मस्काे- रुसका राष्ट्रपति भ्लादिमिर पुटिनले चीनसँगको सम्बन्ध इतिहासकै सबैभन्दा राम्रो दिशामा अघि बढिरहेको बताएका छन्।
बुधबार चिनियाँ राष्ट्रपति सि चिनफिङसँग भिडियो लिङ्कमार्फत् चीनमा रुसी प्रविधिबाट सुसज्जित थर्ड जेनेरेशनका चार न्यूक्लियर रियाक्टरको सुरुवात गर्दै पुटिनले यस्तो बताएका हुन्।
रुसले चीनमा यी चार न्यूक्लियर पावर प्लान्ट बनाएको छ। पुटिन भिडियो लिंकमार्फत चीनको न्युक्लियर रिएक्टर समारोहमा जोडिएका थिए।
चिनियाँ पत्रिका ग्लोबल टाइम्ससँग चिनियाँ विशेषज्ञले यी चारै न्युक्लियर रिएक्टर चीन र रुसबीचको ऊर्जा परियोजनाका सबैभन्दा ठूलो साझेदारी भएकाे बताएका छन्। यसलाई यी दुई मुलुकबीचको ऊर्जा सुरक्षा तथा राष्ट्रिय सुरक्षाको महत्वपूर्ण चरण मानिएको छ।
‘रुस र चीनको साझेदारी आपसी विश्वाससहित राजनीतिक मामिलामा व्यापार, अर्थव्यवस्था, संस्कृति र मानवीय सहयोगमा पूर्ण रुपमा सफल भइरहेको छ,’ पुटिनले भने, ‘हामी भन्न सक्छौं रुस र चीनबीचको सम्बन्ध ऐतिहासिक रुपमा सबैभन्दा उचाईंमा पुगिसकेको छ।’
पछिल्लो केही समय यता रुस र चीनबीचको सम्बन्ध निकट बन्दै गएको छ। यी दुवै मुलुक संयुक्त राष्ट्रसंघको सुरक्षा परिषद्का स्थायी सदस्य हुन्। त्यसैले यी दुई मुलुकको निकट सम्बन्धले ठूलो अर्थ राख्ने गरेको छ।
पुटिनले यो न्यूक्लियर पावर प्लान्ट शक्तिशाली र आधुनिक भएको बताउँदै संयुक्त उपक्रमका लागि यो आफैंमा एउटा उदाहरण भएको धारणा व्यक्त गरे।
उनको सुरक्षाको सबै मापदण्डमा यो रिएक्टर सही रहेको बताए। उनले चीनसँग मिलेर अझै धेरै पावर प्लान्ट बनाउने उद्घोष पनि गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
