जेरुसेलम- इजरायलले बिहीबार बिहानैदेखि गाजापट्टीका विभिन्न स्थानमा भीषण हवाई हमला शुरु गरेको छ। आक्रमणबाट हालसम्म कम्तीमा एक जना प्यालेस्टाइनी नागरिकको मृत्यु हुनुका साथै अन्य धेरै जना घाइते भएकाे बताइन्छ।
बिहीबार सबेरै गाजा शहरलाई विस्फोटनका आवाजले हल्लाइदिएको थियो। रकेट प्रहारकाे कारण गाजाकाे आकाशमा आगोका लप्का माथिसम्म देखिएका थिए। इजरायली आक्रमणहरू मध्य शहर डायर अल–बलाह र दक्षिणतर्फको खान युनिस शहरमा पनि भएका थिए।
खान युनिस शहरका पाँच स्थानीयवासीका घर बम आक्रमणबाट ध्वस्त भएकाे थिए। गाजा शहरको व्यापारिक केन्द्रका रुपमा रहेको अल–सफ्तावी स्ट्रिटमा पनि भीषण आक्रमण भएको थियो।
इजरायली सेनाले हमासका कमान्डरका कम्तीमा चार वटा घर ध्वस्त पारिएको जनाएको छ। खान युनिसमा खवाल्डी परिवारको दुई तले भवन क्षतिग्रस्त भएको छ। डरका कारण आफ्नो घर छाडेर ११ सदस्यीय खवाल्डी परिवार नजिकैको अर्को घरमा बस्न थालेको थियो। तर, आक्रमणबाट उनीहरु पनि घाइते भएका र अस्पताल भर्ना गरिएको छिमेकी शाकेर अल–खोजोनदारले बताए।
गाजाका विद्रोही हमास समूह विरुद्धको प्रत्याक्रमण रोक्न अन्तर्राष्ट्रिय शक्तिहरुले दिएकाे दबाबलाई बेवास्ता गर्दै प्रधानमन्त्री बेन्जामिन नेतन्याहूले सैनिक कारबाहीलाई निरन्तरता दिएका छन्।
पछिल्लो युद्ध शुरु भएयता गाजामा सरकार चलाइरहेको हमासका लडाकूले इजरायलमाथि हजारौं क्षेप्यास्त्र प्रहार गरिसकेको छ।
गाजाको स्वास्थ्य मन्त्रालयका अनुसार इजरायली आक्रमणबाट कम्तीमा २२७ जनाको मृत्यु भएको छ जसमा ६४ जना बालबालिका र ३८ जना महिला छन्। आक्रमणबाट एक हजार ६२० जनाभन्दा बढी घाइते भएका छन्।
हमास र इस्लामिक जिहादले आफ्ना कम्तीमा २० जना लडाकू मारिएको जनाएका छन् तर इजरायलले १३० जना हमास लडाकू मारिएको दाबी गरेको छ।
इजरायली आक्रमणको त्रासका कारण झण्डै ५८ हजार प्यालेस्टिनी विस्थापित भएका छन्। इजरायलतर्फ पाँच वर्षका एक बालकसहित १२ जनाको मृत्यु भएको छ। इजरायली आक्रमणबाट कम्तमिा १८ वटा अस्पताल र क्लिनिकमा क्षति पुगेको छ भने एउटा स्वास्थ्य संस्था क्षतिग्रस्त भएको विश्व स्वास्थ्य संगठनले जनाएको छ।
इजरायल र हमासबीचको पछिल्लो युद्ध गत मे १० तारिखदेखि शुरु भएको हो। पूर्वी जेरुसेलमस्थित अल-अक्सा मस्जिद परिसरमा प्यालेस्टाइनी प्रदर्शनकारी र इजरायली प्रहरीबीच निकै दिनदेखि जारी भिडन्त पश्चात हमास लडाकूले जेरुसेलमलाई लक्षित गरी लामो दूरीका क्षेप्यास्त्र प्रहार गरेपछि इजरायलले हमास विरुद्ध कारबाही थालेको थियो।
अल–अक्सा मस्जिद परिसरमा प्रहरीको दमनका साथै यहूदीहरुले दर्जनौं प्यालेस्टिनी परिवारलाई विस्थापित गर्न खोजेपछि परिस्थिति अझ जटिल बनेको थियो।
त्यसयता, इजरायलले सयौं हवाई हमला गरिसकेको छ। इजरायलको भनाइमा यी आक्रमणहरू हमासका सबै किसिमका पूर्वाधार ध्वस्त बनाउन केन्द्रित रहेको छ। हमासले पनि चार हजारभन्दा बढी क्षेप्यास्त्रहरु इजरायलतर्फ प्रहार गरेको जनाएको छ।
सन् २०१४ यताको सबैभन्दा डरलाग्दो हमला मानिएको यस पटकको युद्धलाई लिएर विश्वका विभिन्न स्थानमा इजरायलविरुद्ध प्रदर्शनहरु भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
