काठमाडौं- आज (शुक्रबार)देखि ट्राफिक नियम उल्लंघन गरेबापत तिर्नुपर्ने जरिवाना आफ्नै बैंक खाताबाट तिर्न सकिने भएको छ। महानगरीय ट्राफिक प्रहरी महाशाखाले जरिवानाबापतको रकम अनलाइनमार्फत भुक्तानी गर्ने प्रणालीको विस्तार गरेको हो।
यसअघि अनलाइन सेवा प्रदायक संस्थाहरुबाट सीधै ट्राफिक जरिवाना भुक्तानी गर्न सकिने प्रणाली सुरु भइसकेको थियो। त्यसैलाई निरन्तरता दिँदै अझ सहज, सरल र सुविधायुक्त बनाउन आफ्नै बैंक खाताबाट जरिवाना तिर्न सकिने गरी सेवा विस्तार गरिएको महाशाखाका प्रमुख प्रहरी वरिष्ठ उपरीक्षक जनक भट्टराईले जानकारी दिए। यसले आम सवारीचालकलाई जरिवाना तिर्न बैंकमा लाइन बस्नुपर्ने, लामो समय व्यर्थ खर्चिनु्पर्ने बाध्यताको अन्त्य हुने उनले बताए। साथै, ट्राफिक कार्यालयमा हुने भीडभाडमासमेत कमी आउने उनको भनाइ छ।
महाशाखाले ट्राफिक जरिवाना रकम ट्राफिक भ्वाइलेसन रेकर्ड सिस्टम (टीभीआरएस), सरकारको राजस्व व्यवस्थापन सूचना प्रणाली (आरआईएमएस) र सेवा प्रदायक संस्थाहरुबीचमा आबद्ध भई रियल टाइममा सम्बन्धित बैंकको खातामार्फत भुक्तान हुने गरी सिस्टम सञ्चालन गरेको जनाएको छ।
आजदेखि थप ४५ वटा बैंक तथा वित्तीय संस्था र सातवटा अनलाइन भुक्तानी सेवा प्रदायक संस्थाहरुबाट सीधै ट्राफिक जरिवाना भुक्तानी गर्न सकिने छ। आगामी दिनमा अन्य सेवा प्रदायक संस्थाहरुसँगसमेत जोडिँदै जाने महाशाखाको योजना रहेको छ।
सम्झौतापत्रमा हस्तान्तरण कार्यक्रममा अनलाइन सेवा प्रदायक कम्पनी फोन पे प्रालिको तर्फबाट दिवस कुमार सापकोटा र नेपाल क्लियरिङ हाउस लिमिटेड (कनेक्ट आईपीयस) का मुन्नि राजभण्डारी तथा अन्य प्रतिनिधिहरुको उपस्थिति रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
