नयाँ दिल्ली- दिल्लीका मुख्यमन्त्री अरविन्द केजरीवाल काेराेना संक्रमणबाट यहाँकाे परिस्थिति निकै गम्भीर भइसकेको बताए। शुक्रबार बिहान प्रधानमन्त्री नरेन्द्र मोदीसँग कुरा गर्दै उनले केन्द्रका मन्त्रीहरुलाई सहयाेग नगर्दा परिस्थित बिग्रिएकाे जानकारी दिए।
‘हामीले केन्द्रका मन्त्रीहरुलाई फोन गरेका थियौं, सुरुमा उहाँहरुले सहयोगको आश्वासन दिनुभयो,’ केजरीवालले मोदीसँग भने, ‘तर अब उहाँहरु पनि थाकिसक्नुभयो।’
दिल्लीमा अक्सिजनको उद्योग नभएकै कारण संक्रमित लागि अक्सिजनको कमी हुन नहुने उनको भनाइ थियो।
‘यदि कुनै अस्पतालमा एक/दुई घण्टाका लागि मात्र अक्सिजन बाँकी छ या अक्सिजन आपूर्ति रोकियो र मानिसको मृत्यु हुने अवस्था आयो भने फोन उठाएर म कोसँग कुरा गरौं ? कसैले अक्सिजनको ट्रक रोक्यो भने कोसँग कुरा गरौं ,’ उनले मोदीलाई प्रश्न गरे।
केजरीवालले कसैलाई मर्नका लागि त्यसै छोड्न नसक्ने बताउँदै जनताको जीवन उत्तिकै महत्त्वपूर्ण रहेकाे विश्वास दिलाउन सक्नुपर्ने बताए।
‘अक्सिजनको ट्रक ठाउँठाउँमा रोक्न थालिएको छ, तपाईले ती राज्यका मुख्यमन्त्रीसँग कुरा गरिदिनुभयो भने धेरै ठूलो काम हुनेछ, म मुख्यमन्त्री भएर पनि केही गर्न सकिरहेको छैन,’ उनले भने।
उनले राष्ट्रियस्तरमा ठोस योजना बनाएर अघि बढ्नुपर्ने खाँचो औंल्याए। देशको सबै अक्सिजन प्लान्टलाई सेनामार्फत सरकारले नियन्त्रणमा लिनुपर्ने उनको भनाइ छ।
जवाफमा मोदीले ‘अक्सिजन एक्सप्रेस’ सञ्चालन भइसकेको बताएका थिए। केजरीवालले खोपको पनि ‘एक देश, एक दर’ हुनुपर्नेमा जोड दिए।
भारतमा पछिल्लो २४ घण्टामा ३ लाख ३२ हजार ५०३ जना नयाँ संक्रमित थपिएका छन्। अघिल्लो दिन पनि भारतमा ३ लाख १५ हजारभन्दा बढी संक्रमित थपिएका थिए।
कुल संक्रमित संख्याका आधारमा दोस्रो स्थानमा रहेको भारतमा कोरोना संक्रमितको संख्या एक करोड ६२ लाख ५७ हजार नाघेको छ।
पछिल्लो २४ घण्टामा २२ सय ५६ जनाको मृत्यु भएसँगै कोरोना संक्रमणकै कारण भारतमा मृत्यु हुनेको कुल संख्या एक लाख ८६ हजार ९२८ पुगेको छ।
संक्रमितमध्ये एक करोड ३६ लाख ४१ हजार ६०६ जना निको भइसकेका छन् भने २४ लाख २८ हजार ७७५ सक्रिय संक्रमित रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773837959.png)
-1764146706.png)
