काठमाडाैं- इजरायल र हमासबीच गाजामा भइरहेको द्वन्द्वमा परी ज्यान गुमाउनेकाे संख्या ७४ पुगेकाे छ।
सोमबार रातिदेखि सुरुवात भएको यस द्वन्द्वमा परेर प्यालेस्टाइन पट्टी १४ बालबालिकासहित ६७ जना र इजरायलतर्फ ७ जनाको मृत्यु भएको बीबीसीले जनाएकाे छ।
इजरायलको केही क्षेत्रहरुमा यहुदी र अरबी मुसलमानहरु बसोबास गर्दछन्। उनीहरुबीच पनि हिंसा मच्चिएको बताइएको छ।
इजरायली प्रहरीका अनुसार बुधबारको हिंसापछि ३७४ मानिसलाई गिरफ्तार गरिएको छ। ३६ प्रहरी घाइते भएको बताइएको छ।
त्रासमा जनता
इजरायल र हमासबीच गाजामा भइरहेको युद्धमा परी प्यालेस्टानका सर्वसाधारणलाई ज्यान बचाउन धौधौ परेको छ। विगत केही वर्षयताको यो सबभन्दा खराब द्वन्द्व भएकाे अन्तर्राष्ट्रिय शक्तिहरुले बताइरहेका छन्।
बीबीसीका अनुसार इजरायलको दक्षिणमा रहेको अश्कलोन शहरमा गाजाबाट गरिएको रकेट आक्रमणका कारण क्षति पुगेको छ। हमासका विद्रोहीहरूले उक्त क्षेत्रमा बस्नेहरूको जिन्दगी नरक बनाइदिने चेतावनी दिएका छन्।
इजरायलको हवाई हमलामा आफ्ना वरिष्ठ कमाण्डर मारिएको भन्दै हमासले तेल अभिभतर्फ एकैपटक सयभन्दा बढी रकेट बम प्रहार गरेका थिए। तर, हमासले हानेको सबै क्षेप्यास्त्र इजरायलको भूमिमा नखसेकाे जनाइएकाे छ।
यदी ती सबै क्षेप्यास्त्र इजरायलमा खसेको भए त्यहाँका शहरहरु केही सेकेन्डमै ध्वस्त हुने त्यहाँका स्थानीय बताउँछन्।
गाजाबाट प्रहार गरिएका अधिकांश रकेटलाई इजरायलले आइरन डोम मिसाइल डिफेन्स सिस्टममार्फत रोक्ने गरेको छ। जसकाकारण मिसाइल तल भुइँमा खस्न नपाइ आकाशमै असफल बनाइन्छ।
आइरन डोमले रोके पनि कतिपय रकेटहरू सीधै भवनहरूमा आएर खसेका छन्। यी आक्रमणमा परी दुई महिलाको मृत्यु भएको छ भने धेरै मानिस घाइते भएका छन्। त्यहाँ घरिघरि साइरन बज्छ र मानिस लुक्नका लागि ठाउँ खोजिरहेका हुन्छन्।
आकाशमा विस्फोटको चर्को आवाज सुनिन्छ र आकाशमा धूवाँको रेखा कोरिन्छ। हालैका वर्षमा इजरायलले भवनमा बम आक्रमणबाट बच्नका लागि उचित व्यवस्था गर्ने नियम बनाएको छ। तर, कतिपय पुराना भवनमा यस्तो व्यवस्था छैन।
विवादकाे चुराे
जेरुसलेमका प्यालेस्टाइनी तथा मुस्लिम नागरिकलाई त्यहाँका यहुदी समुदायले लखेट्न खोजेको भन्दै सुरुवातमा त्यहाँ विवाद भएको हो। सन् १९६७ को युद्धमा इजरायलले पूर्वी जेरुसलेमलाई आफ्नो नियन्त्रणमा लिएको थियाे। अहिले इजरायलले जेरुसलेमलाई आफ्नो राजधानी मान्छ।
तर, प्यालेस्टानसहित अन्तर्राष्ट्रिय समुदायले इजरायलको समर्थन गर्दैनन्। प्यालेस्टाइन पूर्वी जेरुसलेमलाई एउटा स्वतन्त्र मुलुकको राजधानीको रुपमा हेर्छ।
२०१६ को अक्टोबरमा संयुक्त राष्ट्रसंघ अन्तर्गत साँस्कृतिक शाखा युनेस्कोको कार्यकारी बोर्डले एउटा प्रस्ताव पारित गर्दै जेरुसलेमको अल–अक्सा मस्जिदमा यहुदीको दाबी नभएको उल्लेख गरेको थियो।
सो मस्जिद छेउमै यहुदीको टेम्पल माउन्ट मन्दिर छ। यहुदीले सो मन्दिरलाई महत्वपूर्ण धार्मिकस्थल मान्छन्। मस्जिद वरपरका क्षेत्रमा दुवै पक्षको दाबी हुँदा विवाद समाधान भएको छैन।
जेरुसलेमको अल–अक्सा मस्जिद मुसलमानहरुकाे पवित्र धार्मिकस्थल मानिन्छ। हालै मस्जिदको स्पिकरकाे साउण्ड ठूलो भएको भन्दै प्यालेस्टाइनका नागरिकलाई प्रवेश गर्न नदिएपछि हिंसा सुरुवात भएको बताइएको छ।
यहीँबाट सुरुवात भएको संघर्षमा इजरायली प्रहरीले अधिकांश प्यालेस्टाइनी नागरिक घाइते बनाएपछि प्यालेस्टाइनको विद्रोही समूह हमासले इजरायलतर्फ क्षेप्यास्त्र प्रहार गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
