काठमाडौं– जनता समाजवादी पार्टी(जसपा) को उपेन्द्र यादव–बाबुराम भट्टराई पक्ष र महन्थ ठाकुर–राजेन्द्र महतो पक्षले एकअर्कालाई गरेको निष्कासनको पत्रबारे निर्वाचन आयोगले अध्ययन गरिरहेको जनाएको छ।
प्रमुख निर्वाचन आयुक्त दिनेश थपलियाले जसपाबाट दुईवटा पत्र आएको र त्यसबारे अध्ययन भइरहेको नेपाल लाइभलाई जानकारी दिए।
जसपाको ठाकुर–महतो पक्षले मंगलबार अध्यक्ष यादवलाई पार्टीबाट निष्कासन गरेको पत्र निर्वाचन आयोगमा बुझाएको थियो भने यादव–भट्टराई पक्षले अध्यक्ष ठाकुरसहित नेताहरु महतो, लक्ष्मणलाल कर्ण, सर्वेन्द्रनाथ शुक्ललाई पार्टीबाट निष्कासन गरेको पत्र निर्वाचन आयोगमा बुझाएको थियो।
दुबै पक्षबाट एक अर्कालाई हटाएको र निर्णय अभिलेखीकरण गरिदिँनू भन्दै निवेदन आएको भन्दै प्रमुख आयुक्त थपलियाले यसबारे आयोगले अध्ययन गरिरहेको बताए।
‘राजनीतिक दलसम्बन्धी ऐनको दफा ५१ बमोजिम उहाँहरुले जानकारी दिनुपर्छ भन्ने छ, त्यसअन्तर्गत आफूहरुले गरेको निर्णय अभिलेखिकरण गरिदिनू भनेर निवेदन दिनुभएको छ,’ उनले भने, ‘यदी कुनै विवाद छैन, स्वभाविक रुपले अधिवेशन हुन्छ, निणय हुन्छ र आउँछ भने हामीले अभिलेखीकरण गर्ने हो। केही प्रष्ट भएन भने हामीले त्यसबारे अध्ययन गर्छौं।’
तर पार्टीमा विवाद देखिए दफा ५१ अनुसार अघि बढ्न नमिल्ने उनले बताए। पार्टीमा प्रस्ट रुपमा विवाद देखिए दफा ४३ अनुसार अघि बढ्नु पर्ने उनको भनाइ छ। दफा ४३ मा दुई वा दुई भन्दा बढी दल र एउटै दलका दुई वा दुई भन्दा बढी पक्षबीच विवाद भयो भने त्यो विवाद समाधानबारे उल्लेख गरिएको उनले जानकारी।
‘दुई पक्षबीच विवादित कुरा आएकोले दफा ५१ अनुसार सम्बोधन हुन नसक्ने भएकाले दफा ४३ अनुसार आउनुस् भनेर सम्भवत भन्नु पर्छ होला,’ प्रमुख आयुक्त थपलियाले भने, ‘एक दुई भित्रमा बोर्डले यसबारे टुंगो लगाउँछ।’
प्रधानमन्त्री केपी शर्मा ओलीले २०७६ वैशाख ८ मा दल विभाजन सम्बन्धी अध्यादेश ल्याएपछि वैशाख १० गते राति जसपा गठन भएको थियो। केन्द्रमा एकता भए पनि प्रदेश, जिल्ला र स्थानीय तहसहित जनवर्गीय संगठनको एकताले पूर्णता नपाउँदै जसपा विभाजनमा पुगेको छ।
तत्कालीन नेकपामा अप्ठेरोमा परेपछि प्रधानमन्त्री ओलीले मधेसकेन्द्रित दललाई फुटाएर सत्ता जोगाउने रणनीतिका साथ अध्यादेश जारी गरेका थिए। त्योसँगै तत्कालीन राष्ट्रिय जनता पार्टी (राजपा) र समाजवादी पार्टीबाट केही सांसदलाई आफ्नो पक्षमा पारेर मन्त्री बनाउने योजना बनाएपछि ती दुई पार्टीबीच हतारहतार एकता घोषणा भएको थियो। ओलीकै कारण गठन भएको जसपा कालान्तरमा उनलाई नै समर्थन गर्ने वा नगर्ने विषयलाई लिएर विभाजनमा पुगेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1764146706.png)
