काठमाडौं- दाङको तुलसीपुर उपमहानगरपालिका-६ स्याउली बजार सडक छेउमा हिजो (शनिबार) अरुण बुढामगरले आफ्नो बस पार्किङ गरेर राखेका थिए। साँझ करिब ६ बजेतिर सोही बाटो हुँदै एउटा ट्रयाक्टर आयो। उक्त ट्रयाक्टरलाई साइड दिन बुढामगरले आफ्नो बा ३ ख ३४३८ नम्बरको बस खाली चौरतर्फ च्यापे।
आफ्नै घर नजिक बस पार्किङ गरेका उनी ट्रयाक्टरलाई साइड दिइसकेपछि घर गए। उनकै घर नजिक एउटा हरियो रंगको कार करिब तीन महिना पहिलादेखि पार्किङ गरेर राखिएको थियो। अघिपछि कहिल्यै लाइट नबल्ने थन्किएर बसेको आर जे ०१ सिसी ०८८५ नम्बरको उक्त भारतीय कारको बत्ती बलेको बुढामगरले देखे।
त्यसपछि उनी कसरी कारको बत्ती बल्यो भनेर कार भएको ठाउँमा पुगे। ‘कार नजिक पुगेपछि झिँगा भन्किएको र गन्हाएजस्तो लाग्यो। भित्र केही छ कि भनेर हेर्दा तीन वटा लाश जस्तो देखेँ। त्यसपछि म आत्तिएर भागेँ’ कारभित्र सबैभन्दा पहिला शव देख्ने बुढामगरले प्रहरीसमक्ष भने।
त्यसपछि वरपरका मान्छे जम्मा भएर हेर्दा बुढामगरले भनेजस्तै कारको सिटमुनि तीन वटा लाश देखियो। कारभित्र लाश भेटिएपछि स्थानीयले प्रहरीलाई खबर गरेपछि प्रहरी घटनास्थल पुगेर अनुसन्धान शुरु गरेको थियो।
दुई शव नांगै, एउटा अर्धनग्न
स्थानीयले कारभित्र लाश भएको जानकारी गराएपछि इलाका प्रहरी कार्यालय तुलसीपुर, जिल्ला प्रहरीका कार्यालय दाङबाट एसपीसहितको टोली, फेरेन्सिक विज्ञको टोली, सरकारी वलिक, नेपालगञ्जबाट कुकुरसहितको टोली शनिबार राति नै घटनास्थल पुगेको थियो।
घटनास्थलमा शुरुमा पुगेको प्रहरी टोलीलाई क्राइम सिनलाई सुरक्षित राख्न आदेश दाङका एसपी गणेश चन्दले दिएका थिए। सोही अनुसार शुरुवाती टोलीले कारभित्रको लाशलाई नचलाई राखेको थियो। विज्ञसहितको फरेन्सिक टोली पुगेपछि कारको ढोका खोलेर हेर्दा तीन वटा बालकको शव भेटियो। मृत बालकहरू तुलसीपुर-६ बस्ने भीमबहादुर परियारका छोरा ९ वर्षीय सन्देश, सन्तोष परियारका छोरा ७ वर्षीय सुर्वण र किरण परियारका ६ वर्षीय छोरा करण रहेको इलाका प्रहरी कार्यालय तुलसीपुरका डीएसपी शिवबहादुर सिंहले बताएका छन्।
उनीहरूमध्ये दुई जनाको शव नांगो अवस्था भेटिएको थियो। एक जनाको शव भने टिशर्ट नलगाएको तर कट्टु भने लगाएको अवस्थामा भटिएको डीएसपी सिंहले बताए।
गाडी धनी र चालक नियन्त्रणमा
भारतीय नम्बर प्लेटको कारमा तीन जना बालकको शव भेटिएपछि प्रहरीले उक्त कार कसको हो? कसले ल्याएको भन्नेबारे अनुसन्धान गरेको थियो। उक्त कार तुलसीपुर-६ कै यादव गैरेले करिब ३ महिनाअघि भारतबाट ल्याएको भन्ने पुष्टि भएपछि प्रहरीले उनलाई नियन्त्रणा लिएको छ। उनले किन र कसरी उक्त कार भारतबाट ल्याए? किन त्यहाँ राखे? घटनाको बारेमा गैरेलाई जानकारी छ/छैन जस्ता विषयमा प्रहरीले अनुसन्धान शुरु गरेको छ।
