वेलिङ्टन- न्यूजिल्यान्डले आगामी अप्रिल १९ देखि अस्ट्रेलियासँग सीमित संख्यामा हवाई उडान सुरु गर्ने घोषणा गरेको छ।
दुई छिमेकी मुलुकबीच प्रारम्भ हुन लागेको हवाईमार्गबाट यात्रा गर्नेहरुले क्वारेन्टिनमा बस्नुपर्ने छैन। कोरोनाभाइरस महामारीका कारण दुवै मुलुकमा अलपत्र परेका र आफन्तजनलाई भेटघाट गर्न यो सुविधाले ठूलो मद्दत पुग्नेछ। साथै, कोरोनाका कारण सङ्कट व्यहोरीरहेको पर्यटन उद्योगलाई पनि यसले राहत दिने विश्वास गरिएको छ।
दुवै मुलुकले कडा लकडाउन गरी कोरोनाभाइरसको प्रसार रोक्न ठूलै सफलता हासिल गरेका थिए। न्यूजिल्यान्डकी प्रधानमन्त्री जसिन्डा आर्डेनले आफ्ना स्वास्थ्य अधिकारीहरुले अस्ट्रेलियाबाट कोरोना संक्रमण हुने खतरा निकै न्यून रहेको र अब यात्रा निकै सुरक्षित रहने बताएको जानकारी दिएकी छिन्।
उनले भनिन्, 'हवाई उडानको थालनीले अर्थतन्त्रलाई पुनः गतिशील तुल्याउन मद्दत गर्नेछ र यात्राका क्रममा भाइरसको संक्रमण रोक्न उच्चस्तरीय प्रबन्ध पनि गरिने छ।'
अस्ट्रेलियाले यसअघि पनि न्यूजिल्यान्डबाट अस्ट्रेलिया आउने यात्रुलाई क्वारेन्टिनमा बस्न नपर्ने व्यवस्था गरेको थियो तर न्यूजिल्यान्डले निकै सावधानी अपनाएको थियो। अस्ट्रेलियाबाट न्यूजिल्यान्ड आइपुगेका हरेक व्यक्तिलाई दुई साताको क्वारेन्टिनमा बस्नैपर्ने नियम लगाइएको थियो।
दुवै देशले विश्वका अन्य मुलुकसँगको यात्रालाई निकै कडा बनाएका थिए। कोरोना देखिएका मुलुकका नागरिक अस्ट्रेलिया आइपुगे उनीहरुलाई कडा क्वारेन्टिनमा राख्ने गरिएको थियो।
क्विन्सल्यान्डस्थित दी काउ रेस्टुराँका मालिक माल प्राइसले यस वर्ष आफ्नोमा ८० प्रतिशतले ग्राहक घटेको बताए। उनले अब विस्तारै व्यवसायले गति लिने विश्वास व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
