जेरूशेलम- इजरायल र हमासबीच युद्धविरामपछि शुक्रबार पूर्वी जेरूशेलममा पुन: झडप भएको छ।
इजरायलीले कब्जा गरेको पूर्वी जेरूशेलममा प्यालेस्टिनी प्रदर्शनकारी र इजरायली सुरक्षा फौजबीच झगडा भएको छ।
शुक्रबार अल-अक्सा मस्जिद परिसरमा सयौं प्यालेस्टिनी नमाजको लागि भेला भएका थिए। त्यसपछि आफ्नाे देशकाे जित भएकाे भन्दै नाराबाजी र प्यालेस्टिनी झण्डा फहराउँदै उत्सब मनाएका थिए। त्यही बीचमा झडप भएको हो।
इजरायली प्रहरीले जारी गरेको विज्ञप्तिमा भनिएको छ, ‘नमाज अन्त्य पछि दंगा जस्तो स्थिति उत्पन्न भयो। त्यहाँ भेला भएका सयौं प्यालेस्टिनी युवाहरूले सुरक्षा फौजमाथि ढुङ्गा हान्न थाले र त्यसपछि परिस्थिति नियन्त्रणमा लिन प्रहरी कमाण्डरले आदेश दिए।’
प्रत्यक्षदर्शीका अनुसार सुरक्षाकर्मीहरूले अश्रुग्यास प्रहार गरेका थिए। यता प्रदर्शनकारीहरुले स्ट्रेन ग्रेनेड प्रहार गरेका थिए।
इजरायल र हमासबीचको पछिल्लो युद्ध गत मे १० तारिखदेखि शुरु भएको हो। अल–अक्सा मस्जिद परिसरमा प्रहरीको दमनका साथै यहूदीहरुले दर्जनौं प्यालेस्टिनी परिवारलाई विस्थापित गर्न खोजेपछि परिस्थिति अझ जटिल बनेको थियो।
यहूदी र मुस्लिम दुवैले यस ठाउँलाई अत्यन्त पवित्र मान्दछन्। यहूदीहरूले यसलाई टेम्पल माउन्ट भन्छन्। यता, मुस्लिमहरूले यसलाई हराम अल शरीफ भन्छन्।
याे स्थानमा इजरायलले नियन्त्रणमा लिएपछि हमासले कारबाही शुरु गरेकाे थियाे। ११ दिनको युद्धपश्चात दुई पक्षका बीच शुक्रबार युद्धविराम लागू भएकाे थियाे। इजिप्टको मध्यस्थतामा यो युद्धविराममा सहमति भएपछि दुबै पक्षले आफ्नो जित्ने घोषणा गरेका छन्।
यद्यपि, दुई देशबीच ११ दिनसम्म चलेको युद्धमा गाजा क्षेत्रमा ६६ बालबालिकासहित दुई सय ४३ जनाको ज्यान गएको छ।
इजरायली हवाई हमलाले गाजामा कम्तिमा ५१ शैक्षिक संस्थामाथि क्षति पुगेको छ। जसमा ४६ विद्यालय, दुई बालगृह, एक संयुक्त राष्ट्र तालिम केन्द्र र गाजाको इस्लामिक विश्वविद्यालयको केही अंश रहेका छन्।
यो युद्धमा कम्तिमा ६६ हजार प्यालेस्टिनी विस्थापित भएको बताइन्छ। उनीहरु अझै संयुक्त राष्ट्रसंघद्वारा सञ्चालित ५८ शिविरहरुमा आश्रय लिएर बसिरहेका छन्।
इजरायली आक्रमणबाट कम्तिमा ६ वटा अस्पताल र ११ प्राथमिक स्वास्थ्य चौकीहरुलाई पनि क्षति पुगेको बताइन्छ। गाजाको एकमात्र कोरोना परीक्षण प्रयोगशाला पनि मे १७ को इजरायली हमला पछि धोस्त भएको थियो।
गाजाको बिजुली नेटवर्कमा पनि क्षति पुगेको छ। जसले दैनिक २०/२१ घण्टा बिजुली बल्दै आएकाे थियाे। यसले गाजापट्टीमा पानी र सरसफाई सुविधाहरूलाई असर गरेको छ। कम्तिमा दुई लाख ५० हजार मानिसलाई पिउने पानीको पहुँच छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
