राजविराज– सप्तरीको रुपनी गाउँपालिकामा १७ महिनाअघि उद्घाटन गरिएको पूर्व क्षेत्रीय प्रहरी अस्पताल (ठाकोदेवी–जोगेन्द्र भगत) विद्युत र खर्च अभावका कारण अहिलेसम्म सञ्चालनमा आउन सकेको छैन। अस्पताल सञ्चालनमा नआउँदा दाता परिवार खिन्न छन्।
राजविराज निवासी जोगेन्द्र भगतले करिब १० करोड रुपैयाँ मूल्य बराबरको २ बिगाह ५ कठ्ठा जग्गा र त्यसमा बनेको तीन तले भवन २०७३ साउन ३ मा अस्पताल सञ्चालनका लागि प्रहरीलाई हस्तान्तरण गरेका थिए। प्रतिबद्धता अनुसार तत्कालीन प्रहरी महानिरीक्षक उपेन्द्रकान्त अर्यालले २०७३ माघ ३ मा अस्पतालको उदघाटन पनि गरे। तर, उपकरण सञ्चालनका लागि बिजुली तथा सेवा सञ्चालनका लागि खर्च नहुँदा अस्पताल प्रयोग बिहीन छ।
अस्पताल उद्घाटन गर्दा ट्रमा सेन्टर सञ्चालनको प्रतिबद्धता समेत जनाएको प्रहरीले प्राथमिक उपचार समेत नदिएको भन्दै स्थानीयबासीले गुनासो गरेका छन्।
गत शुक्रबार अस्पतालमै आयोजित पत्रकार सम्मेलनमा रुपनी गाउँपालिकाका अध्यक्ष हरेराम यादवले दुर्घटना हुँदा अस्पतालमा सामान्य प्राथमिक उपचार समेत गर्न नसकिएको बताए। ‘पुर्वपश्चिम राजमार्ग छेउमै अस्पताल छ,’ यादवले भने, ‘आसपासमा सवारी दुर्घटना भइरहन्छ, तर उपचार गर्न सकिएको छैन।’
अस्पतालबाट प्रहरी लगायत सर्वसाधारण समेतको उपचार गर्ने उद्देश्य राखिए पनि विद्युत् अभाव र सञ्चालनका लागि आवश्यक खर्च नहुँदा सेवा दिन नसकिएको उनको गुनासो छ। ‘प्राथमिक उपचारका सबै उपकरण र स्वास्थ्यकर्मी समेत अस्पतालमा छन्,’ अध्यक्ष यादवले थपे, ‘तर, उपचारका लागि आउने बिरामीले निरास भएर फर्किनुपर्ने अवस्था छ।’
अस्पतालमा उपचारका लागि डेढ करोड लागतका विभिन्न उपकरण राखिएको भए पनि अहिलेसम्म प्रयोगमा आएका छैनन्। बिहान खोल्ने, सफा गर्ने र बेलुका भएपछि बन्द गर्ने बाहेक अस्पतालमा उपचारका कुनै सेवा सञ्चालनमा आउन नसकेको अस्पतालकै कर्मचारी बताउँछन्। कामै नलाग्ने भएपछि अस्पतालको स्टेचरसमेत खाद्यान्न राख्नका लागि प्रयोग गरिएको छ।
अस्पतालका उपकरण सञ्चालनका लागि बिद्युत् जडान गर्न गाउँपालिकाले २ लाख ५० हजार रुपैयाँ उपलब्ध गराउँदा समेत सेवा सुरु गर्न नसकिएको अध्यक्ष यादवले बताए। ‘विद्युत् कार्यालयले सुरुमा तोकेको रकम हामीले जम्मा गर्यौं, त्यसपछि फेरि पुगेन भनेपछि २०–२५ हजार थप्यौं,’ यदवले भने, ‘फेरि पनि रकम अपुग भयो भन्न थालेपछि एउटै कामका लागि कति पटक लगानी गर्ने? भन्दै गाउँ कार्यसमितिका पदाधिकारी समेत बिच्किए।’
विद्युत् प्राधिकरणले पटक–पटक लागत रकम थप गर्नाले पनि अस्पताल सञ्चालनमा समस्या भएको उनले बताए।
अस्पताल प्रमुख डा आदर्श खनालले भवन तथा आवश्यक उपकरण हुँदाहुँदै पनि उपचार सेवा सञ्चालन गर्न नसकेको स्विकारे। ‘बिरामीको उपचार गर्नै नपाएपछि दिनभरि धुमधुम्ती बस्नु परेको छ,’ उनले भने, ‘आएका बिरामी समेत फर्काउनुपर्दा ग्लानि हुन्छ।’
२ डाक्टर, १ स्टाफ नर्ससहित २७ जना स्थास्थ्यकर्मी र सुरक्षाकर्मी कार्यरत अस्पताल सञ्चालनका लागि प्रहरी प्रधान कार्यालयले बेवास्ता गरेको दाता परिवारका जोगेन्द्र भगतको आरोप छ। प्रहरीको बेवास्ताका कारण आफूले उपलब्ध गराएको जग्गा र भवनसमेत उपलब्धि विहीन भएको भन्दै उनले खिन्नता प्रकट गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
