फाइल तस्वीर।
काठमाडौं- नेपाली कांग्रेसको महाधिवेशन समयमा नहुने आशंका गर्दै संस्थापतइतर समूहका नेताहरुले सक्रियता बढाएका छन्। उनीहरुले सभापति शेरबहादुर देउवामाथि समयमै महाधिवेशन गर्न दबाब बढाएका हुन्।
भदौ ७ देखि १० सम्मका लागि तय भएको महाधिवेशन सम्पन्न गर्न पार्टी सभापति देउवा पक्षले कम चासो देखाएको वरिष्ठ नेता रामचन्द्र पौडेल र नेता कृष्णप्रसाद सिटौलाको बुझाइ छ। संविधानले दिएको अधिकार समेत प्रयोग गरी बढाइएको ६ महिनाको अवधि भदौमा सकिँदैछ।
महाधिवेशन समयमा हुन सकेन भने दलको वैधानिकताका साथै अस्तित्वमा समेत प्रश्न उठ्ने छ। महाधिवेशनका लागि सभापतिको सार्थक पहल हुन नसकेको जनाउँदै संस्थापन इतरका नेताहरु आन्तरिक छलफलमा जुटेका हुन्।
नियमित समय जस्तै परिस्थिति नभएकाले मोडालिटी परिवर्तन गरेर भएपनि महाधिवेशन गर्नुपर्ने तर्क संस्थापनइतरमा उठेको छ। त्यसकै लागि बुधबार पौडेल पक्षका नेताहरु भर्चुअल छलफलमा जुटेका थिए। बिहीबार (आज) नेता डा शेखर कोइरालाको अगुवाइमा महाधिवेशन केन्द्रित छलफल राखिएको छ। महाधिवेशन समयमा गर्नका लागि मोडालिटीका बारेमा छलफल गरिने जनाइएको छ।
कोइरालाले आयोजना गरेको भर्चुअल संवादमा नेताहरु गगन थापा, प्रदीप पौडेल, चन्द्र भण्डारी, सरिता प्रसाईं, बद्री पाण्डे, गुरुराज घिमिरे, जीवन परियार, धनराज गुरुङ, रामकृष्ण यादव, किरण यादव, अमरेश कुमार सिंह, गोबिन्द पोखरेल लगायत सहभागी हुने बताइएको छ। क्रियाशील सदस्यता सम्बन्धी विवाद भएको स्थानमा १३औं महाधिवेशनकै प्रतिनिधि कायम राखेर भए पनि समयमै महाधिवेशन गर्नुपर्ने नेता कोइरालाको भनाइ छ। महाधिवेशन गर्नका लागि पदाधिकारीको जिम्मेवारी बढी भए पनि भूमिका भने नदेखिएको उनले गुनासो गरे।
बुधबार भएको संस्थापनइतरका नेताहरुको जुम मिटिङमा विवादित स्थानमा १३औं महाधिवेशनकै प्रतिनिधि कायम गरी महाधिवेशन समयमा गर्नुपर्ने विषय उठेको छ। बैठकमा सहभागी नेता प्रदीप पौडलले भने, ‘विवादित स्थानमा १३औं महाधिवेशनका प्रतिनिधि कायम गरौँ भन्ने विषय उठेको थियो। अहिलेको कार्यतालिका कार्यान्वयन गर्न सकिने राय पनि उठेको थियो। केही नेताले १३औं महाधिवेशनको क्रियाशील सदस्यबाट गरौँ पनि भन्नुभएको थियो।’
बुधबारको बैठकमा वरिष्ठ नेता पौडेल, महामन्त्री शशांक कोइराला, नेताहरु प्रकाशमान सिंह, अर्जुननरसिंह केसी, मिनेन्द्र रिजाल, गगन थापा, प्रदीप पौडेल लगायको सहभागिता थियो।
यसअघि समयसमयमा विशेष महाधिवेशनको कुरा उठाउँदै आएका वरिष्ठ नेता पौडेलले बुधबार उक्त विषयलाई उठाएनन्। महाधिवेशनका लागि सभापतिलाई आफूले दबाब दिइरहेको उनको भनाइ थियो। उनले अन्य नेताहरुसँग गुनासो राख्दै भने, ‘मैले त सभापतिलाई भनेको भन्यै छु। साथीहरुले भन्नुहुन्न।’
