काठमाडौं- बुधबार ललितपुरको हेरिटेज गार्डेनमा सुरु भएको नेकपा एमालेको माधवकुमार नेपाल पक्षको राष्ट्रिय भेलालाई धेरैले एमाले विभाजनको प्रस्थानबिन्दूका रुपमा चर्चा गरेका थिए।
प्रधानमन्त्री एवम् एमाले अध्यक्ष केपी शर्मा ओलीले यही आकलन गरेरै सकेसम्म भेला रोक्ने प्रयत्न गरेका र नसकेपछि त्यसलाई असफल पार्ने रणनीति अपनाएका थिए। त्यसका लागि आफ्नो सचिवालयलाई समेत प्रयोग गरेर भेलाविरोधी प्रचार गराउनेदेखि त्यसमा सहभागी हुनेहरूलाई कारवाही गर्ने अप्रत्यक्ष धम्कीसमेत उनले दिए।
तर, भेलामा प्रस्तुत राजनीतिक दस्तावेज, प्रमुख नेताहरूका धारणा र धेरैजसो कार्यकर्तामा ओलीप्रति हदैसम्मको आक्रोश देखिएपनि छुट्टै पार्टी बनाएर जानेभन्दा एमालेमै रहेर ओलीलाई सुधार्नुपर्छ भन्ने 'मूड' देखिएको छ।
प्रधानमन्त्री ओलीले पार्टी र सरकार दुवैतिर देखाएको रवैयालाई बुझाउन बरु वरिष्ठ नेताहरू माधवकुमार नेपाल र झलनाथ खनाल तथा भेलामा समूहगत छलफलका लागि तोकिएका नेताहरूले कार्यकर्तामाझ विस्तृत व्याख्या गरे।
नेता घनश्याम भुसालले अहिलेको एमालेको लडाईंमा पनि ओली हार्ने निश्चित भएको दाबी गरे।
एमाले उपमहासचिव घनश्याम भुसालले एमालेलाई बलियो बनाएर जानेबाहेक अरु केही सोच्दै नसोचिएको बताए। ‘आमरूपमा हामीले गर्न खोजेको एकता नै हो। ओलीजीको प्रवृत्तिलाई म ‘ओलीवाद’ भन्छु। त्यो भनेको विचारधारामा ‘म’, सिद्धान्तमा जता भत्क्यो उतै रोइलो। राजनीतिमा मेरा कि चाकरहरू कि शत्रुहरू हुनुपर्छ। संगठनमा जति चाकरी त्यति ठूलो चाकर भन्ने बनाएको छु’ भुसालले भने, ‘मलाई व्यक्तिगत रुपमा सोध्नुहुन्छ भने ओलीजी हार्नुहुन्छ, हामी जित्छौं।’
दुई दिने भेलाको बुधबारको कार्यक्रम सकिएपछि एमाले उपाध्यक्ष अष्टलक्ष्मी शाक्यले पार्टी विभाजन गर्ने भन्दा पनि एकीकृत बनाएर जाने विषयमा बहसको थालनी गरिने बताइन्।
‘हामीले एमाले विभाजन गरेर नयाँ पार्टी बनाउने सोचेकै छैनौं। ओली कमरेडले नेकपा अर्कैको जिम्मा लगाएर एमालेमा पुर्याउनु भएको छ,' शाक्यले भनिन्, ‘एमाले पार्टीमा भएका खराब तत्वलाई पाखा लगाएर त्यही पार्टीलाई हामीले जनताको पार्टी बनाउनुपर्छ।’
भुसालले हामीसँगको कुराकानीमा अर्को कुरा सुनाए। प्रतिनिधि सभा विघटन भएलगतै तीन महिनाभित्र पुनःस्थापना हुने आफूले बताएको उल्लेख गर्दै उनले अहिलेको एमालेको लडाईंमा पनि ओली हार्ने निश्चित भएको दाबी गरे।
‘हामी ओलीलाई हराउँछौ ओली नहार्ने एउटा पनि तर्क छैन। जुन जुन तर्कहरू गरिन्छन्, ती सबै ओली हार्ने तर्कहरू हुन्,' भुसालले भने, ‘अबको मिलनबिन्दु जेठ २ गते (एमाले र माओवादी एकता भएको २०७५ जेठ ३ भन्दा एक दिनअघि) फर्कनुपर्छ। यो सहमतिमा कसैले हुन्न भन्दैन। अस्तिको बैठकमा ओलीजीले पनि भन्नु भएन।’
एमाले पार्टीलाई एकताबद्ध गर्नुपर्छ भन्ने जनमत बढ्दै गएको, आफूहरूले पनि जेठ २ गतेमै फर्काएर छाड्ने अठोट गरेको उल्लेख गर्दै भुसालले आफूहरू एमाले बाहेक अर्को हुने सोच्दै नसोचेको, एमाले हुनुमै गौरव गर्ने बताए।
कारबाही गरेर साध्यै हुन्न
