काठमाडौं- जर्मनीका विदेशमन्त्री हेको मासले म्यानमारमा जुन्ता सरकारले जनतामाथि दमन जारी राखे मुलुकमा गृहयुद्ध निम्तनसक्ने चेतावनी दिएका छन्। शान्तिपूर्ण आन्दोलनमा पनि सेनाले व्यापक दमन गरेको भन्दै गृहयुद्ध निम्तनसक्ने चेतावनी दिएका हुन्।
म्यानमारका तीन धार्मिक सशस्त्र विद्रोही समूह टाङ लिबरेसन आर्मी, म्यानमार नेशनलिटिज डेमोक्रेटिक एलायन्स आर्मी र अराकान आर्मीले सेनाले जनतालाई मार्ने क्रम जारी राखे प्रदर्शनकारीहरुसँग सहकार्य गर्दै सेनाविरुद्ध लड्ने चेतावनीसमेत दिइसकेका छन्।
‘म्यानमारको सेनालाई विश्वभरबाट दबाब दिइएको छ। तर, यति गर्दापनि दमन रोकिएको छैन। एसियाका कुनैपनि देश म्यानमारलाई गृहयुद्धको आगोमा डुबेको हेर्न चाहँदैनन्। त्यसैले विश्वका सबै देशले आफ्नो प्रभाव प्रयोग गर्न र त्यहाँको प्रजातान्त्रिक प्रणालीको पुनर्बहालीका लागि आग्रह गर्न अपील गर्दछु,’ आइतबार जर्मन अखबारलाई अन्तर्वार्ता दिँदै उनले भने।
गत फेब्रुअरी १ मा बर्मेली सेनाले ‘कू’ गरेसँगै प्रजातन्त्र पुनर्बहालीका लागि म्यानमारमा निरन्तर प्रदर्शन हुँदै आएको छ। एसिस्टेन्स एसोसिएसन फर पोलिटिकल प्रिजनर्स (एएपीपी)का अनुसार जारी प्रदर्शनमा ४६ बालबालिकासहित ५५७ भन्दा बढीको मृत्यु भएको छ।
एएफपीका अनुसार सेनाविरुद्धको आन्दोलनको क्रममा दुई हजार ७५० भन्दा बढी मानिसहरु पक्राउ परेका छन्। यता मानवअधिकारवादी समूह ह्युमन राइट्स वाच (एचआरडब्ल्यू)ले म्यानमारको जुन्ता सरकारले प्रजातन्त्र पक्षधर सयौं प्रदर्शनकारीलाई बेपत्ता बनाएको आरोप लगाएको छ।
‘म्यानमारमा सेनाले विगत दुई हप्तामा धेरैको ज्यान लिएको छ। सयौं मारिए र हजारौं सेनाको डरका कारण देश छाडेर भागेका छन्। यो चिन्ताको बिषय हो,’ उनले भनेका छन्।
म्यानमार नाउका अनुसार म्यानमारका सेनाले पूर्वी सिमाना नजिकको मुट्र जिल्लाका क्षेत्रमा रहेका शिविरलाई लक्षित गरेर हवाई आक्रमण गर्दा ३ हजारभन्दा बढी थाइल्याण्ड शरण लिन पुगेका छन्।
यता, म्यानमारका लागि संयुक्त राष्ट्रकी विशेष दूत क्रिस्टिना सार्नरले पनि म्यानमारमा गृहयुद्ध हुनसक्ने चेतावनी दिएकी थिइन्। ‘म्यानमारको सैनिक शासन निरंकुश हुँदै गइरहेको छ, जनताको मनमा ठूलो क्रोध छ। यस्तो अवस्थामा त्यहाँ गृहयुद्ध हुने प्रबल सम्भावना छ,’ उनले भनेकी छिन्।
अमेरिका, बेलायत र युरोपेली युनियनले सत्ताविद्रोहमा संलग्न प्रहरी र सेनाका वरिष्ट कमान्डरका साथै सेनाको नियन्त्रणमा रहेका व्यापारिक एवं व्यवसायिक कम्पनीमाथि विभिन्न किसिमका प्रतिबन्धहरु घोषणा गरिसकेका छन्।
चीनले पनि म्यानमारको अवस्थालाई ध्यानमा राख्दै एसियन देशहरूको बैठक आह्वान गर्न अनुरोध गरेको छ। ‘चीनले एसियन देशहरूलाई यस सम्बन्धमा छलफल गर्न चाँडोभन्दा चाँडो बैठक बोलाउन चाहन्छ,’ चिनियाँ सरकारी अधिकारीको एक विज्ञप्तिमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