महामन्त्रीले सक्रियता नदेखाएको पौडेलको गुनासो थियो। ‘महामन्त्रीजी, तपाईं पनि सभापतिलाई भन्नुस्। महाधिवेशन कसरी गर्ने?’, शशांक कोइरालालाई वरिष्ठ नेता पौडेलको प्रश्न थियो।
महाधिवेशन गर्नका लागि सभापतिलाई दबाब दिन सबैतिरबाट आवश्यकता रहेको पौडेलले बताए। बैठकको अन्त्यमा बोलेका पौडेलले सभापतिसँग कुरा गर्न महामन्त्री कोइरालालाई आग्रह गरेका थिए।
महामन्त्री डा शशांक कोइरालाले १३औं महाधिवेशनकै क्रियाशील सदस्यबाट महाधिवेशन गर्न उपयुक्त हुने बताएका थिए। अहिले बनेका क्रियाशील सदस्यतालाई १५औं महाधिवेशनमा आधिकारिता दिन सकिने उनको आशय थियो। जिल्ला जिल्लाबाट केन्द्रमा मत दिन सकिने उनले विकल्प देखाएका थिए।
नेता प्रकाशमान सिंहले वर्तमान कार्यतालिका अनुसार नै समयमा महाधिवेशन गर्न सकिने बताए। क्रियाशील सदस्यता छानबिन समितिलाई सबैले सहयोग गर्नुपर्ने उनको राय थियो। वरिष्ठ नेता पौडललाई चेतावनीको शैलीमा नेता अर्जुननरसिंह केसीले भने, ‘सहमति गर्ने भनी तपाईं र शेरबहादुर मिले पनि मैले मान्दिनँ। महाधिवेशन प्रक्रियागत ढंगले हुनुपर्छ। बरु १३औं महाधिवेशनका प्रतिनिधिबाट विशेष महाधिवेशन गरौं। सहमतिका नाममा प्रक्रिया मिच्ने काम नगरौँ।’
संवैधानिक प्रक्रिया अनुसार नै कार्यान्वयन हुने गरी अघि बढ्नुपर्ने केसीको राय थियो। अहिलेको कार्यतालिका अनुसार महाधिवेशन हुन नसक्ने उनको निचोड थियो। संस्थापन पक्ष कार्यतालिका कार्यान्वयन गर्न तयार नभएको उनको बुझाइ थियो। अर्का नेता मिनेन्द्र रिजालले क्रियाशील सदस्यता टुंगाएर पछि मात्रै अरु विषयमा छलफल गर्नुपर्नेमा जोड दिए।
पूर्वस्वास्थ्यमन्त्री समेत रहेका गगन थापाले चिकित्सकहरुको भनाइ अनुसार साउनको अन्त्यसम्म संक्रमणको अवस्था रहिरहने बताएका थिए। त्यसबेलासम्म महाधिवेशनका लागि काम गर्न सकिने परिस्थिति नहुने उनको तर्क थियो। पार्टी बचाउने र जोखिमबाट पनि बच्ने उपाय खोज्नुपर्ने उनले सुझाए।
६० जिल्लाबाट क्रियाशील सदस्यको नाम आएको भनिए पनि ती जिल्लाका कतिपय क्षेत्रबाट नाम नआएको बताइएको छ। तुलनात्मक रुपमा करिब पाँच लाख क्रियाशील सदस्यता कम विवादित रहेका छन्। सूचीकृत भएका थप २ लाख ७५ हजार क्रियाशील सदस्यमा बढी विवादित छन्।
एक लाख ७५ हजार क्रियाशील सदस्य सूचीकृत हुनै पाएका छैनन्। क्रियाशील सदस्यको अन्तिम नामावली नआइसकेको हुँदा छानबिन समितिले आफ्नो कार्य सुरु गर्न सकेको छैन। छानबिन समितिले अन्तिम नामावली प्रकाशन गरेसँगै तल्लो तहका अधिवेशन सुरु हुन्छन्।
त्यससँगै केन्द्रीय महाधिवेशनको लागि ढोका पनि खुल्छ। छानबिनका लागि नयाँ विधि तय गरी त्यसलाई कडाईका साथ कार्यान्वयन गरे एक महिना भित्रमा सदस्यको टुंगो लगाउन सकिने छानबिन समितिका सदस्य पौडेलको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
