मुम्बई- भारतको पश्चिम बंगालमा तृणमूल कांग्रेस र भारतीय जनता पार्टीका कार्यकर्ताबीच झडप हुँदा ५ जनाको मृत्यु भएको छ। घटनामा अन्य ४ जना घाइते भएका छन्।
शनिबार बिहानै कुचबिहार जिल्लाको शीतलकुची इलाकामा जारी विधानसभाको निर्वाचनमा झडप हुँदा सुरक्षाकर्मीले गोली चलाएको थियो। गोली लागेर १८ वर्षका आनन्द बर्मनको मृत्यु भएको बताइएको छ। अन्यको भने परिचय खुल्न सकेको छैन।
चुनावी सुरक्षाको लागि खटेमा सुरक्षाकर्मीको बन्दुक खोस्ने प्रयास हुँदा गोली चलाइएको अधिकारीहरुले बताएका छन्। ‘केही व्यक्तिले चुनावमा खटिएका सीआईएसएफका कर्मचारीहरूलाई घेरा हाले र बन्दुक खोस्ने प्रयास गरे। त्यसपछि हामीले फाइरिङ गर्यौं। घटनामा ४ जनाको मृत्यु भएको छ भने अर्का एकजनाको अस्पताल लैजाँदा लैजाँदै मृत्यु भयो,’ एक वरिष्ठ प्रहरी अधिकारीले भने।
शवलाई पोष्टमार्टमका लागि माथाभंगा अस्पताल लगिएको छ। गोली लागेर घाइते भएका ४ जनालाई पनि त्यहीँ भर्ना गरिएको छ। यता तृणमूल कांग्रेसका कार्यकर्ताले सेनाले अन्धाधुन्ध गोली चलाएको आरोप लगाएका छन्।
‘जनता शान्तिपूर्वक मतदान गर्न मतदान केन्द्रतर्फ लागेका थिए। त्यही समयमा सेनाहरूले अचानक कुनै उत्तेजना बिना अन्धाधुन्ध गोलीबारी गर्न थाले। घटनामा चार जनाको मृत्यु भयो र चारजना गम्भीर घाइते भए। उनीहरुलाई माथाभंगा अस्पतालमा भर्ना गरिएको छ,’ तृणमूल कांग्रेस एक कार्यकर्ताले स्थानीय पत्रकारलाई भने।
हाल पश्चिम बंगालको पाँच जिल्लामा ४४ सिटको लागि चौथो चरणको निर्वाचन भइरहेको हो।
घटनापछि निर्वाचन आयोगले शीतलकुची विधानसभा क्षेत्रको १२५ र १२६ मतदान केन्द्रमा मतदान स्थगित गर्न निर्देशन दिएको छ। निर्वाचन पर्यवेक्षकको अन्तरिम प्रतिवेदन पछि निर्वाचन आयोगले यो निर्देशन दिएको हो।
निर्वाचन आयोगले घटनाको विस्तृत रिपोर्ट र भिडियो फुटेज मागेको छ। उत्तर बंगालको सिलिगुडीमा प्रधानमन्त्री नरेन्द्र मोदीको चुनावी सभा भइरहेको बेला यो घटना घटेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764947412.jpg)
-1764146706.png)
