काठमाडौं– विपक्षी गठबन्धनले ‘राष्ट्रपति विद्यादेवी भण्डारी र प्रधानमन्त्री केपी शर्मा ओलीको सबै कदम असंवैधानिक भन्दै विरोधमा उत्रने निर्णय गरेको छ।
कांग्रेस सभापति शेरबहादुर देउवाको बूढानीलकण्ठस्थित निवासमा सम्पन्न बैठकले कोरोना महामारीबाट सुरक्षित हुँदै असंवैधानिक कदमको विरोधमा उत्रने निर्णय गरेको जनमोर्चाकी नेता दुर्गा पौडेलले बताइन्।
साथै, विपक्षी गठबन्धनले संविधानको संरक्षण गर्ने अधिकार सर्वोच्च अदालतको भएकाले संरक्षण हुनेमा आफूहरु विश्वस्त रहेको बताएका छन् ।
‘संवैधानिक सर्वोच्चता, कानुनी शासन प्रणाली र स्वतन्त्र न्यायालय रहेको हाम्रो देशमा सवोच्च अदालतबाट संवैधानिक व्यवस्थाको संरक्षण भई न्याय प्राप्त हुनेमा हामी विश्वस्त छौं,’ बैठकपछि जारी विज्ञप्तिमा उल्लेख छ, ‘लामो कठोर संघर्षबाट प्राप्त नेपालको संविधान र लोकतन्त्रको पक्षमा एकताबद्ध सशक्त किसिमले आवाज उठाउन र दृढताका साथ अग्रसर हुन हामी सम्पूर्ण राजनीतिक दलका नेता र कार्यकर्ताहरु तथा आम जनसमुदायमा हार्दिक आह्वान गर्दछौं।’
विज्ञप्तिमा सरकारका संविधान विपरीतका र अलोकतान्त्रिक कामकारबाहीमा सहयोगी नहुन राज्यका सबै अंग र निकायहरुलाई पनि आग्रह गरिएको छ।
असंवैधानिक कदमविरुद्ध कानुनी लडाइँसँगै राजनीतिक रूपमा पनि प्रतिवाद गर्ने निर्णय देउवा निवासमा बसेको संयुक्त बैठकले गरेको पौडेलले बताइन्।
आजको बैठकमा काम चलाउ बनेको सरकारले ल्याएको पूर्ण आकारको बजेट पनि असंवैधानिक भन्दै विपक्षी गठबन्धनका नेताहरुले विरोध जनाएका थिए।
बैठकमा कांग्रेस सभापति देउवासँगै माओवादी केन्द्रका अध्यक्ष पुष्पकमल दाहाल, एमाले (खनाल–नेपाल समूह) नेता माधवकुमार नेपाल, जनता समाजवादी पार्टीका अध्यक्ष उपेन्द्र यादव लगायत नेताहरु सहभागी थिए।
आफ्नो असंवैधानिक कदमविरुद्ध सडक प्रदर्शन हुने डरले प्रधानमन्त्री ओलीले निषेधाज्ञालाई कडा बनाएको निष्कर्षसमेत बैठकमा सहभागी नेताहरुले निकालेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763721444.png)
-1763559424.jpg)
-1763559424.jpg)