प्रधानमन्त्री ओलीले फागुन २८ गते वरिष्ठ नेता झलनाथ खनाल र माधवकुमार नेपालनिकट नेताहरूलाई आफ्नो पक्षको बैठक राखेर जिम्मेवारीबाट हटाएका र आफूनिकटलाई जिम्मेवारी दिएका थिए। त्यसलगतै नेपाल र खनाल पक्षले चैत ४ र ५ गते राष्ट्रिय कार्यकर्ता भेला गर्ने निर्णय गरेका थिए। यो भेलाले ओलीलाई पनि तर्सायो, उनी नेपाललाई भेट्न तयार भए र धुम्बाराहीस्थित पार्टी कार्यालय पुगे। तर, धुम्बाराहीमा भएको बैठक फलदायी नभएपछि एमालेभित्रको तनाव यो भेलासम्म आइपुगेको हो।
दलको बैठकमा सबै सांसदलाई उपस्थित हुन खबर पठाइए पनि नेपाल र खनालपक्षका सांसदहरूले बालुवाटारमा हुने बैठकमा नजाने निर्णय गरेका छन्।
प्रधानमन्त्री ओलीले नेपाल पक्षको राष्ट्रिय भेला चलिरहेकै बखत बिहीबार बिहान ११ बजे संसदीय दलको बैठक बोलाएका छन्। दलको बैठकमा सबै सांसदलाई उपस्थित हुन खबर पठाइए पनि नेपाल र खनालपक्षका सांसदहरूले बालुवाटारमा हुने बैठकमा नजाने निर्णय गरेका छन्।
राष्ट्रिय भेला भइरहेको जान्दाजान्दै दलको बैठक बोलाएकाले उपस्थित हुन नसक्ने सचिव योगेश भट्टराईले बताए। ‘बुधबार र बिहीबार राष्ट्रिय कार्यकर्ता भेला चल्नेछ। प्रधानमन्त्रीज्यूले थाहा पाउँदापाउँदै दलको बैठक बोलाउनु भएछ। बिहीबारको दलको बैठकमा कार्यव्यस्तताले उपस्थित हुन सक्दैनौं। अन्य दिन बोलाए दलको बैठकमा नजाने भन्ने हुँदैन,' भट्टराईले भने।
दलको बैठकमा अनुपस्थित भएकै कारण देखाएर ओलीले आफूहरूमाथि कारबाही गर्न नसक्ने पनि भुसालले बताए। ओलीले एकपछि अर्को गर्दै कारबाही गरेर जान सम्भव नभएको भन्दै भुसालले भने, ‘उहाँले राजनीति सक्नुभयो। एमालेको जुन शान, प्रतिष्ठा र वैभव थियो त्यो सखाप पार्दै हुनुहुन्छ। हामीले गठबन्धन गरेर चुनावबाट त्यति धेरै मत ल्यायौं, बलियो सरकार बनायौं, एकता गर्यौँ , एकता पनि भत्कायौँ। अब एउटा पार्टी एमाले छ त्यही पनि फोर्न थालिएको छ। एमालेमा ओलीलाई कसरी बिउझाउँन सकिएला भन्ने लाग्या छ।’
ओलीमाथि दबाब बढाउन पुराना वाम नेता सक्रिय
एमालेमा ओलीको मनपरी अचाक्ली भएको र आफूहरूमाथि अत्याचार थोपरेको भन्दै आएका नेपाल र खनालपक्षीय नेताहरूले आफ्नो पक्षमा पुराना वाम नेतालाई पनि सक्रिय बनाएका छन्। कम्युनिस्ट आन्दोलनका पहिलो र दोस्रो पुस्ताका पुराना नेताहरू सकिनसकि वैशाखीको सहाराले बुधबार हेरिटेज गार्डेनमा उपस्थित भए। पार्टीलाई एकताबद्ध गराउनुपर्ने भन्दै राजनीतिबाट विश्राम लिएका नेताहरू मञ्चमै उपस्थित भएर खबरदारी गरे।
ओलीसँग जेल जीवन विताएका मोहनचन्द्र अधिकारी धर्मराउँदो शरीरसहित मञ्चमा पुगेर पार्टी एकताको सन्देश दिए। १८ वर्ष जेल जीवन विताएर नेपालका नेल्सन मण्डेलाको रुपमा समेत चर्चा बटुलेका अधिकारीले ओलीको प्रवृत्ति पहिलेदेखि यस्तै रहेको उल्लेख गरे। पुराना वाम नेताहरू सिद्धिलाल सिंह, कमलप्रसाद कोइराला, मोदनाथ प्रश्रित, शीतल झा, राधाकृष्ण मैनालीलगायतलाई मञ्चमा राखेर नेपाल र खनालले ओलीले आफूहरूमाथि अत्याचार गरेको बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1698918398-1698987692.png)
-1764146706.png)
