मुम्बई- भारतको सबैभन्दा ठूलो खोप निर्माता सेरम इन्स्टिच्युट अफ इन्डिया (एसआईआई)ले पुसअघि कोरोनाविरुद्धको खोप कोभिशिल्ड निर्यात गर्न नसक्ने जनाएको छ।
एसआईआईले कोभ्याक्स र अन्य देशहरुलाई २०२१ को अन्त्यतिरबाट मात्रै खोप निर्यात सुरु हुने अपेक्षा लिएको जनाएको छ। कोरोना महामारीको नयाँ लहरकाे इपिसेन्टर बनेपछि भारतीय सरकारले एक महिना अगाडि खोप निर्यातमाथि प्रतिबन्ध लगाएको थियाे।
समाचार एजेन्सी रोयटर्सले एसआईआईका अधिकारीहरुलाई उद्धत गर्दै भारतीय जनताको जीवनको मूल्यमा खोपको निर्यात कहिले पनि नगर्ने जनाएकाे छ।
‘भारतीय जनताको जीवनको मूल्यमा हामीले खोप निर्यात कहिले पनि गर्ने छैनौं भनेर दोहोर्याउन चाहन्छौं,’ एसआईआईले जारी गरेको विज्ञप्तिमा भनिएको छ, ‘देशको खोप लगाउने अभियानमा गर्नुपर्ने सबै कुरा गर्न हामी प्रतिवद्ध रहेका छौं।’
एसआईआईले अक्सफोर्ड विश्वविद्यालय र एस्ट्राजेनेकासँगको सहकार्यमा भारतमा कोभिशिल्ड नामक कोरोना खोप उत्पादन गरिरहेको छ।
एसआईआईका प्रमुख कार्यकारी अधिकृत अदार पुनावालाले उत्पादन बढाउनका लागि निरन्तर प्रयास भइरहेको बताए। उनले सो क्रम जारी रहने बताए। यद्यपि, भारतमै खोपको अभाव भएको भन्दै सरकार तथा सिरमको आलोचना भइरहेको छ। पुनावालाले पहिलो प्राथमिकता भारतलाई नै दिने पनि बताए।
कोरोना संक्रमणितको संख्या बढेपछि भारतले एक महिनाअघि नै खोप निर्यातमा प्रतिबन्ध लगाएको थियो। त्यसअघि भारतले विश्व स्वास्थ्य संगठनको पहलमा ६ करोड ६० लाख डोज खोप विभिन्न देशलाई बिक्री तथा अनुदानमा दिएको थियो।
विश्व स्वास्थ्य संगठनकाे कोभ्याक्स अन्तर्गत एसआईआईसँग १४ करोड डोज खोप किन्ने सम्झौता गरेको थियो। जसमध्य नेपालले जनसंख्याको २० प्रतिशतलाई पुग्ने खोप कोभ्याक्सबाट प्राप्त गर्ने थियो।
नेपालले एसआईआईबाट खरिद गरेको २० लाखमध्य १० लाख डोज खोप अझै पनि प्राप्त गर्न सकेको छैन। यद्यपि, पुनावालाले केही दिनअघि एउटा टेलिभिजन अन्तर्वार्तामा खोपका लागि नेपाल र बंगलादेशलाई समेत उच्च प्राथमिकतामा राखेको बताएका थिए।
समाचार एजेन्सी रोयर्टसका अनुसार भारतका तीनजना सरकारी अधिकारीहरुले अक्टोबर महिनाअघि खोपको ठूलो परिणाम बिदेशमा निर्यात गर्ने सम्भावना नभएको बताएका छन्।
एसआईआईको विज्ञप्तिमा भनिएको छ, ‘कोभ्याक्स तथा अरु देशहरुले अर्डर गरेका खोपहरु यो वर्षको अन्त्यतिरबाट वितरण गर्न सकिने आशा गरेका छौँ।’
कोभ्याक्सको योजना भारत सरकारको निर्णयबाट प्रभावित हुने सम्भावना बढेको छ। कोभ्याक्स अन्तर्गत अक्सफोर्ड एस्ट्राजेनेका खोप भारतको एसआईआईले उत्पादन गर्ने र विश्वका १९० देशमा पठाउने तयारी भएपनि अहिले रोकिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