गैरेले प्रहरीसमक्ष कारको ढोका आफूले लक गरेर राखेको र लक भएको ढोकाभित्र कसरी शव राखियो भन्नेबारे आफूलाई कुनै जानकारी भएको दाबी गरेका छन्। कार धनी गैरे हुन् भने उक्त कारका चालक हुन् पदम बस्नेत। बस्नेतलाई पनि नियन्त्रणमा लिएर प्रहरीले अनुसन्धान शुरु गरेको छ।
हराएकै दिन हत्या भएको हुनसक्ने आशंका
तीनै जना बालक वैशाख १६ गते हराएका हुन्। घरबाट दिउँसोतिर बाहिर निस्केका उनीहरू रातिसमेत घर नफिर्कएपछि बालक हराएकाले खोजिदिन भन्दै परिवारले इलाका प्रहरी कार्यालय तुलसीपुरमा निवेदन समेत दिएका थिए। प्रहरीले उनीहरूको खोजी गरेपनि अवस्था भने पत्ता लगाएको थिएन। शनिबार गाडीमा भेटिएका शव तीनै हराएका बालकको भएको पुष्टि भयो।
बालकहरूको शव हेर्दा गन्हाउन थालिकसकेकाले घरबाट निस्किएकै दिन उनीहरू मृत्यु भएको वा हत्या भएको हुनसक्ने आशंका प्रहरीको छ। शव गन्हाउन थालिसकेकाले हराएको भनेर निवेदन परेकै समयमा मृत्यु भएको वा हत्या भएको हुनसक्ने एसपी चन्दको भनाइ छ।
घटना रहस्यमय छ, दोषी नउम्कोस् : दलित मुक्ति मोर्चा दाङ
तीन बालकको शव भारतीय कारभित्र भेटिनु निकै रहस्यमय घटना भएकाले दलित मुक्ति मोर्चा दाङले जनाएको छ। उक्त मोर्चाको दाङका अध्यक्ष हिरालाल सुनार सारथीले नेपाल लाइभसँग कुरा गर्दै घटना रहस्यमय भएको र धरै प्रश्नका उत्तर आउन बाँकी नै रहेको बताए।
सुनारले राखेको भनाइ यस्तो छ :
अहिले म पीडित परिवारसँगै छु। घटना यसरी भयो भन्ने सक्ने अवस्था छैन। बच्चा हराएको दिन नै निवेदन समेत दिइएको रहेछ। यो घटना कसले गरायो भन्न सक्ने अवस्था छैन।
गाडीको साहुले ढोका लक गरेर राखेको थिएँ भनेका छन्। लक थियो भने कसरी कसले ढोका खोल्यो? कसरी शव हाल्यो? यत्रो तीन महिनासम्म राखेको गाडी कहिल्यै लाइट नबल्ने त्यसदिन कसरी बल्यो? हिजो साँझ कसरी ब्रेक लाइट बल्यो। रहस्यमय छ घटना। शवमा कुनै चोट लागेको छैन भनिएको छ। पीडित परिवार एकदमै गरिब हो। मैले बुझ्दा पीडित परिवारको कोही कसैसँग केही रिसिइबी छैन। तर, यति हुँदा पनि कसले के उद्देश्यले हत्या गर्यो? अनुसन्धान गरेर दोषीलाई कारबाही हुनुर्यो।
ढोका ‘लक‘ भएपछि निस्सासिएर मृत्यु भएको प्रहरीको प्रारम्भिक अनुमान
यता प्रहरीले भने कारको ढोका लक भएकाल निसासिएर मृत्यु भएको हुनसक्ने प्रहरीको अुनमान गरेको छ। बालकहरू ढोका खुला भएपछि कारभित्र छिरेको र पछि लक भएपछि निस्सासिएको हुनसक्ने प्रहरीको प्रारम्भिक अनुसन्धान छ।
'निस्सासिन थालेपछि उनीहरूले कपडा खोलेको हुनसक्छ। उनीहरूको गोजीबाट तास पनि फेला परेको छ', घटनाको अनुसन्धान गरिरहेको एक प्रहरी अधिकारीले भने, 'बाँकी कुरा थप अनुन्धान र पोस्टमार्टम रिपोर्ट आएपछि थाहा होला।'
सम्बन्धित समाचार :
दाङ घटना : कारमा भेटिएका तीन बालकको शवको पहिचान खुल्यो, दुई जना पक्राउ
दाङमा भारतीय नम्बरप्लेटको गाडीभित्र ३ बालबालिकाको शव फेला, चालक पक्राउ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788878240.jpeg)
-1786602170.png)
