रंगुन- बर्मेली सेनाले मुलुकका स्याटेलाइट टेलिभिजनमाथि प्रतिबन्ध लगाएको छ। राष्ट्रिय सुरक्षालाई चुनौती दिने सामग्री प्रसारण गरेको भन्दै स्याटेलाइट टेलिभिजन डिसमा प्रतिबन्ध लगाउने निर्णय गरेकाे सेनाले जनाएकाे छ।
मंगलबार सरकारी टेलिभिजनले स्याटेलाइटमार्फत प्रसारण हुने टेलिभिजनहरु अब अवैध हुने जनाएको छ।'स्याटेलाइट टेलिभिजन अब वैधानिक छैन। जसले कानूनको उल्लंघन गर्छ, विशेष गरी उपग्रह डिश प्रयोग गर्ने व्यक्तिलाई एक वर्ष कैद र पाँच लाख क्याट (३२० अमेरिकी डलर)जरिवाना हुनेछ,' एमआरटीभीले भनेकाे छ।
टेलिभिजनहरुले कानूनी व्यवस्था उल्लंघन गर्न, सार्वजनिक व्यवस्थालाई असर पार्न र मानिसहरुलाई देशद्रोहको लागि प्रेरित गर्ने काम गरेको सेनाको आरोप छ।
गत फेब्रुअरी १ मा म्यानमारको सेनाले निर्वाचित सरकारलाई हटाउँदै शासनसत्ता हातमा लिएको थियो। त्यसपछि म्यानमारमा निरन्तर सैन्य ‘कू’ विरुद्ध आन्दोलन हुँदै आएको छ।
आन्दाेलनलाई दबाउन सेनााले मोबाइल इन्टरनेटलाई बन्द गरेकाे छ भने सेनाले सैन्य ‘कू’विरुद्ध गरिएको प्रदर्शनलाई कभर गरेको भन्दै म्यानमार नाउ, खित थित मिडिया, डेमोक्र्याटिक भ्वाइस अफ बर्मा, मिजिमा र सात दिनको प्रशारण अनुमतिपत्र खारेज गरेको थियो।
यद्यपि कुनै महंगो मोबाइल डाटा प्रयोग गर्न नपरोस् भनेर फेसबुकले म्यानमारमा बिनाकुनै अतिरिक्त डाटा शुल्क प्रयोग गर्ने अनुमति दिएको छ।
यस्तै, युट्युबले सामुदायिक मापदण्ड र कानुन पालना नगरेकाे भन्दै म्यानमारका पाँच टेलिभिजन च्यानललाई आफ्नो प्लेटफर्मबाट हटाएको छ।
अहिले युट्युबबाट हटाइएका च्यानलमा एमआरटीभीका साथै सेनाले सञ्चालन गर्दै आएको म्यावाडी मिडिया, एमडब्ल्यूडी भेराइटी र एमडब्ल्यूडी म्यानमार छन्।
यसअघि सामाजिक सञ्जाल फेसबुकले पनि म्यानमारको सेनासँग सम्बन्धित सबै पेजहरुमा रोक लगाउने निर्णय गरेको थियो।
गत नोभेम्बरमा सम्पन्न निर्वाचनमा आङ साङ सुकीको दल नेसनल लिग फर डेमोक्रेसी (एनएलडी)ले अत्यधिक बहुमत प्राप्त गरेको थियो। सैनिक समर्थित पार्टीले थोरै स्थानमा जित हात पारेपछि उनीहरूले निर्वाचनमा धाँधली भएको आरोप लगाउँदै आएका थिए।
अदालतले रिटमाथि कुनै सुनुवाइ नगरेपछि सेनाले सत्तामा कब्जा जमाएको छ । त्यसयता सर्वसाधारणले विरोध गर्दै आएका छन्। आन्दोलनको क्रममा हालसम्म ७६० जनाभन्दा धेरै प्रदर्शनकारीको मृत्यु भइसकेको एसिस्टेन्स एसोसिएसन फर पोलिटिकल प्रिजनर्स (एएपीपी)ले जनाएकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
