काठमाडौं- भौतिक पूर्वाधार तथा यातायात मन्त्री वसन्तकुमार नेम्वाङले आवश्यक परे कानुन परिमार्जन गरेर भएपनि निर्माण व्यवसायलाई समृद्ध बनाउने बताएका छन्। नेपाली निर्माण व्यवसायी महासंघको २२औं साधारण सभालाई आइतबार सम्बोधन गर्दै मन्त्री नेम्वाङले यस्तो बताएका हुन्।
आपसी छलफलमा व्यवसायीका मागहरू सम्बोधन गर्न सरकार तयार रहेको उनले स्पष्ट पारे। भौतिक पूर्वाधारको विकास बिना सरकारले अघि सारेको 'समृद्ध नेपाल सुखी नेपाली'को अवधारणा पूरा हुनै नसक्ने मन्त्री नेम्वाङको दाबी थियो। सरकारसँग आफ्नो स्वामित्वमा कुनै निर्माण कम्पनी नरहेको स्पष्ट पार्दै मन्त्री नेम्वाङले देशभरका निर्माण व्यवसायीहरू नै सरकारको विकास साझेदार रहेको उल्लेख गरे।
राज्यले पूर्वाधार क्षेत्रलाई उच्च प्राथमिकता दिएकाले नै पछिल्ला वर्षहरूमा यस क्षेत्रमा ठूलो विकास भइरहेको दाबी उनले गरे। ‘निर्माण क्षेत्रको समृद्धिका लागि व्यवसायीहरू पनि सकारात्मक सोंचसहित राष्ट्रप्रतिको आफ्नो दायित्वबोध गरी अघि बढ्नु पर्छ’ मन्त्री नेम्वाङले भने।
शहरी विकास राज्यमन्त्री रामवीर मानन्धरले राजनीतिक स्थिरता बिना निर्माण क्षेत्र फस्टाउन नसक्ने बताए। गुनासो मात्र अघि सार्ने परिपाटीले कसैलाई फाइदा नहुने भएकाले सरोकारवाला सबैले आ-आफ्नो जिम्मेवारी सही ढंगले निर्वाह गर्नुपर्ने उनको जिकीर थियो।
त्यस्तै, पूर्वभौतिक पूर्वाधार तथा यातायात मन्त्री वीरबहादुर बलायरले निर्माण व्यवसायी मैत्री ऐन कानुन बिना व्यवसायीहरूले काम गर्न नसक्ने भन्दै उनीहरूको भुक्तानी रोक्न नहुने बताए। नेपाली कांग्रेसका निर्माण व्यवसायी समन्वय विभाग प्रमुख समेत रहेका बलायरले निर्माण व्यवसायी र राज्यको सम्बन्ध सुमधुर नभएसम्म निर्माण क्षेत्रको विकास हुन नसक्ने ठोकुवा गरे। सांसद जीप छिरिङ लामा शेर्पाले राज्यले निर्माण व्यवसाय क्षेत्रलाई कहिल्यै पनि महत्व नदिएको आरोप लगाए।
नेपाल निर्माण व्यवसायी महासंघका मानार्थ सदस्य समेत रहेका शेर्पाले सरकारको गलत रबैयाका कारण निर्माण उद्योग धाराशायी भएको टिप्पणी गरे। नेपाल निर्माण व्यवसायी महासंघका अध्यक्ष रवि सिंहले व्यवसायीहरूको सहनशीलतालाई राज्यले कमजोरी ठानेको बताउँदै जायज मागहरू पूरा नभए महासंघ आन्दोलनमा जान बाध्य हुने चेतावनी दिए।
‘निर्माण व्यवसायीहरूसँग गरेका सम्झौता पालनामा राज्य इमान्दार भएन’, अध्यक्ष सिंहले भने, ‘अव्यवहारिक नीति नियम, निर्माण सामाग्रीको अभाव, सरकारी निकायबीचको समन्वयमा रहने कमजोरी, महंगी, असुरक्षा लगायतका कारणले निर्माण व्यवसायीहरू पेशाबाटै पलायन हुने खतरा बढेको छ।’
महासंघका वरिष्ठ उपाध्यक्ष निकोलस पाण्डेले कृषिपछि सबैभन्दा बढीलाई रोगजारी दिँदै आएको निर्माण उद्योग रुग्ण अवस्थामा रहेको उल्लेख गरे। उद्घाटन सत्रमा महासंघका पूर्वअध्यक्ष यक्षध्वज कार्की, एसोसिएट उपाध्यक्ष आङ दोर्जी लामा शेर्पा (एडी), महासचिव रोशन दाहाल, निर्माण व्यवसायी संघ मोरङका अध्यक्ष सुरेश सुवेदी, महासंघका लुम्बिनी प्रदेशका अध्यक्ष बलिभद्र राना लगायतले निर्माण व्यवसायीका विविध समस्याबारे बताएका थिए।
सोही अवसरमा महासंघको मुखपत्र ‘निर्माण विशेषांक’को विमोचन गरिनुका साथै निर्माण क्षेत्रमा योगदान पुर्याउनेहरूलाई सम्मान गरिएको थियो। काठमाडौं घोषणा पत्र जारी गर्दै महासंघको २२औं साधारण सभा चैत्र ३० मा सम्पन्न हुनेछ। साधारण सभामा देशभरका एक हजार भन्दा बढी निर्माण व्यवसायीहरूको सहभागिता रहेको छ। साधारण सभा स्थलमा निर्माण क्षेत्रसँग सम्बन्धित् स्टलहरू पनि राखिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
