काठमाडौं– स्थानीय चुनावको मिति नजिकिएसँगै लोकतान्त्रिक समाजवादी पार्टी पनि सरकार र चुनावी गठन्धनमै जोडिने विषय बाहिर आएका छन्। पछिल्लो समय दुई पक्षबीच छलफल चलिरहेको नेताहरुले सार्वजनिक रुपमै बताइरहेका छन्।
तत्कालीन जसपाको महन्थ ठाकुर पक्ष (अहिलेको लोसपा)ले प्रधानमन्त्री शेरबहादुर देउवालाई प्रधानमन्त्रीमा विश्वासको मत दिँदै समर्थन जनाएको थियो। विश्वासको मत लिने दिन देउवाले ठाकुरलाई उनीहरुले उठाउँदै आएका माग र मुद्दा सम्बोधन गर्ने सहमति जनाएपछि उनी पक्षका सांसद्हरुले विश्वासको मत दिएका थिए।
यतिबेला सत्ता गठबन्धनमा आबद्ध दलहरु नेपाली कांग्रेस, नेकपा माओवादी केन्द्र, नेकपा एकीकृत समाजवादी र जनता समाजवादी पार्टीबीच चुनावी तालमेलको बहस भइरहेको छ। कांग्रेस बाहेकका तीन दलले आफ्नो हैसियतभन्दा बढी भागबण्डा खोजेकाले कांग्रेस-लोसपाबीच चुनावी तालमेल गरेर जाने विषयमा छलफल चलेको नेताहरुको भनाइ छ।
देउवा र लोसपा अध्यक्ष ठाकुरबीच भइरहेको संवादबारे देउवा पक्षले गुपचुप राखिरहेका छन्। तर, माओवादी केन्द्रका अध्यक्ष पुष्पकमल दाहाल ‘प्रचण्ड’ले गत मंगलबार यसलाई सार्वजनिक गरिदिएका थिए।
अनौपचारिक रुपमा लोसपा सरकारमा पनि जाने र चुनावी तालमेलमा पनि जाने विषयमा देउवा र ठाकुरबीचमा मात्रै संवाद भइरहेको प्रचण्डले बताएका थिए। तर, औपचारिक रुपमा यो विषय अघि नबढेको उनको भनाइ थियो।
उता अध्यक्ष ठाकुरले सरकारमा जाने विषयमा प्रधानमन्त्रीसँग छलफल भइरहेको बताएका छन्। लोसपाले गत मंगलबार नै जनकपुरमा आयोजना गरेको मधेस प्रदेशस्तरीय प्रशिक्षण कार्यक्रममा ठाकुरले आफ्ना माग र मुद्दा सम्बोधन भए सरकारमा जान सकिने बताएका हुन्। सरकारमा सहभागिताका लागि आफूहरुले नागरिकता समस्याको समाधान र मधेस आन्दोलनका क्रममा आफ्ना पार्टीका नेता, कार्यकर्तामाथि लगाइएको मुद्दा फिर्ता लिनुपर्ने विषयलाई प्राथमिकतामा राखेको उनको भनाइ थियो।
ठाकुरले संसद्को आगामी अधिवेशनमा नागरिकतासम्बन्धी विधेयक प्रस्तुत गर्ने कुरा प्रधानमन्त्री देउवासँग भएको जानकारी समेत दिए। उनले सरकारले आफूहरुको मागलाई ठोस रुपमा सम्बोधन गर्ने गरी पहल गरेको अवस्थामा मात्रै सरकारमा सहभागी हुने प्रष्ट पारेका थिए।
यस्तै, लोसपाका कार्यकारिणी सदस्य केशव झाले लोसपाका माग र मुद्दा सम्बोधन भएपछि मात्रै सरकारमा सहभागी हुने बताए। ‘हामीले नागरिकता विधेयक, मधेस आन्दोलनका क्रममा लगाइएका झुटा मुद्दा फिर्तासँगै कार्यकर्ता रिहा र संविधान संशोधनका लागि कार्यदल बनाउनु पर्यो भनेका छौँ। ती सबै माग सम्बोधन भए मात्रै सरकारमा जान्छौँ’, उनले भने, ‘यदि लोसपाका माग र मुद्दा सम्बोधन नभए सरकारमा जाने कुनै सम्भावना छैन। चुनावी तालमेलको पनि सम्भावना छैन।’
उनै झाले बुधबार आयोजित एक कार्यक्रममा चुनावी गठबन्धनका सन्दर्भमा सत्ता पक्षसँग दुई तीन चरणमा छलफल भइसकेको बताएका छन्। एमालेसँग भने कुनै छलफल नभएको उनको भनाइ थियो।
कांग्रेस नेता रामचन्द्र पौडेलले स्थानीय चुनाव अघि लोसपा सरकारमा सहभागी हुने सम्भावना कम भएको बताए। सरकारमा सहभागी भए पनि स्थानीय चुनावपछि मात्रै हुनसक्ने उनको आकलन छ।
चुनावी तालमेलका विषयमा विभिन्न शक्तिसँग छलफल भइरहेकाले कुनै ठोस निर्णय नभएको उनले बताए। सत्ता गठबन्धमा चुनावी तालमेल गर्न बहस र छलफल भइरहेका बेला तीन दलबीच तालमेल नभए लोसपासँग गर्ने विकल्प कांग्रेससँग हुनसक्छ।
माओवादी केन्द्र, एकीकृत समाजवादी र जसपाले महानगरपालिका र उपमहानगरपालिकाको नेतृत्वमा आफ्नो हैसियतभन्दा बढी हिस्सेदारी खोज्न थालेपछि कांग्रेस असन्तुष्ट भएको छ। प्रायः महानगरपालिका र उपमहानगरपालिकामा एमालेसँगको मुख्य प्रतिस्पर्धी कांग्रेस भएकाले आफूलाई सत्ता गठबन्धनका अन्य दलले सघाउनुपर्ने कांग्रेसको छ। तर, उनीहरु तयार छैनन्। यही पृष्ठभूमिमा कांग्रेसले लोसपासँग संवाद अघि बढाएको हो।
कांग्रेसकै एउटा पक्ष चुनाव तालमेलको विपक्षमा कडा रुपमा प्रस्तुत भइरहेको छ। यही पृष्ठभूमिमा लोसपासँग संवाद अघि बढाउँदा सत्ता गठबन्धनका दलहरुलाई दबाबमा राख्न सकिने बुझाइ कांग्रेसको छ। कांग्रेस र लोसपाबीच चुनावी तालमेल भएमा अहिलेको सत्ता गठबन्धन आबद्ध दलहरुबीच चुनावी तालमेल हुने सम्भावना भने कम मात्रै छ।
कांग्रेस प्रवक्ता प्रकाशशरण महतले भने चुनावी गठबन्धन हुने/नहुने विषयमा सोमबार मात्र निर्णय हुने बताएका छन्। शुक्रबारदेखि जारी कांग्रेस केन्द्रीय समिति बैठकमा गठबन्धनका विषयमा मिश्रित धारणा आएको उनले बताए। अधिकांश नेताहरूले स्थानीय आवश्यकताका आधारमा गठबन्धन गर्नुपर्ने धारणा राखेको महतले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
