कायराे- दक्षिणी इजिप्टमा बस पल्टिँदा कम्तिमा २० जनाको मृत्यु भएको छ। दुर्घटनामा तीनजना घाइते भएका छन्।
राजधानी कायरोबाट २० किलोमिटर दक्षिणमा रहेको एसियाटमा उक्त दुर्घटना भएको स्थानिय अधिकारीहरुले बताएका छन्।
‘पल्टिएको बसलाई एक ट्रकले ठक्कर दिएको थियो। त्यसपछि दुबैमा आगो लागेको थियो,’ गभर्नरको कार्यालयले जारी गरेको विज्ञप्तिमा भनिएको छ।
दुर्घटनाको सूचना पाउनेबित्तिकै २६ एम्बुलेन्सलाई घटनास्थलमा खटाएको स्वास्थ्य मन्त्रालयलले जनाएको छ। घाइतेहरुलाई स्थानिय अस्पतालमा भर्ना गरिएको छ।
इजिप्टमा सवारी दुर्घटनाबाट वर्षैनी हजारौंले ज्यान गुमाउने गरेका छ। यहाँको यातायात सुरक्षा सुरक्षित मानिदैन। दुर्घटनाहरू प्रायः तीव्रगति, खराब सडक र ट्राफिक नियमको कमजोर कार्यान्वयनको कारण हुने गरेका छन्।
मार्चमा गिजा राज्यमा ट्रक मिनी बसमा ठोक्दा १८ व्यक्तिको मृत्यु भएको थियो। गत महिना दक्षिणी सहर ताहटा नजिक दुई रेल एकआपसमा ठोकिँदा कम्तिमा २० व्यक्तिको मृत्यु भएको र २०० भन्दा बढी घाइते भएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।