काठमाडाैं- इन्डोनेसियामा मुसलधारे वर्षासँगै आएको बाढीपहिरोमा परी ४४ जनाको मृत्यु भएको छ। घटनामा अन्य धेरै हराइरहेका छन्।
आइतबार बिहान पूर्वी इस्ट नुसा तेन्गारा प्रान्तमाको फ्लोरेस टापुको लामेनेले गाउँमा उद्धारकार्यमा खटिएका सेनाले ३८ जनाको शव निकालेका थिए। अन्य पाँच जना घाइते भएका छन्। यता छिमेकी प्रान्तको बिमा शहरमा दुई व्यक्तिको मृत्यु भएको छ।
लामेनेले गाउँमा ५० वटा घरहरु पुरिएका छन्। यसका साथै अन्य स्थानमा सयौं घरपरिवार विस्थापित भएको समाचारमा जनाइएको छ। वर्षाले सडकहरुमा क्षति पुर्याएकाे छ। त्यसैले दुर्गमका सबैभन्दा प्रभावित इलाकामा उद्धारकर्ता पुग्न सकिरहेका छैनन्। यसकारण मृतककाे संख्या बढ्नसक्ने देखिएको छ।
यसैबीच, इन्डोनेसियाको पश्चिम जाभाको समुद्री क्षेत्रमा शनिबार साँझ एउटा माछा मार्ने डुङ्गा ठूलो पानीजहाजमा ठोक्किएर भएको दुर्घटनामा १७ जना हराइरहेका छन्। बान्डुङ उद्धार एजेन्सीका प्रवक्ता सेनी उलानडारीले १५ जनालाई उद्धार गरिएको र हराइरहेका अरु १७ जनाको खोजी कार्य जारी रहेको बताए।
बाँधहरुमा पानी ओभरफ्लो भएको कारण धेरै घरहरु डुबेको जनाइएको छ। स्थानिय अधिकारीहरुका अनुसार नौ घण्टाको वर्षापछि लगभग १० हजार घर डुबेका छन्।
जनवरीमा पश्चिम जाभा क्षेत्रमा बाढीमा परेर ४० जनाको मृत्यु भएको थियो। गत सेप्टेम्बरमा बोर्निओमा गएको पहिरोमा कम्तिमा ११ व्यक्तिको मृत्यु भएको थियो। यस्तै केही महिना अघि सुलावेसीमा दर्जनौंले ज्यान गुमाएका थिए।
वातावरणविद्का अनुसार वन फडानीका कारण पहिरो जाँदै आएको छ। प्रकोप एजेन्सीको अनुमान १२ करोड इन्डोनेसियालीहरू पहिरोको जोखिममा रहेका क्षेत्रमा बस्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
