ब्रासिलिया- ब्राजिलमा गत २४ घण्टामा कोभिड-१९ को संक्रमणको कारण चार हजारभन्दा बढी व्यक्तिको मृत्यु भएको छ। ब्राजिलमा कोरोना भाइरस सुरु भएयता यति धेरै संख्यामा व्यक्तिहरुले ज्यान गुमाएका यो पहिलोपटक हो।
ब्रालिजमा मंगलबार चार हजार १९५ जनाले कोभिड-१९ बाट ज्यान गुमाएपछि यस संक्रमणबाट ज्यान गुमाउने व्यक्तिको संख्या करिब तीन लाख ३७ हजार पुगेको छ। कोभिड-१९ को कारण ज्यान गुमाउने व्यक्तिको हिसाबबाट ब्राजिल अमेरिकापछि दोस्रो स्थानमा पर्दछ।
ब्राजिलको स्वास्थ्य प्रणालीले कोभिड-१९ को भयानक तनाव खेपिरेहको छ। एस्पिरिटो सान्टो फेडरल युनिभर्सिटीका महामारीविज्ञ एथेल मकिएलले भने, 'हामी भयानक स्थितिमा छौं, र हामीले कुनै राज्य वा संघीय सरकारले प्रभावकारी उपाय देखिरहेका छैनौं।'
देशको जनसंख्याको १० प्रतिशतले पहिलो चरणको खोप लगाएका र हाल अत्यधिक रुपमा फैलिएको भाइरसको प्रकोपलाई नियन्त्रण गर्नको लागि एकमात्र उपाय कम्तीमा २० दिनसम्म प्रभावकारी लकडाउन भएको उनले बताएका छन्।
देशमा चलेको राजनीतिको कारण ब्राजिलका यो स्थिति आएको र ठूलो संख्यामा व्यक्तिहरु ज्यान गुमाउनुपरेको विज्ञहरुको भनाइ रहेको छ। कोरोना भाइरस नियन्त्रणको लागि विशेषज्ञहरूको सल्लाह नमानेको र देशमा यस प्रकारले स्वास्थ्य संकट निम्त्याउनुमा राष्ट्रपति जाइर बोल्सोनारो जिम्मेवार भएको आरोप लगाइएको छ।
राष्ट्रपति बोल्सोनारोले अर्को वर्ष फेरि चुनावको लागि तयारी गरेपछि राजनीतिकमा उथलपुथलको भएको थियो। गत हप्ता विदेश, न्याय र रक्षामन्त्रीले राजीनामा गरेपछि नयाँ मन्त्री नियुक्ति भएका थिए। त्यसैगरी सेनातर्फ सेना, नौसेना र वायुसेना कमाण्डरहरुले राजीनामा गरेपछि नयाँ कमाण्डरहरु फेरिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
