रंगुन- म्यानमारका सेना प्रमुख मिन अङ्ग ह्लइङ इन्डोनेसियामा आयाेजना हुन लागेकाे दक्षिण पुर्वी एशियाली मुलुकहरूको संगठन (आसियान) शिखर सम्मेलनमा भाग लिने भएका छन्। थाई विदेश मन्त्रालयका प्रवक्ताका अनुसार उनले अप्रिल २४ मा हुन लागेकाे सम्मेलनमा भाग लिन लागेका हुन्।
बर्मेली सेनाले सत्ता हातमा लिएपछि उनकाे याे पहिलाे विदेश भ्रमण हाे। लोकतान्त्रिक सरकारलाई अपदस्थ गर्दै सेनाले सत्ता नियन्त्रणमा लिएपछि भइरहेको आन्दोलनमा ७२८ प्रशर्नकारीकाे मृत्यु भएकाे छ। यस्तै हजारौं आन्दोलनकारी अहिले बन्दी बनाइएकाे छ।
राेयटर्सका अनुसार शनिबार सुरक्षा बलले रुबी खानीको शहर भनेर चिनिने मोगोकमा दुईजनालाई गोली हानेर मारेका छन्।
म्यानमारका छिमेकी राष्ट्रहरुले आन्दाेलनरत पक्ष र सेनालाई वार्तामा बस्न आग्रह गरिरहेकाे छ। तर, सेनाले वार्तामा बस्न अस्वीकार गर्दै आएकाे छ भने एक वर्षभित्र चुनाव गराएर सत्ता सुम्पिने बताएकाे छ।
१० सदस्यीय आसियान राष्ट्रमध्ये एक म्यानमार हाे। धेरै नेताहरूले इन्डोनेसियाको राजधानी जकार्तामा हुने सम्मेलनमा उपस्थित हुने जनाएका छन्।
म्यानमारको अपदस्त सरकारले उक्त बैठकमा जुन्ता प्रमुखको सहभागितालाई खारेज गर्ने सम्भावना छ।
प्रतिबन्धित नवनिर्वाचित पिदाउङ्सु लुताउ प्रतिनिधि समिति (सीआरपीएच)ले शुक्रबार ‘राष्ट्रिय एकता सरकार’ (एनयुजी) घोषणा गरेकाे छ। अन्तरिम निर्वाचित जनप्रतिनिधि र विद्रोही जातीय सशस्त्र समूहसमेत मिलेर उक्त राष्ट्रिय एकता सरकार गठन गरिएको हो।
एनयुजीले यो वैध राजनीतिक अधिकार भएकाे दावी गर्दै आएकाे छ। यसले अन्तर्राष्ट्रिय मान्यता र आसियानले बैठकमा सेना प्रमुख ह्लइङको सहभागितालाई अस्वीकार गरी यसको सट्टा अन्यलाई आमन्त्रित गर्न आह्वान गरेको छ।
यता, जुन्ता सरकारले नयाँ वर्षको अवसर पारेर बन्दीगृहमा रहेका २३ हजारभन्दा बढी बन्दीलाई रिहा गर्ने तयारी गरेको छ।
शनिबार म्यानमारमा नयाँ वर्ष अर्थात थिङग्यानकाे अवसरमा दिइएकाे पाँच दिनकाे बिदाकाे अन्तिम दिन हो। जुन सामान्यतया बौद्ध मन्दिरको भ्रमण गर्ने, पानी छ्याप्ने र सडकमा भोजभत्यार गरेर मनाइन्छ।
लोकतन्त्र समर्थक कार्यकर्ताहरूले यस वर्षको चाडपर्व रद्द गर्नुका साथै जनताले प्रजातन्त्र पुनर्स्थापनाको अभियानमा ध्यान केन्द्रित गर्नुपर्ने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770205330.png)
-1764146706.png)
