काठमाडौं- नेकपा एमालेका अध्यक्ष केपी शर्मा ओली र वरिष्ठ नेता माधवकुमार नेपालबीच माओवादी केन्द्रबाट आएका रामबहादुर थापा‘बादल’का कारण फेरि विवाद उत्पन्न भएको छ। प्रधानमन्त्रीसमेत रहेका अध्यक्ष ओलीले दुई पक्षबीचको विवाद समाधान गर्न गठन गरिने कार्यदलमा बादललाई राख्नुपर्ने प्रस्ताव गरेपछि नेपालपक्षले विरोध जनाएको हो।
शनिबार वरिष्ठ नेता नेपालले 'भर्चुअल' बैठक राखेर आफूनिकट केन्द्रीय सदस्यहरुको सुझाव लिएका छन्। त्यस क्रममा अधिकांश केन्दीय सदस्यहरुले बादललाई कार्यदलमा राख्ने प्रस्तावको विरोध जनाएका हुन्।
बैठकमा नेपालपक्षका नेताहरुले पार्टीलाई जेठ २, २०७५ मा फर्काउने र गत फागुन २८ गतेको निर्णय खारेजी हुनुपर्ने धारणा राखेको केन्द्रीय सदस्य जगन्नाथ खतिवडाले बताए। यसअघि नेपालले राखेको छ बुँदे मागलाई मुख्य 'बटमलाइन' बनाएर कार्यदलमा छलफल हुनुपर्ने धारणा राखेको उनले बताए। पार्टी एकता जोगाउन आफ्नोतर्फबाट अन्तिम अवसर प्रदान गरेको विषयमासमेत नेताहरुले चर्चा गरेका थिए।
‘केपी ओलीले बादललाई कार्यदलमा राख्ने भनेपछि यसअघि नै विरोध भएको थियो। बादललाई राखेर कार्यदलमा बस्दैनौँ पहिल्यै पनि भनिसकेका छौं,’ खतिवडाले भने, ‘उनी (बादल) एमाले पनि होइनन्। एमाले विवाद समाधान गर्ने नैतिक राजनीतिक शक्ति पनि छैन।’ ओलीले बादललाई जबरजस्त राखिए एमाले एकता भाँड्न ल्याउन थालिएको रुपमा बुझ्नुपर्ने खतिवडाले बताए।
‘जुनसुकै अवस्थामा पनि पार्टीलाई फुटबाट जोगाउने असल मनसायका साथ त्याग गरेका हौं। अब केपी ओलीको इमान्दारिताको परीक्षण गर्नुपर्ने बेला आएको छ,' खतिवडाले भने,‘हाम्रो बटमलाइनबाट तल-माथि गर्दैनौं। पार्टीलाई २०७५ जेठ २ गतेको अवस्थामा सबै नेता तथा जनसंगठनका सबै पद पूर्ववत अवस्थामा आउनुपर्छ।’
जुम बैठकमा नेता झलनाथ खनालले केपी ओलीको इमान्दारिताको परीक्षा लिने समय आएको बताएका थिए। ‘हामीले आफ्नो तर्फबाट ओलीलाई दिनुपर्ने अवसर सबै दिएका छौं। एकता बनोस् भनेर साथ दिएका हौं। यो सरकार टिकोस् भनेर समर्थन गरेका हौं,’ खनालले भने, ‘पार्टी फुटको स्थितिमा नजाओस् भनेर जुनसुकै अवस्थामा पनि पार्टी एकतालाई जोगाउन असल मनसायका साथ त्याग गरेका हौं। अब केपी ओलीको इमान्दारिताले नै पार्टी जीवन पाउने वा नपाउनेमा भर पर्छ।’
एमाले विवाद मिलाउन नाै सदस्यीय कार्यदल गठन गर्ने सहमति भएको छ। कार्यदलमा ओलीपक्षबाट विष्णु पौडेल, सुवासचन्द्र नेम्वाङ र शंकर पोखरेल रहेका छन्। नेपालपक्षबाट भीम रावल, सुरेन्द्र पाण्डे, घनश्याम भुसाल र गोकर्ण विष्ट छन्। बाँकी दुई जनामा ओलीपक्षले बादललाई राख्न खोजेपछि विरोध भएको हो। ओलीले बादलपक्षबाट २३ जना केन्द्रीय सदस्य बनाएका छन्।
शुक्रबार साँझ दुई पक्षबीच सिंहदरबारमा भएको वार्तामा बादल सहभागी भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768372708.png)
-1764146706.png)
-1768288990.png)
