काठमाडौं– जनता समाजवादी पार्टी (जसपा)का संघीय परिषद् अध्यक्ष बाबुराम भट्टराई तथा केन्द्रीय समिति अध्यक्ष उपेन्द्र यादव पक्षको कार्यकारिणी समितिका सदस्यहरुले कार्यकारिणी समितिको पूर्ण बैठक बोलाउन माग गरेका छन्।
जसपाको बाबुराम–उपेन्द्र पक्षका कार्यकारिणी समिति सदस्यहरुको शनिबार बालकुमारीमा बसेको बैठकमा सहभागीहरुले अध्यक्ष महन्थ ठाकुर तथा वरिष्ठ नेता राजेन्द्र महतो पक्षलाई सहमेत सहभागी गराई पूर्ण कार्यकारिणी समितिको बैठक बोलाई त्यहीँबाट निर्णय गरेर जान सुझाव दिएका हुन्।
पार्टीको केन्द्रदेखि प्रदेशमा दुई प्रकारका सर्कुलर जान थालेपछि एकरुपता कायम राख्न पूर्ण कार्यकारिणी समितिको बैठक माग गरिएको नेता गंगानारायण श्रेष्ठले बताए। ‘पार्टीमा एकपछि अर्काे गर्दै अराजकता बढ्दै गयो। पार्टीमा वैधानिक रुपमा कार्यकारिणी समितिमा छलफल गरौं भन्ने सुझाव दिइयो,’ श्रेष्ठले भने, ‘सकेसम्म ५२ जना मध्ये ५१ जना सहभागी भइ छलफल गर्नुपर्यो। यदी महन्थ–राजेन्द्रपक्ष सहभागी नभए आफ्नो पक्षको मात्रै बैठक बसेर निर्णय गर्नुपर्यो।’ अब पूर्ण कार्यकारिणी समितिको बैठकमा महन्थ–राजेन्द्रपक्ष सहभागी नभए बहुमतका आधारमा निर्णय गरेर अघि बढिने पनि श्रेष्ठले बताए।
पार्टीको कार्यकारिणी समितिमा बाबुराम–उपेन्द्रपक्षको बहुमत भएकाले महन्थ–राजन्द्रपक्षलाई कारबाही गरेर अघि बढ्न सक्ने सम्भावना पनि रहेको नेताहरुको भनाइ छ।
बाबुराम–उपेन्द्र पक्षको शनिबार बसेको कार्यकारिणी समितिको अनौपचारिका बैठकले राजेन्द्र महतोलाई दलको नेता चयन गरेको विषयमा खण्डन गर्ने निर्णय गरेको छ। संसदीय दलको विधानको टुंगो नै नलागेको अवस्थामा महतोलाई दलको नेता चयन गर्नु उचित नभएको भन्दै खण्डन गरिएको छ।
जसपाका ५ पदाधिकारीमा बाबुराम, उपेन्द्र र आशोक राई तीन जना एक पक्षमा छन्। अर्काे पक्षमा अध्यक्ष महन्थ ठाकुर र राजेन्द्र महतो छन्। बाबुराम–उपेन्द्र पक्षको कार्यकारिणी समितिमा यसअघि २७ जनाले हस्ताक्षर गरेका थिए। अल्पमत–बहुमतका आधारमा निर्णय गर्नुपर्ने अवस्था आएमा ३० भन्दा धेरै सदस्यहरु आफ्नो पक्षमा हुने बाबुराम–उपेन्द्रपक्षका नेताहरुको दाबी छ।
जसपा विधानअनुसार कार्यकारिणी समिति सबैभन्दा शक्तिशाली भएकाले अर्को पक्षले ‘विधान विपरीत’ कार्य गरेमा कारबाही गरिने चेतावनी बहुमत सदस्य रहेको दाबी गर्ने बाबुराम–उपेन्द्र पक्षका नेताहरुले दिँदै आएका छन्।
केन्द्रमा मात्रै नभइ ७ प्रदेशमा पनि आफूहरुकै बहुमत रहेको बाबुराम–उपेन्द्र पक्षका नेताहरुको भनाइ छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।