गान्सु– चीनमा १०० किलोमिटरको म्याराथन दौड प्रतियोगीतामा सहभागी भएका बेला १६ जना प्रतियोगीको मृत्यु भएको छ।
चिनियाँ समाचार संस्था सिन्ह्वाका अनुसार प्रतियोगीतामा सहभागी भएकामध्ये अरु ५ जना अझै पनि बेपत्ता रहेको र अरु प्रतियोगीहरु भने सम्पर्कमा रहेको अधिकारीहरुले जनाएका छन्। चीनको गान्सु प्रान्तमा आयोजना गरिएको १०० किलोमिटरको क्रस कन्ट्री हिमाली म्याराथन दौड प्रतियोगीताका क्रममा यस्तो घटना भएको हो।
प्रतियोगीता भइरहेको बेला एक्कासी मौसम खराब भएपछि कठांग्रिएर प्रतियोगीहरुको मृत्यु भएको जनाइएको छ। पर्यटकीय क्षेत्रको रुपमा चर्चित बैयीन सहरको जङताइ भन्ने ठाउँमा स्थानीय समय अनुसार शनिबार बिहान ३ बजे यो घटना भएको अधिकारीहरुले जानकारी दिएका छन्।
मौसम अचानक गडबड भएर प्रतियोगीहरुलाई असर गरेपछि तत्कालै घटनास्थलमा उद्धारकर्ताहरु परिचालन गरिएको थियो। उनीहरुले नै मृतक र घाइतेहरुलाई उद्धार गरेका थिए।
घटनामा परी केही प्रतियोगीहरु घाइते भएका र उनीहरुको उपचार भइरहेको अधिकारीहरुले जानकारी दिएका छन्। प्रतियोगीतामा १७२ जना प्रतियोगी सहभागी भएका थिए। उनीहरुमध्ये अधिकांशको अवस्था सामान्य नै रहेको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
