्रालय पाउने भएका छन्।
शुक्रबारको भेटमा प्रधानमन्त्रीसँग जसपा माग र मुद्दा सम्बोधनसँगै सरकारमा जाने विषयमा समेत छलफल हुने ओली निकट एक नेताले बताए।
‘जसपाका अधिकांश माग र मुद्दा सम्बोधन भइसेका छन्। ८ मन्त्रीसहित २ राज्य मन्त्री लिने सहमति भइसकेको छ’ ती नेताले भने, ‘जसपाले आफ्नो पार्टीमा छलफल गरेर टुंग्याउन मात्रै बाँकी छ। सकेसम्म आज नभए केही दिनभित्रै जसपा सरकारमा सहभागी हुन्छ।’
जसपाका नेताहरूले बिहीबार समेत प्रधानमन्त्री ओलीलाई भेटेर छलफल गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767851709.png)
-1764146706.png)
-1767770856.png)
