काठमाडौं- जनता समाजवादी पार्टीले केन्द्रीय कार्यकारिणी अध्यक्ष महन्थ ठाकुर, वरिष्ठ नेता राजेन्द्र महतो, केन्द्रीय कार्यकारिणी सदस्यद्वय सर्वेन्द्रनाथ शुक्ल र लक्ष्मणलाल कर्णलाई पार्टीबाट निष्कासन गरेको छ।
सोमबार बसेको केन्द्रीय कार्यकारिणी समितिको बैठकले उनीहरुलाई पार्टीबाट निष्कासन गरेको प्रचार विभाग प्रमुख डम्बर खतिवडाद्वारा जारी विज्ञप्तिमा उल्लेख छ। निष्कासन गर्ने पक्षको नेतृत्व बाबुराम भट्टराई र उपेन्द्र यादवले गरिरहेका छन्।
‘प्रधानमन्त्री केपी शर्मा ओलीको सरकार प्रारम्भदेखि नै लोकतन्त्र, गणतन्त्र, संघीयता, समावेशीता, धर्मनिरपेक्षतालगायत संवैधानिक मूल्य मान्यताप्रति सकारात्मक थिएन। जनताको निर्वाचित प्रतिनिधिसभालाई दुई/दुई पटक विघठन गर्ने जस्तो अलोकतान्त्रिक, असंवैधानिक, निरंकुश, अधिनायकवादी, प्रतिगमानकारी कदम उनले चाले। यस्तो अवस्थामा ओली सरकारलाई साथ दिने कल्पनासमेत हाम्रो पार्टीले गर्न सक्दैनथ्यो। तर महन्थ ठाकुरलगायत उपरोक्त नेताहरुले ओली सरकारले मधेशका माग मुद्दा सम्बोधन गर्यो भन्ने भ्रम छर्दै संकटग्रस्त ओली सरकारलाई काँध थाप्ने र प्रतिगमनको मतियार बन्ने काम गरे। बारम्बार आग्रह गर्दा पनि गल्ति सच्याउने काम भएन,’ विज्ञप्तिमा भनिएको छ।
निष्कासन गरिएका नेताहरु केही समययता पार्टीको नीति, सिद्धान्त, विचार, अजेण्डा र कार्यदिशाविपरीत, पार्टी स्थापना र एकताको भावनालाई हानिनोक्सान पुग्नेगरी, पार्टी विधान र नियमावलीले निर्दिष्ट गरेका लोकतान्त्रिक मूल्य मान्यता, विधि, पद्धति र राजनीतिक संस्कृतिको बर्खिलाप हुनेगरी, गुटगत गतिविधि गर्ने गराउने कार्यमा संलग्न रहेको विज्ञप्तिमा भनिएको छ।
‘जेठ ८ र ९ गतेको केन्द्रीय कार्यकारिणी समितिको बैठक समझदारीमै बोलाइएको थियो। २०७८ जेठ ८ गते पार्टी केन्द्रीय कार्यकारिणीको बैठकले सर्वसम्मतले उनीहरुमाथि स्पष्टीकरण सोध्ने, यथोचित उत्तर नआएमा पार्टी विधान र नियमावलीबमोजिम कारबाहीको थप प्रक्रिया अगाडि बढाउने निर्णय गर्यो। सोहीबमोजिम पार्टी केन्द्रीय कार्यालयले मिति २०७४।०२।११ गते पहिलोपटक तीनदिने र मिति २०७४।०२।१५ गते दोस्रोपटक २४ घण्टे स्पष्टीकरण पत्र पठाएको हो। तर, कुनै प्रत्युउत्तर नदिनेमात्र हैन, पार्टी सम्पर्कमै नआउने र पार्टी प्रक्रियाको अवज्ञा गर्ने गम्भीर गल्ती पुनश्च दोहोरियो। तसर्थ, मिति २०७४।०२।१७ गते पार्टी केन्द्रीय कार्यकारिणी समितिको बैठक बसी पार्टी विधान र राजनीतिक दलसम्बन्धी ऐनको व्यवस्थाबमोजिम पार्टी सदस्यसमेत नरहने गरी कार्यकारिणी सदस्यहरु महन्थ ठाकुर, राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई निष्कासन गरिएको छ,’ विज्ञप्तिमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
