काठमाडौं- जनता समाजवादी पार्टी (जसपा)का वरिष्ठ नेता राजेन्द्र महतोले नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड', नेपाली कांग्रेसका सभापति शेरबहादुर देउवा र जसपा अध्यक्ष उपेन्द्र यादव जसपा फुटाउन लागेको आरोप लगाएका छन्। जसपा फुटाउन उपेन्द्र यादव लामो समयदेखि लागिपरेको बताउँदै महतोले उनलाई कारबाही हुने चेतावनी दिए।
‘अब उपेन्द्र यादवमाथि कारबाही हुन्छ। पार्टी फोडुवामाथि कारबाही गर्छौं। पार्टी फोडुवालाई छोड्न हुँदैन’ महतोले नेपाल लाइभसँग भने, ‘पार्टी फोड्नलाई एकता गरेको होइन। यो कुरा उपेन्द्रजीले बुझ्न पर्छ। कुनै कार्यकर्ता पार्टी फुटाउन तयार छैन।’ जसपामा आफ्नो पक्षको बहुमत भएको दाबी गर्दै महतोले उपेन्द्र यादवमाथि कारबाही हुने दाबी गरे।
‘अस्तिपनि आन्दोलनको बेला माग पूरा गराउने भन्ने थियो। माग दाउमा राखेर दौडेर केपी ओलीको पक्षमा जानुभयो। त्यो बेला ओली प्यारो भयो, ओलीले सरकारबाट निकालेपछि चेत खुल्यो’ महतोले भने, ‘त्यही विषयलाई लिएर ओलीसँग उहाँको रिसिइबी छ। उसको रिसिइबीमा पार्टी चल्ने हो र? अस्ति सत्ताका लागि ओलीकहाँ जाने, अहिले देउवाकहाँ दौडेर जाने?’ उपेन्द्र यादवलाई कति कुर्सि चाहिएको हो ?’
संयुक्त सरकार बनाउने विषयमा जसपाको समर्थन छैन भन्ने जानकारी दिँदादिँदै देउवा गठबन्धन बनाउन लागिपरेको महतोले बताएर। ‘जसपाको संयुक्त सरकार बनाउने विषयमा शुरुदेखि समर्थन छैन भनेर देउवाजीलाई भन्या हो। कुनै व्यक्तिले कीर्ते काम गर्न सक्छ। त्यसमा भर नपर्नुहोला। जसपाको निर्णय आधिकारिक रुपमा आउँछ भनेर सम्झाएर आएका थियौं’ महतोले भने, ‘उहाँले पूरै जसपा चाहिन्छ भन्नुभयो। हिजो देउवाले उपेन्द्रजीसँग मिलेर हस्ताक्षर गर्नुभयो। देउवाजीको नियत पनि पार्टी फुटाउने देखियो। प्रचण्डजी, उपेन्द्रजीको पनि त्यस्तै नियत देखियो। त्यो सपना पूरा हुनेवाला छैन।’
संविधानको धारा ७६ को उपधारा २ अनुसार बहुमतको सरकार बन्दै नबन्ने महतोले ठुकुवा गरे। ‘जसपा सरकारमा जाँदैन। त्यो पहिल्यैदेखि नै भनेको हो। ७६ को २ अनुसार कसरी सरकार बन्छ हेरौं न?’, महतोले भने।
उपेन्द्र यादवले मात्रै हस्ताक्षर गरेर जसपा सरकारमा नजाने बताउँदै महतोले उनीमात्रै जसपा नभएको बताए। ‘जसपा अध्यक्ष भन्दैमा मानलाग्दी गठबन्धन बनाउँदै हिँडेर त्यो पार्टीको निर्णय हुन्छ? त्यसलाई पार्टीको निर्णय मानिन्छ? बहुमतबाट निर्णय गरेर पार्टी बन्छ? महतोले आक्रोश पोखे।
‘पार्टी राष्ट्रपतिले बनाउँदैन होला। त्यसका लागि निर्वाचन आयोग जानुपर्ला। पार्टीको मान्यता निर्वाचन आयोगबाट पाउँछ’ उनले भने, ‘संसद्मा हाम्रो बहुमत छ। कार्यकारिणी र केन्द्रीय कमिटीमा हाम्रो बहुमत छ। त्यसको फैसला थोरै राष्ट्रपतिले गर्ने हो? यसले फैसला निर्वाचन आयोगले गर्ने हो। पहिला उपेन्द्र यादवले सरकारमा जानुछ भने विभाजन गर्नुपर्यो।’
सम्बन्धित समाचार :
नयाँ सरकारको निर्णायक शक्ति जसपाको महन्थ–राजेन्द्र पक्ष
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779634726.png)
-1764146706.png)
-1775812183.jpg)
-1779545841.jpg)
