कञ्चनपुर– भीमदत्त नगरपालिकाले महाकाली नदीमा साहसिक जलयात्रा (र्याफ्टिङ)का लागि सम्भाव्यता अध्ययनको कार्य गरेको छ।
महाकाली नदीको त्रिशूलदेखि ब्रह्मदेवसम्म र्याफ्टिङ सञ्चालन गर्न लागिएको हो। यसका लागि नगरपालिकाले र्याफ्टिङ कम्पनीबाट सम्भाव्यता अध्ययन गराएको छ।
महाकाली नदीको बहुप्रयोग योजनाअन्तर्गत भीमदत्त नगरपालिका–९ मा र्याफ्टिङ सञ्चालन गर्न लागिएको हो। गतवर्षको स्थानीय तह निर्वाचनमा महाकाली नदीको बहुप्रयोग भीमदत्त नगरपालिकाका नगरप्रमुख सुरेन्द्र विष्टको चुनावी एजेण्डा थियो।
नगरप्रमुख विष्टले धार्मिक पर्यटनलाई मध्यनजर गरी ब्रह्मदेवदेखि भित्री मधेशको फर्सवानसम्म र्याफ्टिङ सञ्चालन गरिने बताए।
नगरपालिकाले पर्यटन मन्त्रालयलाई र्याफ्टिङ सञ्चालन सहयोगका लागि यसअघि नै पत्र पठाएको थियो। कैलालीको कर्णाली र्याफ्टिङ एण्ड एडभेन्चर प्रालि नगरपालिकाको सहयोगमा र्याफ्टिङ सञ्चालनका लागि इच्छुक देखिएको छ।
कम्पनीका सञ्चालक देवराज जैशीले भारतीय कम्पनीसित सहकार्य गरी छिट्टै र्याफ्टिङ सञ्चालनको तयारी गरिने बताए। ‘महाकाली नदी र्याफ्टिङका लागि उपयुक्त गन्तव्य हो। यहाँ त्रिशूली नदीभन्दा पनि राम्रो सम्भावना छ।’, कम्पनीका सञ्चालक जैसीको भनाइ छ।
जैसीको कम्पनीले अहिले कर्णाली, भेरी, सेती, सानो भेरी, ठूलो भेरी, हुम्ला कर्णाली, डोल्पा कर्णाली, त्रिशूली नदीमा र्याफ्टिङ सञ्चालन गर्दै आएको छ।
ब्रह्मदेव उत्तरको गाउँ मुसेट्टी नजिक त्रिशूलबाट तीन वटा र्याफ्टिङ गरी ब्रह्मदेवसम्म पुग्न सकिने जैसीले दावी गरे। महाकाली नदीको मौनताको दृष्य समेत पर्यटकलाई देखाउने गरी र्याफ्टिङको तयारी गरिएको हो।
महाकाली नदीमा फिसिङका लागि विदेशी आउने गरेका छन्। सरकारले महाकालीसहित सेती र कर्णालीमा र्याफ्टिङका लागि अनुमति दिएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790590624.png)
-1786602170.png)
