रंगुन- म्यानमार जनताले शान्ति चाहेका कारण पछिल्लो दिनहरुमा प्रदर्शन कम हुँदै गइरहेको जुुन्ता सरकारले दावी गरेकाे छ। सेनाले प्रवक्ता तथा ब्रिगेडियर जनरल ज्वा मिन तुनले राजधानी नेपिडोमा एक पत्रकार सम्मेलन गर्दै पछिल्लो दिनमा प्रदर्शनमा कमी आएको जानकारी दिएका हुन्।
‘शान्ति चाहने जनताहरुको सहयोगका कारण विरोध प्रदर्शनमा कमी आइरहेको छ। जसलाई हामीले महत्वका साथ हेरिरहेका छौं,’ उनले भने, ‘हामी र सुरक्षा फौजलाई सहयोग गर्न सबैसँग आग्रह गर्दछौं।’
उनले अब म्यानमार सामान्य स्थितिमा फर्किनेसमेत जानकारी दिए। ‘सरकारी निकायहरु र बैंकहरूले चाँडै नै पूर्ण रुपमा सुचारु गर्नेछन्,’ उनले भने। यस्तै उनले दुई वर्षभित्र चुनाव गराएर सत्ता हस्तान्तरण गर्नेसमेत बताए।
गत फेब्रुअरी १ मा बर्मेली सेनाले ‘कू’ गरेसँगै प्रजातन्त्र पुनर्बहालीका लागि निरन्तर प्रदर्शन हुँदै आएको छ। एसिस्टेन्स एसोसिएसन फर पोलिटिकल प्रिजनर्स (एएपीपी)का अनुसार जारी प्रदर्शनका क्रममा ४८ बालबालिका सहित ६१४ भन्दा बढीको मृत्यु भएको छ। यस्तै २८ सयभन्दा बढी पक्राउ परेको जनाइएको छ।
यता मानवअधिकारवादी समूह ह्युमन राइट्स वाच (एचआरडब्ल्यू)ले म्यानमारको जुन्ता सरकारले प्रजातन्त्र पक्षधर सयौं प्रदर्शनकारीलाई बेपत्ता बनाएको आरोप लगाएको छ।
‘यी संख्या योभन्दा बढी हुन सक्छ। सयौं मानिसहरू म्यानमारमा विद्रोह सुरु भएदेखि बेपत्ता छन्। उनीहरुलाई जुन्ता सरकारको आदेशपछि बलपूर्वक बेपत्ता पारिएको हो,’ एचआरडब्ल्यूले भनेको छ।
तर, सेनाले ती दावीहरु अस्वीकार गरेको छ। ‘जारी प्रदर्शनमा २४८ जनाको मृत्यु भएको छ र १९ सुरक्षा फौजका अधिकारीहरु पनि मारिएका छन्,’ प्रवक्ता तुनले भने।
यता केही देशहरुले जुन्ता सरकारले शान्तिपूर्ण आन्दोलनमा पनि सेनाले व्यापक दमन गरेको भन्दै मुलुकमा गृहयुद्ध निम्तनसक्ने चेतावनी दिएका छन्। म्यानमारका तीन धार्मिक सशस्त्र विद्रोही समूह टाङ लिबरेसन आर्मी, म्यानमार नेशनलिटिज डेमोक्रेटिक एलायन्स आर्मी र अराकान आर्मीले सेनाले जनतालाई मार्ने क्रम जारी राखे प्रदर्शनकारीहरुसँग सहकार्य गर्दै सेनाविरुद्ध लड्ने चेतावनीसमेत दिइसकेका छन्।
तर, उनले प्रदर्शनकारीहरुमाथि स्वचालित हतियारहरू प्रयोग नगरेको समेत दावी गरेका छन्। यता १८ देशका राजदूतहरूले म्यानमारमा प्रजातन्त्रको पुनःस्थापनाका लागि संयुक्त विज्ञप्ति जारी गरेका छन्।
‘बर्मेली जनताको साहस र हिम्मत देखेर हामी गदगद भएका छौं। स्वतन्त्र, न्यायिक, शान्तिमय र प्रजातान्त्रिक म्यानमारमा विश्वास गर्ने सबैको आशा र आकांक्षालाई समर्थन गर्न सँगै हामी एकसाथ उभिएका छौं। हिंसा रोक्नु पर्दछ, सबै राजनीतिक बन्दीहरुलाई रिहा गर्नुपर्दछ र प्रजातन्त्र पुनःस्थापित गर्नुपर्छ,’ विज्ञप्तिमा भनिएको छ।
उक्त वक्तव्यमा संयुक्त राज्य अमेरिका, बेलायत, क्यानडा, अष्ट्रेलिया, न्यूजील्याण्ड, दक्षिण कोरिया, स्विजरल्याण्ड र युरोपियन देशका राजदूतहरूले हस्ताक्षर गरेका थिए।
‘छिमेकी, ठूला देशहरू र शक्तिशाली राजनीतिज्ञको सल्लाहहरू हामी अनुशरण गर्दै आइरहेका छौं। उनीहरू सबैलाई सम्मान गर्दछौं,’ प्रवक्ता तुनले भने। उनले आङ साङ सु ची नेतृत्वको नेश्नल लिग फर डेमोक्रेसीका सदस्यहरू विदेशीको लहडमा चलेको समेत आरोप लगाए।
‘देश जलाउन उनीहरुको भूमिका महत्वपूर्ण छ। विरोध प्रदर्शन गर्न विदेशीले आर्थिक सहयोग जुटाइरहेका छन्,’ उनले भने। उनले अन्तर्राष्ट्रिय समुदायका केही सदस्यले सैन्य सरकारलाई मान्यता नदिएको भन्ने आरोप अस्वीकारसमेत गरे।
‘हामी विदेश देशहरूसँग मिलेर काम गरिरहेका छौं र छिमेकी देशहरूसँग मिलेर काम गरिरहेका छौं,’ प्रवक्ता तुनले भने। अमेरिका, बेलायत र युरोपेली युनियनले सत्ताविद्रोहमा संलग्न प्रहरी र सेनाका वरिष्ट कमान्डरका साथै सेनाको नियन्त्रणमा रहेका व्यापारिक एवं व्यवसायिक कम्पनीमाथि विभिन्न किसिमका प्रतिबन्धहरु घोषणा गरिसकेका छन्।
चीनले पनि म्यानमारको अवस्थालाई ध्यानमा राख्दै एसियन देशहरूको बैठक आह्वान गर्न अनुरोध गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764947412.jpg)
-1764146706.png)
