वार्तामा सहभागी एमालेका शीर्ष नेताहरु। तस्बिर: निमेषजंग राई
काठमाडौं- नेकपा (एमाले)का अध्यक्ष एवं प्रधानमन्त्री केपी शर्मा ओली र वरिष्ठ नेता माधवकुमार नेपालसहित एमाले शीर्ष नेताहरूको वार्ता सकिएको छ।
सिंहदरबारस्थित प्रधानमन्त्री तथा मन्त्रिपरिषद् कार्यालयमा भएको वार्ता करिब तीन घण्टा चलेको थियो।
वार्तामा २०७५ जेठ २ गतेलाई टेकेर अघि बढ्ने कुराकानी भएको नेता भीम रावलले बताए। यसका लागि कार्यदल गठन गर्ने निर्णय भएको उनले बताए। कार्यदलमा सदस्य चयन गर्ने जिम्मा अध्यक्ष ओली र वरिष्ठ नेता नेपाललाई दिने र संवादलाई निरन्तरता दिने सहमति भएसमेत उनले जानकारी दिए।
अर्का नेता रघुजी पन्तले वार्ता सकारात्मक भएको प्रतिक्रिया दिए। पार्टीलाई एकताबद्ध बनाएर जाने सहमति भएको उनले बताए।
वार्ता सकेर सिंहदरबारबाट बाहिरिँदै प्रधानमन्त्री ओली। तस्बिर: निमेषजंग राई
वार्तामा ओलीसहित उनी पक्षका नेताहरू ईश्वर पोखरेल, रामबहादुर थापा, विष्णु पाैडेल, सुवास नेम्वाङ र शंकर पोखरेल सहभागी थिए।
त्यसैगरी, एमाले वरिष्ठ नेता नेपालसँगै उनको पक्षबाट स्थायी कमिटी सदस्यहरु भीम रावल, सुरेन्द्र पाण्डे, घनश्याम भुसाल, गोकर्ण विष्ट र रघुजी पन्त सहभागी थिए।
वार्तामा प्रधानमन्त्रीका प्रमुख राजनीतिक सल्लाहकार विष्णु रिमाल पनि सहभागी थिए।
ओली र नेपालबीच बिहीबार पार्टीभित्रका समस्या समाधानका लागि कार्यदल गठन गर्ने सहमति भएको थियो। कार्यदल बन्न बाँकी नै रहेका बेला शीर्ष नेताहरुसहित वार्ता चलेको हो।
नेपाल पक्षको वार्ता टोलीलाई केन्द्रीय सदस्यहरूले २०७५ जेठ २ अघिको स्थायी कमिटीको बैठक बसेर विवाद मिलाउन, प्रधानमन्त्रीले विश्वासको मत लिनुअघि नै सबै विवाद समाधान गर्न र नभए सामूहिक राजीनामा दिने अडान राख्न कार्यादेश दिएका थिए।
वार्ता सकेर सिंहदरबारबाट बाहिरिँदै एमालेका वरिष्ठ नेता नेपाल। तस्बिर: निमेषजंग राई
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768388267.png)
-1768388032.png)
-1764146706.png)
-1768288990.png)
