काठमाडाैं–कोरोनाभाइरसको सङ्क्रमण व्यापक रूपमा फैलनुमा राजनीतिक दलहरुकाे गतिविधि कारण भएकाे ठहर गर्दै भारतीय निर्वाचन आयाेगले चुनावी र्याली र सभा आयोजना गर्न रोक लगाएको छ।
पछिल्ला हप्ताहरूमा कोरोनाभाइरसको सङ्क्रमण ह्वात्तै बढ्नुमा कतिपय राज्यहरूमा भइरहेका भिडभाडपूर्ण चुनावी अभियान समेत जिम्मेवार रहेकाे आयाेगकाे निष्कर्ष छ। आयोगले यसका लागि प्रतिबन्धात्मक कदम चालेको हो।
भारतका राज्यहरूमा यो वर्ष शृङ्खलाबद्ध चुनाव हुँदै छ। निर्वाचन आयोगले चुनावी अभियानका क्रममा कैयौँ पार्टी र उम्मेद्वारहरूले स्वास्थ्य सुरक्षाका मापदण्ड पालना नगरेको उल्लेख गरेकाे छ। देश सङ्क्रमणको कठोर मारमा परेका देखिएका बेला भइरहेका त्यस्ता गतिविधिलाई लिएर प्रधानमन्त्रीको समेत चर्को आलोचना भइरहेको छ।
प्रधानमन्त्री नरेन्द्र माेदीकाे राष्ट्रियदेखि अन्तर्रास्ट्रिय सञ्चारमाध्यमले आलाेचना गरिरहेका छन्।
दिल्लीका अस्पतालमै अक्सिजन अभाव
महामारीबाट गम्भीर रूपमा प्रभावित राजधानी दिल्लीका छ वटा अस्पतालमा अक्सिजन पूर्ण रूपमा सकिएको चिकित्सकहरूले जनाएका छन्। अन्य अस्पतालहरूमा केही समयका निम्ति मात्रै अक्सिजन बाँकी रहेको जानकारी गराइएको छ। अक्सिजनको अभावमा कैयौँ बिरामीहरूले ज्यान गुमाएका छन्। मुख्यमन्त्री अरविन्द केजरीवालले केन्द्र सरकारसँग अक्सिजन आपूर्ति ब्यवस्था मिलाउन माग गर्दै आएका छन्।
दिल्लीको अस्पतालमा उपचार गराइरहेका राजनीतिकर्मी सौरभ भारद्वाजले ट्वीट गर्दै आफू रहेको अस्पतालमा तीन घन्टा पुग्ने अक्सिजन मात्र रहेको जानकारी दिँदै सहयोगको अपिल नै गरेका छन्। ९९ प्रतिशतभन्दा धेरै सघन उपचार कक्षका शय्या बिरामीले भरिएका छन्।
अक्सिजन आपूर्ति प्रभावित हुँदा लुटपाट हुन थालेको विवरणसमेत सार्वजनिक हुन थालेका छन्।
दिल्लीमा २४ घन्टामा २६ हजारभन्दा धेरै संक्रमण पुष्टि भएकाे छ भने ३०६ जनाले ज्यान गुमाएका छन्। हालसम्म दिल्लीमा ९१ हजार ६ सय १८ जनामा संक्रमण पुष्टि भएकाे छ भने १३ हजार १ सय ९३ जनाले ज्यान गुमाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773837959.png)
-1764146706.png)
